الأربعاء، 1 يونيو، 2011

ليهم... المجلس العسكرى

ليك رصيد عندى بيشحنه جيش بلادى ليك بإستمرار
نفسى أفهم غموض تصرفاتك نفسى أحل شفرة واحده
من بياناتك كله حروف  لأهل الكهف من الأسفار
أخرج لشعبك  وأعلن بحق عن محاكمات الكبار
أكشف عن نواياك وساند من تانى ميدان الأحرار
يا مجلس يا عسكرى عقلى بجد معاك أحتار
بناتك دول اللى أنتهكت حرماتهم ولا بنات الكفار
ولادك دول اللى بيتحاكموا عسكريا ولا ولاد الأشرار
أخرج وأعلن دا الوقت دى اللحظه المناسبة للأعتذار
أخرج وأعلن من تانى مساندتك للثوار
وإلا على جبينك هتشيل لباقى العمر وللتاريخ كله العار
بلاش  أرجوك تدق فى نعش ثقتى فيك أخر مسمار
ما تحطنيش تحت ضغط تانى
ماتحطش صبرى  تحت الأختبار
أرحم مصر أرحم أهل مصر أرض الشهداء الأبرار
وحذار حذار من غضبى
حذار حذار من نفاذ وقتى  ولعدلك الإنتظار

هناك 11 تعليقًا:

المتحدة لخدمات الانترنت يقول...

اللهم نجى مصر من كيد الكائديين ..
اللهم احفظها بعينك التى لا تغفل ولا تنام
http://www.un4web.com

سوبيا يقول...

قتها زمان..الجيش لا معانا ولا مع النظام السابق..الجيش مع نفسه


ربنا معانا

فتافيت يقول...

يا مجلس يا عسكرى عقلى بجد معاك أحتار
بناتك دول اللى أنتهكت حرماتهم ولا بنات الكفار
ولادك دول اللى بيتحاكموا عسكريا ولا ولاد الأشرار
أخرج وأعلن دا الوقت دى اللحظه المناسبة للأعتذار
أخرج وأعلن من تانى مساندتك للثوار

:
:( عندك حق فعلا

البِـئرُ والظمّأْ يقول...

جميله قوي
تسلم ايدك بجد

بسنت يقول...

سوبيا
ربنا معانا ان شاء الله
بس الجيش شئ والمجلس العسكرى
احنا معانا الجيش
المجلس العسكرى دا الوقت يقول هو مع مين

بسنت يقول...

فتافيت
زياره عزيزه
شكرا

بسنت يقول...

البئر والظمأ
حلو اوى الاكونت دا- الجنه والنار بردوا
شكرا ليكى

Zianour يقول...

صباح الفن

انا احييك على البلوج بتاع قراءاتي بجد..بس انتي ليه مش عاملة تعليقات فيه؟؟
اما ما يحدث في مصر؟؟؟ فانا تعبت بجد تعبت مت الخوف والرعب

صباحك جميل

بسنت يقول...

أمل
افهم من كدا انك مشاركه معانا فى 30 يوم تدوين ؟
يا ستى من قراءاتى بحب اخليها للتصفح والقراءه فقط لانى ايضا بزورها كأنى ضيفه فبحبها بدون تعليقات كأنها كتاب المختارات كدا
وزياره عزيزه جدا صديقتى الغاليه

قهوة بالفانيليا - شيماء علي يقول...

في كمية من عدم الوضوح في التصرفات و في موضوع بالونات الاختبار دي ..
انا كرهت موضوع بالونات الاختبار .. و كرهت الاخبار اللي تتنشر عشان ينفوها بعدين و يكذبوها ..
طريقة جس النبض دي غير مطمئنة بالمرة ..
عموماً .. هي بس المرحلة دي تعدي على خير و بعدين هنشكر المجلس كله .. بس يعدوها !!

بسنت يقول...

شيماء للاسف قد لا نشكره لأنه للحظه دى لسه فى اهانات غير مقبوله منهم فى صوره فض اعتصام سفاره الصيون لا يمكن نسياناها ابدا- نفسى فعلا عصر مبارك المهين دا ينتهى - لكن أمتى؟ العلم عن ربنا بقى