الأحد، 24 يوليو 2011

الشعب يريد إسقاط النظام


بداية : بعد طرحك م الحساب
للعساكر والكلاب
والارانب
والفيران
والاجانب
والغيلان
والارايل
والقرون
والمرايل
والدقون
اللى فاضل يا أفاضل
هو دا تعداد وحصر
للعيال اللى جابتهم
ف الحلال الست مصر(1)

 عارفه أن الثورة لسه ما أكتملتشى بس حصلت ومش حلم
 ولسه قدامنا كتير علشان تكمل ونتكلم فعلا عنها
والتاريخ بيقول كدا والمحللين بيقولوا كدا
بس مش معنى كدا أننا نسكت ونقول كل 30 سنة وإحنا طيبين
الميدان هو المكان الوحيد اللى تقريبا كل المصريين أتفقوا عليه
مليونيه أو فئويه أو حتى مضاده متفقين أنه المكان المناسب

والمسيرات منه لأى مكان تانى (وزاره دفاع - قصر جمهورى - وزارة التضامن الاجتماعى إن شاء الله للهايد بارك فى حديقه الازهر )مادام المسيرة سلميه ومش تعطل أى شغل أى مصلحه (علشان الحجج المضادة )
وعجله الانتاج ما تقفش(على أساس أنها كانت بتجرى) 
 يبقى أيه المشكله؟

من حق الجميع التظاهر والاعتصام  القانون والثوره والانسانيه بتقول كدا
بس مش بتقول أننا كمصريين نخون بعض أنا ضد التخوين خاصة لما يجى من
المجلس العسكرى وكمان بيان رسمى لا كدا الزلات بقت رسمى

أنا مش ضد المجلس العسكرى كحاكم لفتره أنتقاليه ولكنى ضد لكل
ديكتاتور يظن نفسه أله أو فرعون على الأرض
ربنا خلقنا أحرار أينعم فى قانون (لو فى يعنى ) يمشى على الكل
(المفروض يعنى ) بس كل راعى مسئول عن رعيته مسئول
 وليس واصى يوجه مش يعمل ثوره مضاده
يفرق أيه الوضع دا عن موقعه الجمل عن كل الثورات المضاده لفلول الحزب الوطنى 
وكل أحزاب أو أحباب الرئيس المخلوع 

ثوار مصر الشرفاء ( أعضاء حركه 6 أبريل - الجمعية الوطنيه للتغير - شباب الجبهه الوطنيه حتى شباب الاخوان وأعضاء حركه كفاية 
ومؤسسين وأعضاء جروب كلنا خالد سعيد)
مين يقدر ينكر دورهم فى الثوره
وهو مين أصلا قام بالثوره ودعا للمظاهره يوم 25 يناير غيرهم
إذا كان على ضربه جويه قعدتوا تزلونا بيها 30 سنه
يبقى دول حقهم ياخدوا علينا وصلات أمانه حق اللى عملوه علشانا
حق كل شهيد دمه الطاهر راح هدر ولسه ما أتحاسبش عليه
لسه قصاصه ما رجعش

أزاى المجلس العسكرى يزايد على أنتماءهم ووطنيتهم ويتهمهم
وكمان توصل للبلطجيه والحصاروالضرب عند ميدان العباسيه
لا كدا كتير وربنا مايرضى بالظلم

حسبى الله ونعم الوكيل فى كل واحد أفترى على ثائر شريف
أخواتى فى الميدان أنا ضد أى دعوه للانقلاب على المجلس العسكرى
لأننا فى حما جيشه حاليا وكدا هتبقى هد المعبد على اللى فيه
بس ضد أى تخازل منكم أستمروا  على مطالب 8 يوليو  الثوره أولا
لازم نتجمع تانى بأى شكل
ومطالب الاسلاميين لجمعه 29 يوليو لو منفردين يبقى أنتوا اللى بتبيعوا
بالرخيص جدا لازم تقفوا مع أخواتكم وكفايه تربيطات ووعود
الشرعيه مستمره(الانتخابات أولا ) وتمت موافقه معظم المصريين على كدا
بالرغم من التحفظات على المرسوم الرسمى لقوانين الانتخابات
فى حاجات مهمه جدا وهى التعديلات الوزاريه والامن والشرطه
لأن بدونها يبقى مافيش حاجه حصلت

واللى هيبيع حاليا لنظام مبارك اللى ما سقطش
يبقى الدور جاى عليه
القوى قوى فقط عند الفرقه
وضعيف عند الاتحاد أمامه
فحتى لو نيه الغدر موجوده بوجودكم متجمعين هتستمر الثوره
فى مسارها الطبيعى للتطهير فعلا
ونجد مصر ديمقراطيه تسع الجميع
دا وقت وقفه مش وقت شعارات

أخيرا : مَن قال "لا" في وَجْه مَن قال "نعمْ"
مَن علَّم الإنسانَ تمزيقَ العدمْ
وقال "لا" فلم يمتْ وظلَّ روحًا أبديةَ الألمْ
معلق أنا على مشانق الصباح
وجبهتى بالموت محنية
لأننى لم أحنها حية (2)

----------------------------
1= مصطفى ابراهيم ( ويسترن يونيون شارع الهرم)
2= أمل دنقل (  كَلمات سبارتاكوس الأخيرة)



هناك 6 تعليقات:

sun of free dom يقول...

انا رايى ان المجلس العسكرى ملوش دعوة باللى حصل انبارح نهائى بالعكس هوا عايز يهدى الامور مش يشعللها

اهالى العباسية بنفسهم بيقولوا ان وجوه غريبة جداا تسللت على اسطح العمارات من وقت العصر .,.,., وبعدين عايزين تسقطوا المشير او المجلس العسكرى .as u like
اقعدوا فى الميدان وقولوا الشعب سريد اسقاط اللى انتوا عايزينه .,.,
ايه اللى يوديكوا هناك .,.,

واراهن حتى لو اتى مجلس راسى .. وحصلت بلطجة وامور مش تعجب ناس بردوا تطلعوا تقولوا يسقط يسقط .......,,

غير معرف يقول...

انا ضد نغمة التخوين اللى حملها بيان المجلس العسكرى ضد اى فصيل من فصائل الثورة ولكن ايضا ضد السب والشتيمة للمجلس العسكرى والجيش واللى بتحصل كل يوم وكل ساعة فى جميع ميادين الاعتصام فى مصر واللى مش مصدق يروح بنفسه ويشوف ويسمع

الاول كانوا بيقولوا المجلس العسكرى حاجة والجيش حاجة تانية لكن دلوقتى من جمعة 8 يوليو والشتيمة للجميع الجيش والمجلس العسكرى

لو عايزين يهدموا البلد يتفضلوا اهى بلدهم وبرضه حرية لكن الاول يشوفوا لنا بلد تانية نروح نعيش فيها

بسنت يقول...

sun of ffreedom
بدايه زياره كريمه
ثانيا متهيألى حضرتك ماقرتش كل مقالى لانى كاتبه فيه إنى ضد الانقلاب على المجلس العسكرى ولكنى اعتبره ليس فوق النقد لانه فى مقام الحاكم حاليا وحتى لو جاء رئيس جمهوريه من حقى وحق اى حد حتى حضرتك تقول ماتريد مادمت فعلا بتحب البلد دى وعايزها تكون احسن مش النقد لغرض النقد دى بدايه

ثانيا انا اقصد باسقاط النظام به اسقاط كل من له نفس طريقه النظام المستبد اللى كان متمثل فى صوره الرئيس المخلوع ووزراءه اى حد فى طريقته واسلوبه ولا يعنينى الشخصيات فالمجلس العسكرى بامكانه تغير طريقه معاملته معنا شعب وثوار والكف عن التخوين دا ما اقصده باسقط النظام كعنوان

اما اختلاف الناس عليه فدا شئ طبيعى ولكنى اريد ان نختلف ولا نخون او نضيع البلد ونعطى فرصه للبلطجيه تثبت ان الثوره لم تقم

بسنت يقول...

غير معروف
زياره كريمه بردوا
انا متفقه معاك ان فى حاجه غلط ولازم تتصلح ومصدقه اللى بتقوله لانه متواجد على النت وعلى ارض الواقع
نريد ضبط النفس والانتقاد لتحسين وتصليح كل ما يمكن اصلاحه علشان الثوره تكمل على خير

د/دودى يقول...

جمله حاسه انى بكررها كتير اليومين دول للاسف احنا موقفنا السياسى : ان ضهرنا فى الحيط !!...مفيش اختيارات كتير للاسف الا اذا حبينا نخش فى حسبه بريما تانى ...

انا رأيى اننا نصبر على جارنا السو لحد الانتخابات بمجلس شعب و ريس نعترف نتفاهم معاه لكن تقطيع الجيش مش الحل مع اتفاقى التام بالغباء السياسى فى حركه التخوين دى نظرا لان موضتها قدمت قوووووى

بسنت يقول...

د: دودى
ادينا صابرين صبر سيدنا ايوب
ربنا يصلح الحال