الجمعة، 16 أغسطس، 2013

الأمل اللى من غيره نبقى مافيش

     

جبتلى صاحب وحبيته
زقنى فى المترو زقيته
وأمامات فيا ومُت أنا فيه
روحتله بيته وعزيته

أنا أستقلت من حزب مصر القوية من يوم 29 يونيو 2013 
ولأنه كان يوم سبت والبوسطة أجازة فبعته بعديها بكام
 يوم من عزل د: مرسى وأعلنته رسمى أنا غير حزبية 
ويمكن رسميا دا كان متأخر بس أنا فعليا كنت 
تركت الحزب وأجتماعاته من بعد ما أعلن أنه هينزل
 الأنتخابات البرلمانيه المزعومه يعنى جت زى كل حاجه
 بعملها متأخره بس المهم أنها كانت صح

عدا فيا القمح سمرنى
عدا فيا الفجر صبرنى
عدا فيا الحزن غيرنى
عدا فيا العمر كبرنى

قال الزميل المشترك لى (كونى ليبراليه أو يسارية أو أى حاجه غير متوسطه علشان بقيت بكره الكلمه دى ) : أن زميلنا الأخوانى وصل البلد لفتره يومين من أعتصام
ميدان رابعة العدوية حيث الاخوان وانصار د: مرسى (أوعى تقولى الشرعيه ولا الاسلام لو كنت بتقرأ عندى فى مدونتى ) وأنه راجع تانى الاعتصام
أنا: أبتسمت لأنى كنت متأكده من كدا
هيقولهم أيه لو مارحش دى تكليفات لازم يروح
ومش بعيد ياخد أسرته معاه كمان علشان تكتمل الصوره
الزميل المشترك: نفسى أشوفك وأنتى بتتكلمى معاه فى معارضتك 
لحكم الاخوان ود: مرسى 
أنا : تعرف أنى بتكلم معاه فى كل حاجة الا السياسه تقريبا فى 
بينا تفاهم على كدا علشان نفضل اخوات ونحترم بعض
الصديقه المشتركه (والعائده بوهم مصر هى أمى ونيلها هو دمى من أرض الخليج):
غريبة مع إنك بتتكلمى مع اى حد معارض ليكى فى السياسة وعن د: مرسى والوعود والجو دا وهوعضو اساسى فى الحزب والجماعه
أنا: بأبتسامه تانى أنا أتعلمت ما أخسرش الانسان فى اللى شايفه فيه انسانيه
الواحد لازم فى  الوقت الصعب دا يحافظ على انسانيه الناس بجانب انسانيته 
الصديقه المشتركه : أنا قلت أول ما شفتك السنه دى إنك أتغيرتى عن أجازتى فى مصر السنه اللى فاتت 
أنا: علشان أنا كبرت فى السنه دى قد عمرى كله

خدنى من لفه لمريلتى
خدنى من التسنين لحصالتى
خدنى من مدرستى ع الجامعه
خدنى من الترعه على الاسفلت

إلى ولاء اللى غالبا مش هتقرى الكلام المكتوب عنها دا
من ساعه ما عرفت إنك أتنقلتى ومش هنتقابل تانى فى الشغل على الاقل
وأنا كأن حاجه كبيره مهمه جدا لى تانى بتسبنى يا ولاء
ماعندكيش فكره السنه الصعبه اللى فاتت عليا أنتى كنتى مهمه قد أيه مجرد وجودك وكلامك وتفاؤلك وطموحاتك وافكارك غيرت فيا أزاى 
كنت لسه بقول لواحده من صديقات الشله بتاعتى شله الثانويه والابتدائي اللى محتفظه بيهم بحمد الله إنك كنتى البسمه وسط تشاؤم والظروف الوحشه 
لكل اعضاء الشله دى لوجودك بس معايا 
أنا مش هنسى فضلك فى تكملتى لدروس اللغه والجو الجديد اللى كنت فيه وافكار تكمله الدراسات والحماس دا كله كان بفضلك
أنا عارفه اننا ارتبطنا كأخوات فعليا بصرف النظر عن المكان صعب نتفرق
أختى ياللى فى فؤادى وفى مسمعى وفى خاطرى أنتى والأضلع
أختى إن بسمت فعن مبسمى وإن أنتى أنتحبتِ فمن أدمعى
دى أجمل أنشوده سمعتها عن الصديق يا صحبه الخير
ربنا يحفظك لاسرتك الصغيره والكبيره ولا يحرمنى من وجودك وتفاؤلك
ويوفقك للى أنتى مقبله عليه ويجعله الخير حيثما كان

ياللى وحشانى ما توحشنيش
ضحكك السُكر محلانيش
خفت من المطرة قفلت الشيش
ليه فضل أسمك على الشباك
  
من أمبارح وأنا بسأل نفسى بعد كل الايام شديده السواد
تماما كملبسى الاسود يا ترى كان غلط إنى مضيت  مع حركة
تمرد طيب كان ينفع أسيب فاشيه الاخوان دى تبرتع فى البلد دى
يعنى د: مرسى أنا شخصيا شايفاه ومازلت لا يصلح أكتر من كونه مدرس بالجامعه بس كدا أنا فاكره انى كنت بقعد انتظر خطاباته فقط علشان 
أضحك أه والله لم أنتظر منه أى جواب على اى تساؤل
 بيدور فى تفكيرى أو أى حل لأى مشكله لأنه ما يصلحش للمكان 
دا بكل اسف بالرغم من كونى عاصره لليمون واخترته بس 
بردوا كان ازاى هسيب البلد فى ايد واحد زى الفريق شفيق
 ازاى دم الناس اللى راح دا اجيب واحد الدم طايله يحكم
 لا يا مصر مش ممكن
حركه تمرد نجحت بمساعدة الجيش  وبحمد الله د: مرسى أتعزل
 زى ما كنت عايزه تمام  بس طبعا م كنت عايزه العسكر يرجع 
يتصدر لصوره من تانى لانى لا يمكن أنسى 
محمد محمود ولا العباسيه ولا البالون ولا ماسبيرو
صور الشهداء دول معايا على اللاب وعلى الموبايل حتى كنت حاطه صوره ليهم على الحيطه فى الشغل علشان ما أنساش القصاص
ومع عهد الاخوان محمد محمود التانيه واحداث بورسعيد التانيه والاتحاديه
الدم الدم والقصاص القصاص
ولكن لمين بنادى ولمين نشتكى يا رب 
فجيعه الدم بتاع امبارح 14 أغسطس ما تتنسيش بردوا
والناس اللى بيعتقلوها زى أيام أمن الدوله بس المره دى من بعد معرفه افكار الاخوان السياسيه وليس الدينيه لانى بوافق على مبادئهم الدينيه الجميله للحق واللى تتناقض تماما مع السياسه فى تصرفاتهم محدش هيقف معاهم
احنا وافين نتفرج على دمهم وهو بيسيل علشان احنا ضدهم وضد العسكر
أكتر حاجه وحشانى دلوقتى ان الواحد يرجع لايام جمعيه التغيير والافكار اللى كلها أمل وتفاؤل  مجرد افكار واللى نسفها قراءاتى لمانيفستو الثوره الحقيقى
روايه عز الدين شكرى * باب الخروج* دى اللى بحكيها لكل 
حد بيفهم وافهمه مصر رايحه على فين وكأن المخطط دا بيحصل بالسطر 

حُزنى يا محول خطوط سيري
حُزنى يا عطار فى باب اللوق
شوفلى تحويجه لتفسيري
حُط ريحه بُن لضميرى
شوفلى عود أصلب من المغشوش

الواحد كان نفسه فى بلد قوية يتسند بيها لو سافر وبيها لو استمر
بلد قويه يساعد بقوتها ومعونتها أخواتنا فى فلسطين وغزه 
والمقاويين فى حماس وكتائب القسام
أخواتنا فى سوريا ومش بعيد فى الشيشان
 وأى دوله اسلاميه تحتاجنا
لكن للاسف فشل  أول رئيس منتخب حتى لو كان مش على مزاجنا أنه يوحدنا للاسف لم نجد منديلا مصرى يعمل مصالحه وطنيه ونقف على رجلينا من تانى 
يعنى شئ لا يُعقل نعتبر كل المقاوميين فى حماس بايعين القضيه وكأنهم الحكومه المتعاونه مع الصهاينه أو مجرمى أوسلوا وكتائب القسام تبقى عدونا مش الصهاينه
ومش معقول اخواتنا يجوا لغايه حدونا كلاجئين سورين ونرفض استقبالهم هو دا دينا هى دى إنسانيتنا هو دا المسلم اللى بيحمى أخوه
يا ألف خسارة يا مصرى

مُر أنا يا صاحبى لو دوقتنى
جيت أول الأه ما صدقتنى
يطرح أيه الملح غير مالح
يطلع أيه من الجرح غير مجروح

هنعمل أيه دلوقت هنسيب الاخوان أو أنصارهم يحرقوا فى البلد للانتقام
هنسيب العسكر والداخليه  يقتلوهم فى الشوارع ويتسلوا بعد كدا علينا
بنظريه يخلصوا على بعض وبضرب الظالمين بالظالمبن ونطلع منها سالمين
يبقى بنكدب على نفسنا إحنا اللى أنسانيتنا ومبادئنا بتموت مش الفريقين دول
هنسيب الناس اللى نعرفهم من أى جانب يموتوا واحنا كلنا مصريين
ولا هنسيب أمن الدوله يرجعهم الى جيل أهل الكهف من تانى فى المعتقلات علشان نرجع مصر لايام التسعينات والجماعات الاستشهاديه
ولا هنقلب على الجزائر ونعيش 10 سنين قدام نخلص على بعض
ولا هتكون حرب أهليه طائفيه بين المسلمين والمسيحين ونعيد
 تاريخ لبنان بنسخه مصريه
الواحد نفسه فى شويه الامل اللى من غيرهم يبقى مافيش أشفوفهم تانى
وأشوف اى مبادره تحقن الدم ونعيد ان شاء الله من نقطه الصفر لكن كدا احنا بنرجع
بالسالب احنا تحت خالص للاسف كلنا بنخسر حاليا كمصريين مسلمبن ومسيحين ويمكن مافيش حاجه ترجع زى ماكانت لكام سنه قدام 
ولك الله يا مصر 



                                                                                     

هناك 3 تعليقات:

سيف الاسلام يقول...

لما بحس انى مخنوق اوى ومش قادر اتكلم بقعد لوحدى وادور على المدونات والمنتديات اللى كنت بدخلها

لكن مع الاسف حتى دى مش قادر اكتب او اعلق فيها

ربنا يستر عبى البلد

abhasoft يقول...

thank you

بسنت يقول...

سيف
شكرا على الزياره
والمصريين هما بس الامل
----------------------------
abhasoft
مش عارفه شكرا على ايه
انا اللى بشكرك على الزياره