السبت، 6 أغسطس، 2011

طيب ... يسقط يسقط حكم العسكر

فى حرب ميدان التحرير اللى بين الشباب الثائر المتحمس وجنود الأمن المركزى
والشرطة العسكريه وكل جنود نظام مبارك اللى ماسقطش واللى واضح من محاكمته
التاريخيه التى صنعها الشباب أولا والشهداء ومن ثم كل طوائف الشعب
من المحاكمه دى أتضح لى أن اللى سقط هو مبارك شخصيا وبعض رفاقه لكن أركان نظامه  قائم تمام جدا
وماشيه على الطريق المعوج بتاعه

يعنى معركه العباسية وقلت  غلطه كمان وتحامل ونعديها ولو أن بعد سقوط الشهيد
محمد محسن المفروض ما تتعداش نهائى من الذاكره ولا من محكمه التاريخ والثوره
أو حتى قانون الغدر أى شئ قانونى ياخد حق وقصاص عادل وبردوا تتكرر تانى
يعنى أفطار يوم الجمعه 5- 8 تحديدا أنا كنت معزومه فيه ورايحاه لولا عدم أتفاقى
مع الزميلات المدونات  ما كنش فاتنى أبدا
بس البركة حصلت للمدونين وبعض المدونات والناشطين أجدع شباب فى مصر
وراحوا تقوم بردوا المهازل تانى تتكرر وعصى تانى وضرب تانى
وإهانه تانى يعنى لو ماكناش فى رمضان يا مسلمين يا مصريين يا
أى حاجه كنتوا عملتوا فيهم أيه؟
يعنى شاطرين بس نقول بشار بيموت فى شعبه القذافى بيموت فى شعبه
طيب أهو المجلس العسكرى وبأوامره بيهزأ ويهين ويضرب فى شعبه
يعنى إذا كان الانسان مش هيعيش بكرامه وحريه  يبقى الموت أشرف له فعلا
لا حول ولا قوه إلا بالله ليه بس كدا ليه؟
الصور اللى موجوده على النت من الناشطين المصابين والبنات
اللى اتضربت حاجة تخلى الحجر ينطق
وباقى الشعب طبعا مش عاجبه بس شاطرين يقولوا المحافظين أتغيروا الوزراء أتغيروا محاكمه مبارك بقت علنيه طيب يا مصريين ومين السبب فى دا كله
مش ثوره يناير بس دى كانت مجرد خطوه لسقوط ديكتاتور
  لكن بسبب الأعتصام واستمرار مظاهرات الشباب والناشطين اللى بينضربوا دول
فى التحرير فى كل تجمع (إفطار بقى ) مظاهره سلميه أى حاجة تعلن أن ثورتنا لسه ما خلصتش والفساد لسه ما أتهدش علشان نهدأ يعنى  لسه باقى المطالب الرئيسيه
العداله على أقل تقدير العدل فين؟
أنا شخصيا ما شفتش لا ثوره ولا يحزنون حتى هذه اللحظه بدايه من الموظفين المرتشين اللى بشوفهم يوميا أنتهاء بسياسات مديرين فى كل مديريه فيك يا صعيد مصر أتغير أو حتى غير أسلوبه أو حتى أختشى وعرف أن فى حاجة أسمها حساب
على العموم هى جمله مش عايزه أقولها من زماان بس خلاص كدا
طفح الكيل
ويسقط يسقط حكم العسكر
 لو إمبارح يكون أفضل

الصوره دى من تمبلر ضى أحمد
ويا مصر هتعيشى مطيه
إذ يحكمك دبوره وكاب

هناك 4 تعليقات:

شمس النهار يقول...

اصحابي اللي راحوا اتبهدلوا اخر بهدله
بعد الفطار وصلاة المغرب سابوهم يفطروا واول ما الهتافات ابتدت ويسقط المشير ابتدوا يضربوا فيهم
الست منهاره تماما
احنا كده ولا ايام اللامبارك
واللي هيفتح بقه هيضرب
ربنا يستر

بسنت يقول...

شمس
ماكنت هقول ابدا يسقط المشير كنت هطالب بتنفيذ باقى مطالب الثوره
كان تجمع مش أكتر وكل واحد كان هيروح لحاله بعد الفطار
ليه بيعملوا فينا كدا ليه؟
لا حول ولا قوه الا باله العلى العظيم وحسبى الله ونعم الوكيل فيهم العسكر والمشير

فتاه من الصعيد يقول...

ربنا فوق كل ظالم .... دول يومهم كبير

بسنت يقول...

مروى
ان شاء الله الخير قادم والعدل لان اسمه العدل
الصبر طيب بردوا