الثلاثاء، 1 نوفمبر، 2011

كلنا مينا دانيال


 كل ما أشوف صوره  للمصرى الاصيل الثائر رحمه الله عليه
 مينا دانيال بفرح بيه أكتر
الابيات التاليه كتبتها علشانه  عقب وفاته فى مذبحة ماسبيرو
أيام 10 و11 من أكتوبر 2011
                    _______________________


يا أم خالد يا أم مينا أصبرى
دا أبنك مات علشان يتكتب لبلده ميلاد جديد
أفرحى دا أبنك بنحتسبه بدمه عند ربه فى التاريخ شهيد
عوضك عند ربنا دا حسابه للظالم فى أخرته شديد
وللى بيهدم وقفتنا واللى بيهدم ثورتنا
الهيبه مش بالقتل
مش برصاص وحديد
الهيبه بشرعيه وعدل عنه ما تحيد
لسه فاضل يا أم كل واحد فينا
شباب كتير مستعدين وبحياتهم ليكى يمدوا الأيد
علشان كلنا مينا دانيال
كلنا خالد سعيد

من بعد الدم الطاهر ما سال فى الميادين والشوارع والحارات
من بعد الشهيد اللى سقط فى التحرير والعباسية وماسبيرو والسجون والثكنات
من بعد تلفيق التهم وزرع الفتن وشعب طيب بيصدق كلام الاذاعات
ماعدش ينفع سكات ماعدش ينفع سكات
قدامكم طريق حرية واحد بيشاور لكم
فيه مش مفروش لكم لا ورد ولا أمن ولا بتوزع فيه دولارات
وأخره برلمان ورئاسه هى الانتخابات
ياولاد مصر يظهر تمن نجاح ثورتنا غالى أوى ولسه هندفعه لحد الممات
فوقوا بقى ماعدش تنفع فرقه من تانى واختلافات
دا الوقت بيجرى مع نظام ظالم فى أيده حكم ومدرعات
فوقوا بقى دا اللى جاى أصعب كتير من كل اللى فات