الخميس، 18 أبريل، 2013

عن العمر كله ال 32


مشهد 1: شارع طويل ملئ بالبيوت على الصفين فى مركزهما القروى من  حوالى 15 سنه وهما الاتنين بيتمشوا
الصاحبه: تعرفى يا لوله إنى حاسه إنى هموت صغيره
لوله( من الشله) : وأنا كمان دايما بقول زيك كدا

كنا كااام؟ ثلاثه - أربعه أنضم لينا فى الثانوى لكل واحده اتنين تلاته تانين وأنضم ليا تلاته  ويمكن سافر اللى سافر وفارق اللى فارق بس لسه محتفظه بيهم كلهم - دايما أسأل نفسى أزاى كدا دى حاجه غريبه ؟؟
يمكن دا مكسب العمر العمر كله

بس الاكيد والنسبى أن شلتنا وفى امتحانها مع الحياه لم ينجح منه احد كاملا

مشهد2 : شارع طويل فى مدينتهم  المليئه بالمواصلات  وهما الاتنين بيتمشوا من كام شهر قريب
الصاحبه: تعرفى ان الموضوع دا مش شاغلنى بالشكل الحرفى والفعلى بقدر ان الواحد لما  بيفكر انه لما هيكبر هيكون لوحده
آه انا لوحدى يمكن فى اوضتى بس كلهم حواليا فى البيت الموضوع مختلف
لوله:  أنتى أتعقدتى مننا  .. مش كدا ؟
الصاحبه: بالابتسام طبعا يعنى انتو تعقدوا
بس مش دا السبب انا ليا شروط والناس ليها شروط عمرنا ما بنتفق

لوله: ماتبصلناش ربنا هيعوضك عنا كلنا
الصاحبه: حبيبتى يا لوله يا فهمانى عيد ميلادك النهارده 18 ابريل
كل سنه وانتى اختى ومتهنيه يارب


مشهد3: غرفه متوسطه بهيئه حكوميه  بها مكاتب  وضوء النهار يغمرها من باب فاتح على بلكونه فى ساعات العمل الاولى  ومن امام المكتب الاكبر بالغرفه
الزميل الاصغر : دى تانى مرة المره اللى فاتت ما ردتش أعمل حاجه
المسئوله: يعنى كنت هتعملى أيه مثلا ؟؟
الزميل الاصغر :ما أردتش اترجاكى وأنا بترجاكى دلوقتى ساعدينى
المسئوله:  ( الله يخرب بيتك هتبوظ اعصاب المسئوله الغير عاطفيه بالمره) ولوو
 مش هقدر اعملك اى حاجه هساعدك وديا ومن بره الموضوع اديتك فرصتك وخلص الكلام .


مشهد 4: من داخل غرفه متوسطه ببيت عائلى  وبها كنبه  أنتريه قاعدين عليها  وأمامها مكتبه كبيره وبالغرفه سرير صغير وارفف على الحائط
الصاحبه: آه بكلمها على طول بالذات ان ظروفها وحشه انا تعبت كمان لما عرفت انها عيانه الواحد قلبه واجعه مش كفايه اللى هو فيه  كمان أنتو  عليا
لوله: وانا كمان كلمتها وقلتلها كلنا مستحملين اللى احنا فيه علشان العيال بس
الصاحبه: انا كنت متضايقه منها بس قلت هى صاحبتى ومستحملانى اكيد كمان عيوبى هى شيفاها ومستحملانى بيها وانا دايما بقولها الحقيقه بغلاسه بس لا يمكن انسى وقفتها معايا فى ازمتى دى الفتره اللى رجعتنى اشوفها زى زمان لكل منا عيوبه صاحبتى وهخدها على بعضيها بعيوبها
لوله: عندك حق

مشهد 5: الصاحبه:  حلم جميل وفى غرفه معيشه واستقبال ضيوف و اسمه رائف اسم غريب مش كدا؟؟   وبيقولوا كمان ظابط
ظابط ؟؟ كدا تبقى باظت خالص - قولوا سبحان الله
فوفا (من الشله) : دورى على معناه  يمكن تفهمى
الصاحبه: حاضر

مشهد 6: من تسجيل على اللاب توب  لحلقه المسلسل التركى المفضل لها  والرومانسى والبطلين فى مركب  تحملهما وسط الماء الهادئ
جميرى : هنعيش أيام جميله  فى المستقبل وسترى
لأننا نستحق تلك السعاده
كوزاى: يبتسم تلك الابتسامه الساحره تأكيدا وتأملا لذلك

** عن الحاجات اللى ناويه أعملها فى العمر اللى باقى من بعد
1- جواز- قصه/  قصه- جواز . ونقطه انتهى
2- حج وكمان مدينه منوره (مش بالترتيب)
3- رحلة  منطاد  فى الاقصر فى الشتا (اللى ماعادتش شهرى المفضل الموضوع دا خلص السنه اللى فاتت ولا فى شهر نوفمبر ) وليكن فى سبتمبر او يناير
4- رحله سفارى بصحراء شرم الشيخ وشال فلسطينى (شفتها كدا فى الصور )
5- حفله كساره البندق او بحيره البجع او اوبرا عايده بدار الاوبرا المصريه وبالملابس الرسميه غالبا هشترى فستان سهره عادى يعنى
6- تركيا واسطنبول (كنت ناويه اسافرها فعلا السنه دى مع واحده صحبتى  بس صرفت الفلوس يمكن قريب والعمر قادم يا اسطنبول يا ازمير
7- هتعلم لغه رابعه اجنبيه ( انا بتعلم فعليا واحده حاليا غير الانجليزيه  دروس من على النت مش هقولها غير لما اجيدها ان شاء الله  )
8- بيوت آل البيت والقاهره القديمه والبوابات الزياره دى متأجله من سنتين تقريبا
9- سينا وسانت كاترين وطابا نفسى اشوفهم فعليا
10 هعمل مكتبه عامه زى مكتبه وكافيه (هتكون غاليه علشان مش اى حد يدخلها ) زى ألف أو ديوان خان فى واحده صاحبتى متحمسه تشارك معايا بمجهودها بس بتبحث معايا عن ممول او زوج غنى
11- الامارات ودبى وممكن اعيش فيها شويه لو خدت البورد الامريكى
12- هو انا لسه فى ال12 وانا اللى كنت فاكره نفسى مجهزها امنياتى كلها سبحان الله / أكيد نفسى اخلص حفظ القرأن الكريم كل ما احفظ شويه انشغل واكسل
يارب يا قوى  يا معين اهدنا للقرأن الكريم

13- احضر حفله لايف لعمر خيرت ياسلام ومستعده فى اى مكان
14- ساقيه الصاوى مش زياره بس  لو عشت فى القاهره مستقبلا (لا قدر الله ) هشترك فيها وهروحها زى الادمان بتاعى للنادى اللى بزوره هنا حاجه غير طبيعيه
15- بجانب مكتبتى الجديدة (اللى عملتها الحمد لله اخيرا ) لسه فيها صفين بدون كتب عايزاها تتملى كتب والاهم الاقى وقت ومود اخلصها قرايه واعيش واشترى كتب كمان وكمان ياسلام على دى هوايه  وحياه
16- مابعد الدبلومه الواحد فقد حماس الدراسات العليا بس لو ربنا قدر ممكن اذاكر للبورد الامريكى او للزماله فى نيه لكدا
17- باريس والشانزلزيه واللوفر واللوحات يالله على الامنيات (الى مانعنى هى الفلوس طبعا )
18- بالنسبه لعمر انا صرفت نظر نهائى عن تسميته عمر اصلا اللى مضحك فى الموضوع دا ان كل من هب ودب اعرفه او من اصحابى سمى ابنه عمر فخلاص يا ابنى لو ربنا اراد وبقى عندى ابن مش هيكون عمر هيكون اسم تانى خالص لن اقوله لاحد .  انتهى
19- انا مشتركه فى حزب فعليات لكنه للاسف ليس بالاختيار اللى ارضانى ...مصر القويه لم تستطيع تحقيق جزء بسيط من اقتناعاتى لو ربنا سهل لكل اصحابى المتوافقين معايا وزيي مشتركين فى احزاب اخرى وتكون تجمع مختلف يجمعنا كلنا نحن المتوافقين افكاروسياسيا  هكون فيه على طول وممكن اترشح فى انتخاباته الموضوع دا مطروح للمناقشه من بعد تواجد التجمع السياسى دا الاول
20- شقه على النيل  ايوا النيل ان شاء الله فى الدور الاخير المهم على النيل وفى محافظتى حلم وامنيه مهمه الحقيقه ليا
ممكن يتقال عليه حلم العمر كله تبص من البلكونه تلاقى النيل فى وشك ياسلام
او البحر وشاليه عليه وخلاص ممكن لو موضوع النيل دا ما أمكنش
21- احيانا بفكر انى لو استمريت صيدلانيه يعنى وما غيرتش الكارير دا ( دا وارد جدا ) انى افتح صيدليه زى العزبى او دلمار وعطالله
( افتكرت دلوقتى د: كمال صبره - أين أراضيك يا رجل يا محترم ؟ أين أنت يا صيدلى ؟

22- اخد دروس وورش عمل لكتابه القصه القصيره والمقالات انا محتاجه افكار زى دى ( بس هنروح من المنيا فين؟)
23- عربيه خاصه بى كنت زمان بقول هاتشباك لا دلوقتى عايزاها عاديه بس حاجه محترمه زى BMW او جيب والحقيقه لان مافيش نيه لتعلم السواقه هتبقى عربيه بالسواق بتاعها حتى اشعار اخرلتعلم السواقه تطليع رخصه سواقه

كدا فاضل تحديدا 9 امنيات هستكملهم فى وقت تانى لما افكر فيهم كويس من 32 امنيه حصيله العمر كله وكل سنه وأنا أحسن مما أنا
ان شاء الله تعالى

من الاول الدايم : لو الناس تسيب كل واحد فى حاله وتبقى صباح او مساء الخير يا جارى انت فى حالك وأنا فى حالى
بدون ليه وازاى وأمتى ياسلام على الحياه أد ايه هتكون سهله  ومريحه وتمام
ولكنها الحياه مثلك بالضبط
مذنبه وبريئه


هناك 6 تعليقات:

الازهرى يقول...

على كده إنتى اكبر منى بيومين ؟؟؟؟

كل سنة وإنتى طيبة :)

سعدية يقول...

كل سنة وانتى طيبة يا جميل :)

على فكرة احلامك متواضعة جدا ومش محتاجة كام مليون ولا حاجة علشان تتحقق :)

وكمان انا مش موافقة ان المكتبة تبقى غالية :) ليه مش اى حد يدخلها
انت ممكن تفكرى فى طريقة تحدد وتحصر الناس اللى بتدخل وتخليهم بس المهتمين بالكتب :) بطريقة غير الفلوس خليكى اشتراكية :)

يارب تحققى كل احلامك يا جميلة الصعيد وربنا يجعل عمرك كله سعادة وفرح

بسنت يقول...

الازهرى
وانت طيب وبخير
هههههه ماشى
بس يا فندم يوم 18 ابريل دا يوم ميلاد اعز اصدقائى وكل الكلام اللى فات معاها وليها تحديدا هى دى تهنئتى ليها اما عنى فأنا مواليد شهر العظماء شهر مايو القادم ان شاء الله

بسنت يقول...

سعديه
ايه الزياره الجميله دى يا فرويده العزيزه وانتى بصحه وسلام
انا بقول كدا بردوا ان احلامى متواضعه ولكنها الحياه
موضوع المكتبه دا محتاج تمويل فعلا لان اسعار الشقق والمحلات هنا غاليه جدا بس موضوع تحديد نوعيه المشتركين لو عندك افكار ماشى قوليها- المشروع دا كان تخطيط لمشروع جمعيه وفشلت الاولى فرسيت على مكتبه محترمه = مجرد تخطيط

الازهرى يقول...

إوعى تكونى برج الثور ؟؟؟

وربنا أزعل :(

بسنت يقول...

الازهرى = نعم هو الثور تماما