الأحد، 21 أغسطس 2011

القاهرة كمان وكمان

بداية :  بالامس كان اللقاء التدوينى الخيرى الثانى ليا  20 رمضان 1432
الموافق 20 أغسطس 2011 الدعوه جاتلى من أخى العزيز ضياء أحمد بجانب أنى عرفت أن داليا قوس قزح صاحبة المبادره كالعاده وطبيعى نويت أنى
هسافر أحضره بس كان فى طبعا صعوبات من الاسره كالعاده بردوا
علشان جو القلق من البلطجيه المنتشره على الطرق عندنا بالصعيد للقاهرة
بجانب الحوادث اللى بنسمع عنها ونشوفها بجانب أن رمضان السنة دى أكثر سخونه والصيف والحر وأنا والظروف دى مش حبايب
المهم أنى نويت أنى أشارك فى لقاء أبو الريش الخيرى بمستشفى الاطفال
اليابانى لأنه لقاء خيرى أولا وفيه دفعه لأخذ ثواب جماعى بجانب رؤيه ثانيه وتعارف أكبر لمجتمع أنضم ليه وهو المدونين وفرصة لرؤيه الافكار
 المتشابهه والمختلفه على أرض الواقع

القطار : قررت أسافر وكالعاده بردوا فى القطر علشان التكييف أساسا وعلشان هو وسيلة أمنه (لحد كبير ) وعكس المعتاد لم أجد تذكره قطر وأنا فى المحطه بس النيه خلاص كانت موجوده أنى أسافر وقلت هجرب أركب بدون تذكره وأقطع تذكره بالغرامه المهم أركب القطر (ودى لأول مرة فى حياتى أعملها وبناءا على نصحيه ضياء بردوا ) قعدت أنتظر القطار وكان فاضل على ميعاده نصف ساعه قابلت فيها بنت (ماجده) قعدت جنبى فى المحطه أتعرفت عليها وطلعت مدرسه وقعدنا نحكى وعجبتنى جدا جدا وكانت مسافرة لوحدها زى حالاتى وقررنا نقعد مع بعض فى نفس العربة بصرف النظر عن ارقام التذاكر
وإن القطر بسلامته يوصل فى الميعاد أبدا أتأخر ساعه كامله
ودا معناه أنى هوصل متأخر عن الميعاد الرسمى للتجمع ساعه على الاقل
يالا المهم أنه وصل بالسلامه وركبناه واستمرت المناقشات بينا وطلعت رايحه تقدم فى دراسات عليا بجامعه القاهره لأنه طبعا جربت تمهيدى بجامعتى الغير عزيزه بالمنيا وقاموا معاها بالواجب خلوها تفكر تسيبهم وتروح القاهره
ودى أقل حاجه بتعملها الام ناكره أولادها فيهم لأنى سبق لى نفس المحاوله
وفضلت جامعه أسيوط عليها لأنها الاقرب عن القاهره
وخلال الرحله اتعطل التكييف (السبب الاول لركوبى القطر ) فقمت وماجده ورحنا عربه تانيه بالقطر بس جلست كل واحده فينا على كرسى مختلف لان العربه كان مزدحمه عن الاولى وجاء حظى بجانب رجل كبير سنا  ويقرأ القرأن
وأنا كنت خلصت جزء وبدأت فى التانى خلال الرحله وبالانتهاء من معظه توقفت
عن القراءه وما عرفتش انام كمان فرحت لاقيت الراجل بيقولى أنتوا الشباب
المسلم أملنا (الرجل كان ملتحى بالمناسبة ) ولازم تشاركوا فى الانتخابات
والاخوان هتنزل القايمه لازم تقولى لزمايللك الشباب واللى فى سنك وكل اللى معاه بطايق انتخاب
قولتله حضرتك انا شاركت فى الانتخابات قبل كدا ومعايا بطاقه ومعظم اصحابى معاهم
المهم الانتخابات والقوايم تكون معتدله
سألنى خريجه أيه وبشتغل فين وعرفت أنه أستاذ بكليه طب جامعه اسيوط وزوجته استاذه فى كليه صيدله جامعه اسيوط بردوا (صدف غريبة ) المهم  طبعا عرفت أنه أخوان مسلمين وقالى عاجبك يعنى المثقفين وكل الناس دى اللى عايزه تعمل ألتفاف على اراده الشعب (قصده نتيجه الاستفتاء)  مره بالدستور أولا ودلوقتى بالمبادئ فوق الدستوريه قلتله حضرتك أنا قلت لأ بالاستفتاء بس مع اراده الشعب وان الانتخابات تكون أولا وشايفه ان المبادئ الفوق دستوريه فيها مبادئ كتير كويسه جدا  بس مش فيصل واحد اللى يكسب فى الانتخابات بردوا  (مش اخوان ولا ليبراليين ولا مسيحين) وضحت الجمله دى لازم الكل يشارك وقعد يقولى على الدوله الاسلاميه وكل الاسطوانه دى ولما قلتله على الرساله اللى جاتلى بأن الشيخ الفولانى بيفتى نقول نعم قالى استنى أوريلك رساله جاتلى بردوا أن الكنيسه بقول نقول لأ قلتله لو الطرف التانى شرير أو وحش ليه أنا ما أكنش أحسن منه وما أتبع أسلوبه
قعد يشرحلى أن طريق الحق لا يحتمل وسط يا معاه يا ضده وحكاللى قصص جميله الحقيقه عن مواقف للصحابه رضوان الله عليهم وعن الرسول عليه الصلاه والسلام
القصص هى اللى طلعت بيها من المناقشه لأننا كنا وصلنا الجيزه بالنهايه دى بس أنا ما كان عندى الحجج القويه للتمادى فى المناقشه لأقناعه بأرائي اللى مختلفه مع مفهومه الحقيقة

أبو الريش : وصلت متأخر جدا لدرجه أنى قابلتهم عن البوابه بس المهم أنى خدت بركه الزياره وكانت فى أستقبالى الحقيقه المره دى وصاحبه أجمل صحبه ميس رشا عرابى (أخيرا وجها لوجه )وكان معاها منار (بيطريه ومش بأيدى) ومروى (الزهره البريه ) وشفت أخيرا بردوا  أخى العزيز ضياء أحمد   وصاحبة الخير داليا قوس قزح
ومامه يوسف الطيبه (فاطيما ) والمفاجأه كانت لما داليا قالتلى أنى أبعد مكان لمدونين حضروا بعد المنصوره وهو وليد الزهيرى كمان موجود يا محاسن الصدف الجميله
وأقترح الاستاذ خالد (همس الاحباب ) نروح نفس مطعم السنه اللى فاتت
(طيب ليه يا جماعه كدا بس ) أبو العز أفندى ( وطبعا رشا عرابى أقترحت نفس فطار السنه اللى فاتت فراخ ) اللهم ألطف بينا
فى المطعم أتعرفت بردوا وجها لوجه على ريم سعيد  ( دى كان نفسى أشوفها من بعد تعارف الفيس بوك ) وكيارا ( عالم مولان )  اللى ما كملتش معانا فى قعده البورصه وسلمت على الاستاذ شيرين الكردى وكان أفطار جميل الحقيقه مش علشان الاكل طبعا ولكن علشان الصحبة الجميله وضحكنا كتير فى الفطار
كان حاضر شباب مدونين كتير أشكالهم مألوفه عليا بس مش عارفاهم
ولكن لا أنكر أنى السنه دى كنت أكثر انفتاحا واتعرفت على شله كويسه بس كدا أوعدكم على  المره الجايه هكون عرفت واتعرفت على غالبيه اللى بيحضروا اللقاءات دى
البورصة : بعد الافطار قرروا يروحوا نقعد على قهوه المثقفين الشهيره بالبورصه فى وسط البلد وأنا الحقيقه أسمع عنها بس دى أول مره أروحها
وانبسطت جدا أن الحمد لله كان فى جامع قدامها فصليت المغرب ولحقت العشاء جماعه كمان (وإن كنت زعلت أن يكون الجامع قصاد الناس والشباب قاعدين عادى جدا والصلاه قائمه يا مسلمين )
المهم رجعنا للقاعده كانوا قاعدين صفين طوال قعدنا بقياده رشا عرابى على اخر الصف  فطبيعى كان كل جروب متعارف بيحكى مع بعضه  وكان فى انفصال تام بين اول الصف وأخره لبعد المسافه بين الصفين المتواجهين المتوازيين
وان كان اللقاء دا فى البورصة كان فرصه للتعارف اكتر من كدا وكنت بفكر ليه ما يستغلوش لقاء زى دا ونعمل حاجه اكتر افاده من مجرد القاعده من بعد المناقشه مثلا دا اقتراح قائم وكانت قعده ظريفه وهى الحقيقه شارع اكتر منه قهوه واشتغلت المناقشات وخلصناها أو قطعتها أنا علشان ما نتأخرش عن كدا (أنا فى غربة بردوا )
وكان يوم جميل بحمد الله  ربنا يتقبل


الصوره اهداء خاص جدا للمصرى (أحمد الشحات) صاحب أشجع
موقف لتسلق عماره السفاره الصهيونيه ونزع علم الملعونه
ووضع علم بلادى الحره
 عاشت مصر وعاش شبابها
اللهم أكتب لى فى طريق الجهاد طريقا

هناك 17 تعليقًا:

د/دودى يقول...

حمد الله على السلامه الاول و قبل اى حاجه....مكنتش اعرف بموضوع الفطار ده و الله فكره كويسه جدا التعارف الحقيقى بعيدا عن العالم الافتراضى...

لاحظتى الاخوان و اساليب الدعايه الجديده ؟؟ باليد من شخص لشخص نفسى التيارات التانيه يكون لها نفس الحماس و التواجد..

بسنت يقول...

الله يسلمك
متهيألى يا دينا كنت بعتالك دعوه على الفيس بوك ابقى راجعى الدعوات كدا
وتتعوض المره الجايه ان شاء اله هما قالوا احتمال يكون فى تجمع تانى بعد 3 شهور

هنا بالصعيد حزب العداله والحريه الاخوانى
وحزب النور السلفى عاملين شغل جامد جدا
بس مش عارفه قصدك ايه بالاساليب الجديده

ســـــــهــــــــــر يقول...

رمضان كريم .. القاهره نورت

فتاه من الصعيد يقول...

حمد الله ع السلامه .... واسفه على عدم تلبيه دعوتك ..

بس انا بروح القاهره بالعافيه علشان الدراسه .... ويادوب شهر رمضان اجازه وكده :)... انا بروح الكليه بالعافيه اصلا :)

بسنت يقول...

سهر
ايه الزياره الجميله دى كل سنه وانتى طيبه
والله يسلمك والقاهره منوره طبعا بأهلها الطيبين

بسنت يقول...

مروى
طيب شدى حيلك فى الدراسه هى الاهم
ورمضان كريم يا ستى نحب نشوفك فى تجمع زى دا أنتى ود: دودى المره الجايه

ابراهيم رزق يقول...

حمد الله على السلامة
و القاهرة نورت
و كويس انك وجدتى تذكرة
مرة خضت التجربة من الاقصر و لم اجلس الا فى بنى سويف
اسلوب دعائى مكشوف من الاخوان و انا حتى الان لا اعرف سبب اعتراضهم على وثيقة المبادىء فوق الدستورية الا اذا كانوا واثقين من فوزهم فى مجلس الشعب و عاوزين دستور على مزاجهم
تشرفت بزيارتك مدونتى
تحياتى و تقديرى

قوس قزح يقول...

و الله انتى نورتنا بحضورك و الواحد بيفرح اوى لما بيلاقى ناس تسافر مسافة كبيرة كده علشان تشارك فى الخير
و الخير مش بس ابو الريش لكن كمان انك تتودى للناس و تحبى تتعرفى عليهم
لان فعلا الاصدقاء دول نعمة من نعم الله علينا

عقبال كل سنة و انتى معنا يارب و يكون انطباع دايما عن الرحلة جميل كده
بس المرة الجاية هنغير اكلة الفراخ دى :))

شمس النهار يقول...

مااستغربتش من حوارك في القطار
مصر كلها هتدخل في نفس الحوارات دي قريب
وهتقوم حريقة علي تويتر والفيس والمدونات وفي كل حته

بس في النهاية الله غالب علي امره

طبعا زعلااااااااانة اني ماجتش بس ملحوقة ان شاء الله
الانفلونزا قاتلها الله

:))

!!! عارفة ... مش عارف ليه يقول...

مش معقووول

أنت كنت موجودة ؟

بجد بجد زعلت إن الظروف مسمحتش إني اتعرف عليك عن كثب :((

على العموم اليوم كان جميل فعلا

بالرغم من إن القعدة في البورصة مسمحتش لأول الصف إنه يتعرف أكتر على أخر الصف

وكل سنة وأنت طيبة بسنت

وليد الزهيري

بسنت يقول...

ابراهيم
الله يسلمك وزى ما قلت لسهر مصر منوره فعلا بأهلها
انا احب المغامره ومش بخاف بسهوله الحقيقه وكان عندى استعداد أقف عادى جدا بس فى الاغلب لو حصلت معايا زى المترو كدا بحطشنطه السفر فى الارض واقعد عليها عادى بس المهم عندى كان الحر لانى بتعب جدا منه
والحقيقه انى اللى بسعد بزياره مدونتك جدا مبهجه ودمها خفيف جدا
كل سنه وانت طيب

بسنت يقول...

داليا
الحقيقه انا اللى بستفيد من الزيارات دى اينعم كل مره بيزداد تعارفى لعدد صغير من كل الحضور بس المره دى كانت غريبه ومختلفه فعلا بدايه من القطر حتى لغايه يوم رجوعى كانت زياره كامله وفسحه ممتازه
وانا اللى بتعتز وتفرح حقيقى برؤيتك يا داليا
كل سنه وانتى صاحبه الخير ومتجمعين على حسك دايما

بسنت يقول...

شمس
الحقيقه انا تعبت من الحوارت نفسى نتفق ونرتاح شويه هدنه من الاساليب دى بقى

واتمنى المره الجايه اشوف حضرتك والف لا بأس عليكى

بسنت يقول...

وليد
الحقيقه بقى أنا شفتك كويس جدا عند بوابه المستشفى مع داليا بس كنت موجوده وبتعرف باسمى الحقيقى رضوى
وفى البورصه وما شفتك نهائى فى القعده دى بس كدا فهمت أكيد كنت قاعد فى اول الصف وانا كنت فى الشارع
ههههه أخر الصف خالص مع حزب حفيده عرابى ( رشا )
ولانى سلمت على الاستاذ شيرين جنب داليا وانا ماشيه شفت بقى فايده البرنامج اللى كنت بنوه عليه قبل اللقاء لازم يكون فى برنامج تعريفى يعنى ينفع مش تعرف أختك بعد كل المعرفه التدوينيه دى بردوا
مش ممكن انسى يا وليد انك سبب تعرفى بداليا ومعرفه اللقاءات دى ومن ثم تقريبا كل الناس اللى عرفتها من السنه اللى فاتت على ارض الواقع وتدوينيا فعلا
وان شاء الله تتعوض فى لقاء قريب
كل سنه وانت طيب

Mohamed Amer يقول...

http://isismylove.blogspot.com/

جايدا العزيزي يقول...

☻/ღ˚ •。* ♥♥ ˚ ˚✰˚ ˛★* 。 ღ˛° 。* °♥ ˚ • ★ *˚ .ღ 。
/▌*˛˚ عــــــيــــــــد ** فــــطــر ** مــبـــاركــــ˚ ✰*

بسنت يقول...

محمد عامر
جايدا العزيزى

شكرا على الزياره الكريمه
وعيد سعيد