الاثنين، 16 مايو، 2011

عربة السيدات




وأنتظرت فى المحطه قدام فقط .... للسيدات
هى عادتى فى المترو أقف مايهمنيش
المهم وسط البنات


أنبسطت أوى ما أنا مسافرة بدون
وعود لأحد بمكالمات أو حتى زيارات


حرة أنا فى بنت المعز ودايما ليا فى شوارعها الذكريات

وفى عربة السيدات وقف الصغير ينادى ويعلى الصوت
يبيع كتاب للترجمه يبيع أقلام وللمكتب مستلزمات
عجبنى الكتاب بس أترددت أنى أشتريه
ولما قررت كان الولد بدوره فات


وصلت محطه سعد زغلول ما هى المحطه المقصوده
للأعتصامات


هناك قالوا مجلس الوزراء
هناك قالوا هنلاقى لمطالبنا أستجابات


كام صيدلى على كام طالب والباقى عدد محترم
من الصيدلانيات


كانت وقفة جميلة كلنا قلنا مش وقفه وفئوية
هى دى حقوق شرعية لمستقبل آت


خلص اليوم وأنا كملت مع الاسكندرانيه أجدع بنات

رحنا الميدان وشفت مجمع التحرير
وفى مخى كلمات ومن أصدقائى عن الثوره حكايات
وكالعاده أشتريت من المكان هدايا لأبناء الأخوات


كملت لوحدى أنا فى المتحف المصرى اللى كان
فى باللى زيارته من عهد مات
عهد اخر رحلة فى زمن الطفوله والابتسامات


لفيت فيه 3 ساعات لولا التعب كنت كملت كمان
وما زهقتش ابدا
حد يقدر يزهق من عراقه الحضارات


ورجعت تانى فى المترو اللى هو أأمن المواصلات
وطبعا ركبت بردوا عربة السيدات
--------------------------------------
الاستعداد للمشاركة فى حمله شهر يونيو 30 يوم تدوين

هناك 9 تعليقات:

zoza_queen يقول...

روووووووعه سلمت اناملك ^_^

فتاه من الصعيد يقول...

حمد الله ع السلامه ..

وكل اعتصام وانتي طيبه :)

norahaty يقول...

جولة حلوة
اخدتنا مــعاكِ
فيها :اغبطك عليها

الازهرى يقول...

يسقط الصيادلة
دى الكلمة المنتشرة حاليا فى نقابة العلميين
ردا على طلب الصيادلة منع العلميين من أخذ اماكنهم

نفسى أفهم المصريين عايزين إيييييه ؟

بسنت يقول...

zoza
زياره اولى عزيزه
شكرا ليكى

بسنت يقول...

مروى
وانتى طيبه يا ستى
دا اعتصام لا راح ولا جه فى خطوات تصعيديه اكبر لما نشوف اخرتها ايه

نورتى المدونه

بسنت يقول...

د:نورا
زياره اولى عزيزه
شكرا ليكى
وهى كانت جوله فعلا ممتعه

بسنت يقول...

الازهرى
أنت علوم ولا أيه؟؟
يعنى ينفع تقول زيهم يسقط الصيادله بردوا طيب لو سقطنا هتلاقى علاجك فين؟؟
انا بعائلتى اثنين دكاتره بكليه علوم هل تتوقع انى ممكن اشارك فى الاعتصام من اجل اسقاط العلميين
ابدا لا يحدث احنا قلنا فى المطالبه بكل الاحترام لكم مجالكم ولنا مجالنا
وإلا انا كمان عايزه ادرس جراحه وتشريح بصوره موسعه واشتغل طبيب وصيدلى ماهى كدا بقى كل واحد يدرس براحته- مطالبنا كانت وستظل مشروعه مع كل احترامى اخوتى واقاربى واصدقائى العلميين فأنا لا استغنى عنهم وهم لا يستغنوا عن الصيادله

معلش على المحاضره دى بس لو فى فرصه هديلك لينكات عم الوقفه فعلا وصور علشان تعرف موقفنا الحقيقى

شكرا لزيارتك العزيزه دوما

فوركس فيجين يقول...

الف شكر
http://www.4exvision.com