السبت، 25 يناير 2014

facebook & other drugs





مع الأعتذار لأسم الفيلم المقتبس منه العنوان فالكلام موجه للذين
يقضون أكثر من 3 ساعات يوميا على الفيس بوك بأنتظام فقط
 الغير ذلك : مبروك أنتم تمام  

فى كل مرة هتقرر تبتعد لظروف قهرية أو إرادية عن الفيس بوك بعد مشوارك
اليومى لشئ أصبح  أساسى فى حياتك وإن كان ترفيه أو شغل
 أو غير ذلك فأنت بتحط نفسك
فى مواجهة عدة خيارات وستكتشف أشياء مهمة دعنى أخبرك عنها لتضع
أحتياطاتك لما ستواجه يا حلو :

أولا : سيتأكد لك بلا أدنى شك أنك مدمن  حقيقى للفيس بوك 
وستلاحظ توافر أعراض أنساحبه من دمك لو كنت قوى الملاحظة لنفسك
بداية من مودك السئ أنتهاءا بغصبك أحيانا كثيرة بدون سبب واضح لك وللأخرين

ثانيا : ستجد لديك وقت فراغ كبير لكل الحاجات اللى متأجلة
وقاعد تأخر فيها زيادة وتهرب منها علشان ما تعملهاش وعامل حجتك
الجاهزة أصل مافيش وقت خاصة لو كانت مذاكرة  هيكون الوقت كاف
ومع ذلك بردوا مالكش مزاج تعملها

ثالثا : لو نويت تقضى وقت فراغك الكبير دا مابعد
الأشياء الأساسية من شغل وطبخ وما يلزمهما فى مشاهدة أفلام
محملها عندك على اللاب أو هتشوف الأفلام اللى مترشحالك
ونفسك تشوفها يبقى أنت كدا وقعت فى الفخ التانى
 أنت بتسيب الكوكايين للترامادول مع توافر دماغك العالية فى الاتنين
كلهم أدمان ما تبقاش عنيد

رابعا : أما لونويت مثلا أنك تخلص الكتب اللى أشتريتها 
واللى حملتها على اللاب تبقى كدا أنت وقعت فى الفخ التالت
أنت بتسيب الكوكايين للزقة النيكوتين هتكون هنا فايق فايق
وتعود بإجابية كمان وهتخلص من كل السموم المتعلقة
بسذاجتك  وهدخل بنفسك سموم الفكر الحر والحريات والأفكار الكبيرة
جدا عليك والواسعة كمان وهتشحن مشاعر وعواطف وقصص أنت مش قدها 
أنت وقعت ومحدش سمى عليك يا قارئ بيه
أو يا قارئة هانم

خامسا : أما لو نويت تعقل كدا وهتعمل حركات جريئة وهتزور أصحابك
اللى زعلانين من قلة سؤالك عليهم بالتليفون أو بالزيارة

فنصيحتى بلاش الموبايل خاصة العرض بتاع 1000 دقيقة
و100 رسالة بلاش أحسنلك لأنك هتجيب لنفسك صداع نصفى 
بمحض أرادتك الحرة روح زورهم أرحم بس أستحمل النص ساعة
مع أصحابك اللى مختارهم بمحض أرادتك .. فاكر...
وخليها مفاجأة وخليك هادى وأنت بتسمع كل الحكايات والأعترافات
وأفتكر إن هيجيلك يوم وهتبقى زيهم .. أدعيلهم
بس ربنا يهديهم ويهديك وكل واحد يشوف حاله

سادسا : هتعمل حركة حلوة بجد بقى وهتكون ودود وحلو كدا
وهتزور الأقارب والمعارف من الدرجة الأولى أستلم بقى 
روشتات العلاج كلها (دا لو صيدلى ) أو ما يتعلق بشخصك
الكريم والحبوب عليهم من تفنيط وتفتيش كامل بداية
من أول ما بتصحى الصبح لغاية بتقبض كام؟
ومرورا بكل حكايات النميمة على البيوت
أنتهاءا بحفلات الزواج وسرادقات العزاء
أما لو كانوا من مشاهدى التليفزيون المصرى بقنواته الخاصة 
 يبقى الحكايات على السياسة خليك كول وبارد
وحاول ما تخسرشهم والأفضل ما تقولهمش أنت أنهى تيار
 سياسى من الأول
أما لو كانوا من دورك وما فوق فغالبا المواضيع المعتادة عن الجواز 
وسنينه وسين وجيم  وأخر الخيانات وأخر الفضائح
أنتهاءا أنت بتشترى لبسك من فين؟

سابعا : أه حرمت ولا لسه ؟ عايز تخرج وتروق وتشوف نفسك فى الشارع
أنا مش هتكلم أنتى ( البنات تحديدا ) عارفة اللى فيها
أما الشباب  فأخرج لما نشوف أخرتها


النهاية : أنا شخصيا حرمت وعرفت إن اللى قال معرفة الناس كنوز
ما كنش يعرف الناس أصلا وكان يقصد غالبا واحد أو واحدة أتعرف عليهم لشخصهم المتفرد من نوعه ودا أكيد قبل ما يزعل معاهم أو يفترقوا
وأكيد ما كنش ليه حساب على الفيس بوك
ولم يعرف الإدمان من قبل
أنت قدامك حلين:  يا تستمر فى علاجك وهتخف ماتخفش
يا ترجع لل drug بتاعك بس ما تشتكيش تانى

هناك 5 تعليقات:

قمر وليل وغيوم يقول...

موضوعك رائع ومهم
انا الحمد لله ماليش فى الفيس خالص
تحياتى
اتمنى التواصل

نيللي علي يقول...

التوازن هو الحل:)

أنا قفلته ورجعت فتحته تاني معرفش ليه..بس هحاول أكون مش مدمنة عليه:)

بسنت يقول...

قمر
و
نيللى
شكرا لكما

norahaty يقول...

ياخبر!!!
كركبتى الدنيا عليا كده !
حاستمر فى الإدمان)اسهل :(

بسنت يقول...

د: نورا أنا نصحتكم
بس واضح إن محدش ولا أنا سمعنا النصحية