الجمعة، 22 أبريل 2011

عمر


دا أسم أبنى اللى لسه ما جبتوش
لا أبوه شافنى وأنا لسه ما قبلتوش
بفكر يا أبنى أخليك مكانك وتفضل حلم ما حققتوش


كل الأحلام لأمك يا أبنى بتتحقق بس متأخره ومُعاده
تحط الخطوه أول الطريق تشوف خطوتها الأخيره دايما زياده
تفكر تجرب وتصبر يا أبنى والصفر هو الطبيعى والإفاده
يا أبنى خليك مكانك أمك محتاجه قبل ما تجيبك لحياتها إنتفاضه


خبره أمك يا ابنى فى الحياه قليله بتعوضها القرايه
قريتلك يا أبنى قول كام 100 روايه
سمعت قول كام ألف حكايه
وفاتنى فى وسطهم كام درس مهم
أهمهم أن لكل شئ مهما كان نهايه


لأن أمك يا أبنى مالهاش فى الاستعباط
ولا تماحيك البنات والتمثيل والاستكراض
أمك مشغوله بهموم الدنيا وحياه الغير بأفراط


فتلاقيها سالمه غانمه كدا لوحدها
والدنيا هى اللى بتفرمها وتزقها
علشان كدا كل الى يعدى عليها يهزها
يشقلب حياتها ويهدها


بس بردوا مش بتتعلم
هى بس بتفهم ومتأخر
 فبتسامح ولله أمرها بتسلم


يمكن زى ما نفسها فى الاخر تلاقى أبوك
وتقدر تجيبك فعلا حر مش مملوك
عمر يا أحلى أسم حبيته علشان الصحابى الفاروق
نفسى يجى يوم ويوصفونى باسمك مش الحلم لا المخلوق

هناك 8 تعليقات:

موناليزا يقول...

وكأنى أنا اللى كاتباها مع اختلاف اسم ابنى اللى بتمناه:)

ربنا يرزقنا يارب بازواج صالحين وبذرية طيبة

بسنت يقول...

نورتينى يامنى
اللهم أمين لى ولكى ولكل بنات مصر الحبيبه

قلم رصاص يقول...

والله أمك دي ياعمر عروسه لقطه
هههههههههههه

كلمات رائعه والله
أحييكي بشده عليها
دمتي مبدعه ودامت كلماتك

تقبلي تحيتي
:)

فتاه من الصعيد يقول...

ربنا يرزقك بابو عمر :)

وتقدري تحققي معاه كل اللي تتمنيه يا رب ..

الازهرى يقول...

ادعوا الله تعالى ان يرزققك الخير
وان يجعله فى إيمان وتقوى وقوة عمر بن الخطاب

بس اوعى تنسى تعزمينى

بسنت يقول...

قلم رصاص
مروى العزيزه
الازهرى
ربنا يكرمكم لدعاءكم الطيب
متشكره جدا
دى شخابيط ومحاولات لتغير خط سير الخواطر بعد تعديل اسمها لقلب الصعيد

حمدى جعوان يقول...

تحباااتى لكى يابسنت
ابدعتى

بسنت يقول...

شكرا حمدى
زيره كريمه