الاثنين، 20 يونيو 2011

فَاللَّهُ خَيْرٌ حَافِظًا


لازم كل بنت تتأكد أولا من قول الله الحق فى كتابه
فَاللَّهُ خَيْرٌ حَافِظًا وَهُوَ أَرْحَمُ الرَّاحِمِينَ
فربنا تعالى هو الحافظ فى الطريق فى الشغل فى البيت حتى وأنتى لوحدك
ولكن نظرا لأن المجرمين أولاد الشوارع- لأن وصف الكلاب دا لا يليق بهم الحقيقه
ولا أى حيوان خلقه ربنا لأن حتى للغابة قانون
أما ضعف البشر وشيطانهم فلا قانون عليه غير وعد الله أنه يحفظ من يحفظه
فوصيتى لكى الاول
 ألبسى اللبس المحترم المحتشم مش بقول نلبس جلابيه وعبايات أنا نفسى مش بحبهم أصلا ولكن ألبسى لبس كويس  مش لازق ولا يشف دى أهم حاجه
شيك بقى مش شيك أنتى حره المهم البديهات الكارينا الملزقه دى خاصه للغير نحيفات الصراحه شكلكم مقرف جدا فى عيونى أنا أمال بعيون مجرمين الشوارع هيكون أيه؟؟
البنطلونات الاسترتش الاختراع الغريب للمحجبه نفسى أعرف دا بيتلبس خارج البيت أزاااى بردوا وكمان قمصان النوم اللى بحمالات دى يتخرج بيها أزااى من أوضه النوم أصلا ؟؟  طبعا اللبس حريه شخصيه وأنا مقتنعه بكدا بس فى حاجه أسمها أداب الطريق والحياء المفروض يكون متواجد مادمتى هتنزلى الشارع أو هتركبى مواصلات بجانب أنك لما تحترمى نفسك ودا بسلوكك نفسه ولبسك الناس هتحترمك
واذا كان فى  الناس تحب البنت اللى بتتكلم وتهزر وتعلى صوتها فى المواصلات فتأكدى أنهم لا يحترموها وأنا عن نفسى أفضل يقولوا عليا معقده ومغروره ومش عايزه تكلم حد ولا تهزر عن يقولوا غير محترمه

الحاجه التانيه أبتعدى عن الشبهات وهى الاماكن اللى أنتى خايفه من تواجدك فيها لوحدك مهما كان المكان دا حتى لو بيت واحده من الاقارب
مجرد الاحساس الداخلى ( ودا أنا متأكده عند كل البنات والستات ) أن المكان دا مش أمان يبقى أنتهت المكان دا ما أدخلوش غير مع حد تانى
سواء شارع  أو محل أو أى مكان تانى وخاصه المواصلات
أنتظرى الروقان إن شاء الله تتأخرى بس سلامتك تستاهل كل شئ

الحاجه التالته لازم لو أنتى أم أو ليكى أخت أصغر أو صاحبه تانيه  تنصحيها وتوضحيلها يعنى أيه تحرش وتخلى فى مساحه صراحه بينك وبينها يمكن المشكله الكبرى عند أى بنت تتعرض للتحرش هى الخجل بس أعتقد لو فى مساحه صراحه الموضوع هيتحل وهتاخدى حقك

الحاجه الرابعه وأنت خارجه من البيت أقرى كل أدعيه الطريق والسلامه
ودا جزء منها  لو هتركبى أى مواصلات
( بسم الله ، الحمد لله ، سبحان الذي سخر لنا هذا وماكنا له مقرنين وإنا إلى ربنالمنقلبون  الحمد لله ، الحمد لله ، الحمد لله ، الله اكبر ، الله أكبر ، الله أكبر ، سبحانك اللهم إني ظلمت نفسي فاغفر لي ، فإنه لايغفر الذنوب إلا أنت )



( اللهم إنا نسألك في سفرنا هذا البر والتقوى ومن العمل ماترضى ، اللهم هون علينا سفرنا هذا واطوِعنا بعده ، اللهم أنت الصاحب في السفر والخليفة في الأهل ، اللهم إني أعوذ بك من وعثاء السفر وكآبة المنظر وسوء المنقلب في المال والأهل
ولما ترجعى بالسلامه تقولى هم تانى وعليهم  ( آيبون ،تائبون ، عابدون ، لربنا حامدون)
 
أدعيه يوميه وأنتى خارجه من البيت للشارع

(اللهم إنا نعوذ أن نشرك بك شيئا نعلمه و نستغفرك لما لا نعلمه )

(أعوذ بكلمات الله التامات من شر ما خلق)

(أعوذ بكلمات الله التامه من كل شيطان وهامه ومن كل عين لامه)

(اللهم أحفظنى من أمامى وخلفى وعن يمينى وعن شمالى ومن فوقى وأعوذ بك أن أغتال من تحتى )

(بسم الله الذي لا يضر مع اسمه شئ في الارض ولا في السماء وهو السميع العليم) 3 مرات صباحا ومساءا

(اللهم أنت ربي لا اله الا انت عليك توكلت وانت رب العرش العظيم ماشاء الله كان وما لم يشأ لم يكن ولا حول ولا قوة الا بالله العلي العظيم, أعلم ان الله على كل شئ قدير وان الله ق احاط بكل شئ علما. اللهم اني اعوذ بك من شر نفسي ومن شر كل دابة انت آخذ بناصيتها ان ربي على صراط مستقيم)

 وطبعا المعوذتين (قل أعوذ برب الفلق- وقل أعوذ برب الناس) وسورة الإخلاص  بردوا معاهم
 
الحاجه الخامسه خلى معاكى حاجه تحميكى رشاش محرق للعين 
 قطر من بتوع الورق ودا أنا شخصيا معايا لا يفارقنى فى الشنطه
واللى يقدر يشيل حاجه أخطر من كدا ما فيش مانع( دى مش دعوه لحمل أسلحه بس دى حياتك ونفسيتك وعرضك فجمدى قلبك شوية ) 

 

الحاجه السادسه لو لا قدر الله وحصل فعليا التهجم أو التحرش أو أى فعل مؤذى ما تخافيش فمعروف أن اللى أختشوا ماتوا فعلا
بس بردوا فى ناس تخاف ما تختشيش لازم ياخد جزاؤه لو من غريب يبقى على المركز على طول وتكلمى أى جمعية لحقوق المرأه أو مجلس حقوق المرأه بالمحافظه عندك  هى اللى هتقف معاكى مش عارفه تليفونات معينه بس لو عرفت هرجع أحطها فى البوست دا
لو من شخص تعرفيه يبقى تفضحيه وتاخدى موقف بعد تبليغ والديك

الحاجه الأخيره لازم تعرفى أنك زى الولد والكلام الفارغ بتاع البنت مش زى الولد
وأمثال الامهات بتاعه الهم للممات كلها راحت عليها خلاص
كلنا إنسان ليه حقوق وواجبات وحمايه وأمن إذا ما أتوفروش يبقى دى النهاية والموت أحسن فعلا
وربنا الستار يحمينا ويحفظنا جميعا


هناك 4 تعليقات:

موناليزا يقول...

تسلمى يا حبيبتى
موضوع مهم جدا
ونصايح فى الجوووون بجد

شمس النهار يقول...

الحمد لله انه جاي من شابة

علشان لما بنقول الكلام ده يتقال لنا اننا كبرنا وخرفنا
مااحنالابسين كويس اهو وهو كده مش احسن من مانكون سافارات

وبجد تسلم ايدك

عندما تبعثر رسائلك يقول...

http://fedkalemat.blogspot.com/

بسنت يقول...

مونا
شكرا لزيارتك التى تسعدنى دايما
----------------------------
شمس
وحضرتك شابه بردوا الفكر لا يكبر ولكنه فقط ينشط ويتجدد
شكرا لزيارتك المضيئه
-------------------------
رسايل
انا مش فاهمه حاجه من اللينك الحقيقه