الأربعاء، 26 يناير، 2011

شغل رجال

يا ماحلى وقوف شبابك يا مصر فى ميدان التحرير
دا شغل رجال وقلب كبير
الله عليكم وأنتم بتقولو لا بأيدينا هنحدد المصير
ولأول مره أدمع وأنا اللى دموعها غاليه حتى على الصغير
كفايه ذل كفايه بطاله كفايه غلاء خلاص مش هعيش ذليل
مابقيتش خايفه حقيقى خلاص ما ضاعت حاجات كتير
ومش عايزينا حتى نطالب بأبسط مطالب الانسانيه ولو قليل
أشهد يا تاريخ أكتبى يا إنسانيه المصرى لسه عايش بضمير
ولكل جنود الأمن اللى شاركت فى التنكيل 
مش جديد عليكم لأن الوساخه فيكم طبع أصيل
ولكل صاحب  دماء زرقاء من الحكومه  والاعلام
 واللى معيننهم لمؤاخذه يعنى ( إتفو)  يا حقير 
ويارب ما أكون بحلم بالمستحيل
  دا حلم بسيط إنى أكون عزيز مكرم فى بلدى
 مش كرم من حد
 ولا  عليا كمصرى كتير

هناك 7 تعليقات:

bombona يقول...

بصراحه انا من رأى ان كل اللى بيحصل ده مش منطقى يا جماعه انتوا عايزين ايه ؟الريس يمشى؟
اللى عايز واحد يمشى المفروض يروح له لحد عنده ويواجهه ويقول له فى وشه:امشى كفايه كده يبقى معناه ايه انهم يتظاهروا فى حته تانيه بعيد عن بيته يا جماعه عشان نكون مؤثرين وبنعمل حاجه ليها معنى لو سمحتوا روحوا لعند بيت الريس واطلبوا منه يمشى ,معناه ايه التظاهر فى التحرير وجامعه القاهره ولا السويس ولا طنطا ولا اسكندريه يا جماعه روحوا لعند بيت الريس والله ده ها يوتره اكتر وكده هاتضغطوا عليه ويحس انه مكروه بجد وحتى لو مامشيش هانكون على الاقل نفسنا عن غضبنا وضغطنا عليه نفسبا ماهو ضاغط علينا عمر بحالوا, كل واحد فينايسأل نفسه لو جم تلاته او اربعه تحت بيته وطلبوا انه يمشى من بيته وهتفوا ضده هايكون شعوره ايه ؟وهو هايعرف شعور الريس هايبقى ايه وحدوا صفوفكم بكره فى مكان واحد والكتره احسن بدل ماكل مجموعه تكون لوحدها فى حته وربنا ينصرنا انشاء الله

ربا عادل يقول...

الشعب المصري كان لازم ينتفض من زمان الشعب المصري شعب بطل انا احييه جدا لا داعي ان نقول على من الحق دائما وابدا السيادة للشعوب الشعب من يضع والشعب من يزيل من غير المنطي ان يعيش شعب 85 مليون بفقر وذل كل يوم يتتولد من الكبث ظاهرة ابشع من يلي قبليها الشعب شبع ظلم عشان هيك انفجر

بسنت يقول...

بوبونا
يروحوا لحد عنده فين؟
هو اصلا كان فى شرم الشيخ
وحاليا اتوقع انه فى مكان سرى
وزياره عزيزه

رباب
انه شعب صبور ويعطى فرص
دا المنطق لكل السنين
زياره عزيزه ايضا
كل التحيات لكما

ahmed_k يقول...

هما ارادوا ان تكون علينا كمصريين كتير
ولكن الإراده والتحدي جعلتنا اقوى من إرادتهم ومن آلات قهرههم وبطشهم
فماتوا وعاش الشعب
وهاهي الدفاتر القديمه فتحت وما كان ممنوعا ومستحيلا من أيام صار حقا الآن
فسبحان الله الذي يغير ولا يتغير

واحد صعيدى يقول...

كنت قد تركتى تعليقاً على مدونتى قبل اندلاع احداث 25 يناير 2011 .. تتحدثين فيه عن الأنتظار .
أيام قلائل وانفجر الغضب .. وكان شتاء الغضب بحق ، كنت فى ميدان التحرير .. بعيداً عن محافظتى النائية ، أصرخ من كل أعماقى .. الشعب يريد اسقاط النظام .. وقد حدث ، تحياتى لكى ولمصر الحرية.

بسنت يقول...

أحمد
احنا دلوقتى فى زمن كل شئ ممكن
غريب او طبيعى
ربنا يسترها على مصر
المهم اننا فى حريه كل شئ ينصلح باذن الله

بسنت يقول...

واحد صعيدى
التحيه دائما لبلادى