الأحد، 12 يونيو، 2011

حبيبتى بتعلمنى أحب الحياة


حبيبتى من ضفايرها طل القمر
وبين شفايفها ندى الورد بان
ضحكتها بتهز الشجر والحجر
وحنانها بيصحى الحياه فى النبات
حبيبتى بتعلمنى احب الحياه
من حبى فيها حياتى شمس وربيع
والحب فى الدنيا دى طوق النجاه
لولاه يضيع قلب المحب الوديع
يا حلوه يا بلدنا يا نيل سلسبيل
بحبك انت رفعنا راسنا لفوق
لو الزمن ليّل ما يرهبنا ليل
شوقنا فى عروقنا يصحى شمس الشروق
الحلوه قلب كبير يضم الولاد
وزاد وزواده ومرسى وسبيل
الموت والأستشهاد عشانها ميلاد
وكلنا عشاق ترابها النبيل
حبيبتى من تنهدها حن الوتر
غنت سحر صوتها الشجر والنخيل
بتعلم النجم البعيد السهر
وساب سماه وسرح فى موجك يا نيل
حبيبتى غنوتها غيطان الحنان
شموسه صافيه نورها ما ينطفيش
فى حضنها بنرتاح ونلاقى الأمان
نعيشه حتى إن متنا ليها نعيش
يا حلوه يا بلدنا يا نيل سلسبيل
بحبك أنت رفعنا رسنا لفوق
لو الزمن ليّل ما يرهبنا ليل
شوقنا فى عروقنا يصحى شمس الشروق
للحلوه قلب كبير يضم الولاد
وزاد وزوادة وضله وسبيل
الموت والأستشهاد عشانها ميلاد
وكلنا عشاق
وكلنا عشاق ترابها النبيل

هناك 3 تعليقات:

يا مراكبي يقول...

أغنية من أروع ما يُمكن .. ومُطابقة للحالة الحالية جداً جداً جداً

ahmed_k يقول...

ما اجملك وما اروعك يا وطني
حتى الكلمات التي تكتب في حب مصر
يكون لها على النفس وقع السحر
فعاشت مصر وعاش شعب مصر

بسنت يقول...

باشمهندس أحمد
زياره عزيزه يا فندم

---------------------------
أحمد زكى
عاشت مصر وعاش شعب مصر العظيم
شكرا لزيارتك العزيزه