الأربعاء، 13 أكتوبر، 2010

وأخيرا000 الأربعاء

يعنى أنا عامله لنفسى فتره حصار وانعزال عن الاخبار الوحشه 000على الاقل (بطلت أقرى جرايد ) وعن الفيس بوك (واخده اجازه طويله الاجل توفير للوقت الى بضيعه عليه) ومن القرايه ( منها أريح مخى وخيالى من أوهام الروايات والاحباط  بتاع المثقفين ) أنا بعيد ترتيب أوراق دراستى
أنا بستعيد صيدلاااانيتى 000 أنا بذااااااكر !!
أنا نفسى مش مصدقه إنى رجعت أقرى فارما كولوجى وأحل مسائل صيدلانيات -- وكمان أفهم   !!  لااااا  دا كتيييييير أووووى
يعنى فتره انعزالى عن الصيدله اللى فاتت (كنت عايشه حياتى يعنى ) وطبعا شغل الصيدليه دا موضوع تانى -وأنا بتكلم عن الصيدله اللى هى الموضوع الاولانى  000 وكل الكلام الجامد من امراض عصبيه بقى ونفسيه وباطنيه
والقلبيه والدوائيه  وكل الحاجات دى (الشر بره وبعيد ) لما تقراه بمزاج كدا علشان تبقى صيدلى عن حق ( أصل خريج الصيدله - الاولانى  دا - عن غير حق 00مجموع أقصد ) المهم وأنا رايقه كدا ومدوشه كدا وفاضيه كدا ومشغوله أوى كدا لاقيت أن المذاكره دى عايزه أولا إراده حره مستقله (غير مصر  الحره المستقله خالص) بس حتى المستقله دى بتكون مسجونه ومسلسله بالوقت والفهم والحفظ (وأه من الحفظ لو تعلمون ) واكتشفت ان الدراسه مابعد الدراسه (الاولانيه ) حاجه حلوه (ومش بطاله ابدا ) يعنى عوده شعور انتهى واندفن من زماااان وكمان فكره التعرف على ناس جديده  وشخصيات جديده (بعد العمر دا كله لسه الواحد بيقابل شخصيات جديده -حقيقى ) الحظ بقى دايما أصغر سنا 00بس الصراحه انا حاسه انى اللى اصغر سنا  - يعنى تشوف شخصيات (عندها ذكاء وحداقه وخباثه) بيأكدولى إنى لسه صغيره وناس تانيه (حبوبه وذكاء وتعاون ) بيأكدولى إنى لسه صغيره جدا ولسه فى ناس كويسه الحمد لله الواحد بيكتشفها
(وانى  بقى لسه رغم الحزن قادره  أفرح ) وأنا بكتب لكن لسه فى فتره الانعزال الارادى دى  ما يمنعش من تفاريح يومين على الماشى فى
بنت المعز الفاطمى قاهرتى العزيزه ( دا جراند حياه مقدرشى مقدرشى00 أقول لأ )
وتضيع الوقت فى الرد على التليفونات (وآه من التليفونات لو تعلمون ) نفسى أكسرها   كان اختراع 0000 (بس ساعات  بينقذنى خاصه فى الشغل  )
 ووسط دا كله صعبت عليا مدونتى السودا الحلوه البسيطه التركيبه الشرحه 0000 (تميم  العزيز )
بس بعتذر عن التواصل مع اصدقائى الاعزاء هتابعكم بعد عودتى الميمونه ولما ربنا يفرجها فى وشى ويفتحها عليا
أما سبب الفضفضه دى بقى إنه أخيرا 0000 الاربعاء
دعواتكم

هناك 10 تعليقات:

الازهرى يقول...

وماله فضفضى واتكلمى احنا ورانا حاجة

وكمان أجمل حاجة ان المذاكرة للمرة التانية بتبقى بالمزاااااااااج

وربنا معاكى

تحياتى دوما

اندروميدا يقول...

ربنا يفتحها في وشك دايما .... وجميل حالة المذاكرة الجديدة دي ... وانا حاسس بيكي ... اصل في حالة مذاكرة دائمة ... وعارف الشعور دا كويس .

رحلة موفقة بإذن الله .

تحياتي .

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى
www.ouregypt.us

eng_semsem يقول...

اتكلمي وطلعي كل اللي عندك ومش هقولك طبعا انا مذاكرتك مهمه جدا لانها هتغير مجري حياتك اوعي تنسيها عشان بكره ممكن تندمي على الدفيفه اللي ضيعتها في حياتك من غير ما تتعلمي حاجه جديده
بالتوفيق ان شاء الله

فتاه من الصعيد يقول...

نتمنى كل الايام تبقى اربعاء وتبقي هنا على طول :)

عموما كملي مذاكره ... ووقت الفضفضه مدونتك واحنا هنا :)

تحياتي

طوبه فضه وطوبه دهب يقول...

وانا كمان بذاكرى دلوقتى وامتحاناتى قربت وحاسه نفس الاحاسيس الجميله دى فعلا الدراسه بعد ما تخلصى حاجه ليها طعم تانى ربنا يوفقك ويوفقنا يارب

نهــــــــــار يقول...

السلام عليكم ...
الحمدلله إنك مبسوطه ورجعتي تكتبي وتذاكريييييي ...
ربنا يوفقك
في أمان الله

Ahcene يقول...

و أنا بدوري أهديك هذه الابيات للشاعر العراقي أحمد مطر
أبي الوطن
أمي الوطن
تفوه على هذا الوطن
إذا لم يعش بنا
عزيزا
كريما
فلا عشنا
و لا عاش الوطن

بسنت يقول...

بدايه بعتذر لكل الاصدقاء المدونون
عن تقصيرى فى متابعته

وبعد
أزهرى
المذاكره التانيه بتبقى برغبه الواحد صحيح
لكنها الاصعب بلا شك
شكرا جزيلا

------------------------
معتز
كيف الاحوال؟
الرحله كانت ممتازه بحمد الله
كل المنيات بالتوفيق فى الدراسه والتحصيل وهو الاهم
الشكر دائم

--------------------------
غير معروف
انا مقاطعه الاخبار السيئه شويه كمان
متشكره

-----------------------------
مهندس سمسم
بدايه زياره عزيزه
والمذاكره حاليا لكن تغير مصير حياتى فهو متحد من زمان
ولكنها ترفع كفاءه الواحد وهو دا المطلوب كصيدلى الا تتوقف فى حدود الصيدليه
كل الشكر
--------------------------------

بسنت يقول...

مروى
شكرا جزيلا على تواجدك الدائم
دا شئ بيسعدنى زى ما انتى عارفه

----------------------------
دهب
كل الدعوات بالتوفيق وتكون امتحانات سهله وتعدى على خير ان شاء الله
الشكر دائم

----------------------------
نهار
وانا مبسوطه انى شفت هنا تانى
دا شئ بيسعدنى دائم
دمتى بخير وكل اهل الامارات طيبين

------------------------------
ahcene
الوطن عايش بينا من غيرنا
المهم يفضل اسمه كدا
وطن
وبالنسبه للابيات انا مستغربه ان احمد مطر يقول كلام بالشكل دا !!