الثلاثاء، 8 أكتوبر، 2013

الله - الوطن..... اللا- مُنتمى

 

 لازم نعرف
إذا كان كما قال القطبى المعاصر أنتو شعب وإحنا شعب
مع الفارق فى المستند إليه(فلول إسلامى علمانى عسكرى)
 فلا تلوم القطبى القديم
ففى الغالب كلنا قطبيون بشكل أو بأخر
(نسبة إلى الشيخ سيد قطب= القطبى الإسلامى الأول ) 

فاكر اوائل التسعينات
  فى المدرسة الأبتدائية 
زميلة 1: بيقولوا أمل هى اللى هتغنى دع سمائى أو صباح الخير يا سينا
زميلة 2: هو دا اللى هى شاطره فيه   
زميلة 3: طيب ما أنا اللى هعزف ورا الكورال كله الأوكرديون 
زميلة 1: طبعا الناظر هيحضر وشلة الاداره التعليمية
زميلة 4 : المهم هيوزعوا علينا هدايا زى السنة اللى فاتت
الحلاوه القطع المربعه دى بتاعه المولد 

فى ذكرى 6 أكتوبر 
 عرض فيلم الطريق إلى إيلات على التليفزيون المصرى
وبحضور كل العائلة فى سنة أولى كلية
ومشهد فرح واحد من البحرية وغناء زملاء الدفعة
مصر يا أمه يا سفينة
 مهما كان البحر عاتي
فلاحينك ملاحينك
يزعؤا للريح يواتى
اللى ع الدفة صنايعى
واللى ع المجداف زناتى
واللى فوق الصارى كاشف
كل ماضى وكل أتي
أنا: مصر يا أمة يا بهية

 برنامج دينى على قناة فضائية مصرية
الشيخ: فى حديث شريف صحيح :قال رسولنا الكريم عليه الصلاة والسلام
يا أيها الناس لا تتمنوا لقاء العدو وأسألوا الله العافية
فإذا لقيتموهم فأصبروا
وأعلموا أن الجنة تحت ظلال السيوف
 المذيع: الله يفتح عليك يا شيخنا

على  صفحة القّراء المُميزة على الفيس
أكتب حكمة من أخر كتاب قرأته
أنا: كان متيقنا أنه على صواب وهم على ضلال
وأن عليه الدفاع البسيط والواضح والحقيقى
فالبديهات الواضحة عليك أن تتمسك بها
إن العالم المادى موجود وله قوانين لا تتغير
فالحجارة صلبة والماء سائل والأشياء التى لا ترتكز
على شئ تهوى إلى الأرض
(قواعد العشق الأربعون )

فى يوم الجمعة ببلدتى المُتعصبة
 وعند نهاية تسليم إمام المسجد
بالسلام عليكم ورحمة الله
واحد من المصلين: يسقط جيش السيسى يسقط الخاين
مصلى أخر: يا أخى وحدّ الله إحنا لسه فى بيت الله 
الكلام دا مكانه فى الشارع بعد الصلاة
مُصلى أخر:الخاين نهايته قربت
 مُصلى ثالث: دعوها فإنها منُتنة
وإشتباك بالألفاظ والأيدى داخل المسجد
فيقوم إمام المسجد الغير محسوب على أى فرع سياسى تاركا
بيت الله لخلق الله

معالم القطبى الأول
ليست مهمتنا أن نصطلح مع واقع هذا المجتمع الجاهلى
ولا أن ندين بالولاء له غهو بهذه الصفة صفة الجاهلية 
غير قابل لأن نصطلح معه إن مهمتنا أن نُغير من أنفسنا
أولا لنغيرهذا المجتمع أخيرا

جرنان الأهرام
مانشيت : حزب النور ينتقد وضع قانون معاقية عدم الوقوف تحية لعلم مصر
ويقول أن الوقت الراهن فيه قضايا أهم أن يتم وضع تشريع وقانون لها 

معالم القطبى الأول التكفيرية
فلا وطن للمسلم إلا الذى تقوم فيه شريعة الله
فتقوم الروابط بينه وبين سكانه على أساس الأرتباط فى الله
ولا جنسية للمسلم إلا عقيدته التى تجعله عضوا فى الأمة المسلمة
فى دار الإسلام ولا قرابة للمسلم إلا تلك التى تنبثق
من العقيدة فى الله فتصل الوشيحة بينه وبين أهله فى الله

فى بيت العائلة
قريبة 1: بيقولوا فعلا تحية العلم اتشال منها فى المدارس
جملة الله أكبر اللى بتتقال قبل تحيا جمهورية مصر العربية؟
أنا : حلو الكلام التعبان دا
لو دا صح يبقى فعلا فى يوم ما أترفعش فيه الآذان بالأزهر
وكمان شوية العلمانيين يمسكوا ويمنعوا الأذان خالص علشان الضوضاء!!!

بيجوفيتش واحد فكر فى الإسلام
لماذا نصادف كثرة المعوقين حول المساجد والكنائس والمعابد
التى نذهب إليها؟ لأن بيوت الله وحدها تفتح أبوابها
لأولئك الذين ليس لديهم ما يعرضونه أو يبرهنون عليه
أولئك الفقراء فى المال والصحة 
أولئك الذين أُستبعدوا من موائد الأحتفالات فى هذا العالم


فى عظة داخل إحدى كنائس بلدتى
صديقتى: شايف يا أبونا مش الشحات اللى دايما تقولنا عليه دا غلبان
أعطوه بنوايا حسنة للمحبة شفته بيشترى 
جبنة رومى من السوبر ماركت
القس: هو مش إنسان وحقه ياكل جبنة رومى زيك
ولا هو حقك أنتى بس ؟ 

فى جدعنة مصطفى إبراهيم
أدين بدين الجدعنة وبدين رفاق الدرب
وبقولة إحنا مش أنا فى المعمعة والضرب
وبدين ماكنت مصدقُه فى المعركة الأولى
وبدين جثث فى المشرحة أساميها مجهولة
وأدين من ساب ع الأسفلت إخواته مقتُولة 
وأقول التوبة مقبولة إلا ف وقت الحرب 

   فى صالة  بيت العائلة
عمتى : دول مجرمين اللى بيحرقوا ويدمروا البلد 
 النهاردة عايزين يعلمونا الاسلام طول عمرنا مسلمين
أنا : لا مش صحيح لا هما ولا أنتو 
يعنى  المسلمين يلبسوا فى الستينات والسبعينيات
مينى جيب ويسيبوا شعرهم أنا شفت صورك كلكم وأنتو كبار ومتجوزين
ومعاكوا عيالكم كمان 
 هو دا الاسلام يا عمتى ؟

 وما زالت معالم القطبى الكبير تفرق وتنخر
هناك دار واحدة هى دار الإسلام تلك التى تقوم فيها
الدولة المسلمة وما عداها فهو دار حرب
علاقة المسلم بها إما القتال
وإما المهادنة على عهد أمان 

درويش يُنهى الأنتماء
لا أخجل من هويتى 
فهى مازالت قيد التأليف
ولكنى أخجل من بعض ما جاء في
مقدمة ابن خلدون
أنت منذ الآن غيرك
 

هناك 6 تعليقات:

الازهرى يقول...

كل سنة وإنتى طيبة يا ستى :)

الله
الوطن
نحن الوطن

بسنت يقول...

وأنت طيب يا أزهرى بيه
ان شاء الله ينعاد عليك بكل الخير
إحنا متفقين أننا الوطن ومن بعدنا يبقى التراب والعفن

سلوى يقول...

كل فكرة تحدثتى عنها
تحتاج تعليقات

ربنا يوفقك

بسنت يقول...

شكرا يا سلوى

شمس النهار يقول...

عجبني شيخ الجامع :)
كبر دماغه
ايوة الستينات والسبعينيات كان في ميني جيب بس كان في اخلاق اكتر من دلوقتي
الاسلام تحول الي طقوس وليس سلوك

بسنت يقول...

شمس
فعلا المشكله أساسا فى الأخلاق
دمتى بخير