الأحد، 29 أغسطس، 2010

حدث فى رمضان

بدايه دى تقريبا أول مره أكتب تدوينه فى رمضان
ولكن لأن مش كل حاجه ممكن تتكرر فى رمضان
فدا شرح لأنطباعات أول مره أحضر تجمع مدونين بالقاهرة
بدايه جاتلى دعوه على الفيس بوك من جروب خالو الصباغ لحضور يوم خير للمدونين كلهم وبمتابعه الدعوه عرفت ان داليا (قوس قزح ) هى
والاستاذ خالد (همس الاحباب ) هما المنظمين وداليا لابد أن أشكر أخى العزيز وليد الزهيرى لأنه السبب الاساسى  فى تعارفى  الفتره اللى فاتت عليها  وبسببها قررت انى اعمل المجازفه دى الحقيقة
فكلمتها وعرفت انه تجمع فى مستشفى ابو الريش اليابانى بالسيده زينب والمفروض إنى اعرف السيده زينب بحكم ان نقابتى ودار الحكمه بها ونزلتها كذا مره السنه دى بس دا ما منعشى انى اتوه شويتين وفضلت أكلم  داليا وهى تشرحلى يا عينى عليا إزاى أوصل بالسلامه المهم وصلت 00 متأخره بس مش أوى
بسبب المواصلات أولا من المنيا و ثانيا التعب ( ومش هحكى عن تعب الصيام والمواصلات ) ربنا ما يوريكوا ولكن كله يهون لأنى كنت احتسب الجزاء من الله سبحانه وتعالى لفعل الخير الجماعى ناخد ثوابه جميعا إن شاء الله لكل من شاركوا
الكارثه الكبرى كانت بالنسبه لى عدم ذهاب أى حد من اللى أعرفهم اللقاء دا أو حتى بيدخلوا عندى المدونه فصراحه أفتكرت جدا أغنيه منير
 ( إيديا فى جيوبى وقلبى طرب00 عايش فى غربه بس مش مغترب )
دا كان شعورى تمام انى فى غربه بس الوجوه كلها مألوفه وكأننى شفتها قبل كدا ودا حقيقى جدا ولكن دا بردوا ما خلنيش أتجرأ وأتعرف على حد يعنى كل اللى أتعرفت عليهم بجهودهم الذاتيه وبدأهم للتعرف على شخصى الكريم ( دا عيب خطير إنى أخر واحده ممكن تروح لحد وتتعرف عليه وجها لوجه فى الحاله دى أنسونى خالص )
 بستمتع بالفرجه والملاحظه فى كل هدوء
اللى اتعرفت على شخصياتهم الكريمه نوران الشاملى ( بنت خيخه) ودى للصدفه الغريبه جدا جدا طبق الاصل لصديقه لى وفاتيما ( روح قلب ماما  ) ودى فوجئت بيها كنت اتوقعها اكبر من كدا بكتييير وكيكى (فكك منى ) وهى صاحبه الوجه الضاحك طول الساعتين (كانت مديانى احساس انى صعبانه عليها علشان ساكته ومش مجارياهم فى الكلام معاهم ) انا كنت مستمتعه يا كيكى ولكن احيان لا تظهر عليا الانطباعات مش عارفه ليه  وزهره الجنه اللى اعتذرت عند الافطار لظرف وفاه خاص وتعرفت ولكن بصوره سريعه على دعاء (مواجهات ) وبيطريه ومش بإيدى (كانت قاعده جنبى فى الفطار ) وونده ( مش عارفه اسم مدونتها) وكان فى بنات كتير تانين ما اتعرفتش على اى واحده فيهم(حاجه تكسف جدا )
 وطبعا الاستاذ خالد (همس الاحباب ) وكان حاضر الاستاذ (شرين الكردى) وكان فى مدونين تانيين كتير ما عرفتش اى حد فيهم وان كانت اساميهم اللى اتقالت مش
غريبه عليا بس أسامى مدوناتهم أيه ؟  الله أعلم
واخيرا صاحبه اليوم الكبير داليا لانها عملت مجهود كبير ولوإنى زعلت انى مقدرتش اسلم عليها قبل ما امشى لانى كنت مستعجله اخد المترو لحلوان (كنت هبات هناك) قبل صلاه العشاء لانى طبعا كنت ما صلتش المغرب
وكمان علشان ما عملوا اى تعارف كمنظمين بين الناس الجديده (زى حالاتى كدا)
لانى لاحظت ان كتير منهم يعرفوا بعض اصلا
المستشفى عجبتنى جدا لانها نظيفه ودى حاجه مش بسيطه لو اى حد من اللى راح جاء هنا مدينتى وزياره سريعه للمستشفيات العام فهيجيلوا احباط مش من الحالات اللى تصعب على اى حد ولكن من مجرد مستوى النظافه مش النظام ولا العلاج ولا اى حاجه
لما شفت كمان الحالات المريضه للاطفال عرفت ان الزياه دى المفروض المره القادمه تكون هنا للصعيد لان الحاجه للتبرعات فعلا اكبر بكتير ولكن الغريب انى تفاعلت مع الحالت والناس اللى بتشتغل ( هنا كنت بتكلم كويس جدا معاهم ) عن المدونين
بالنسبه للمطعم مش هحكى علي الاكل والحر ( ربنا يسامحكم بقى ) ولكن الاستاذ خالد كان واقف زى مشرف الرحلات اللى لازم يطمن على كل فرد انه مش عايز حاجه ربنا يكرمه وعرفت ان الشباب ما كلش لغايه ما البنات فطرت علشان الاماكن
 (طيب وهو مين أكل اصلا )
 هو كان يوم مختلف وجديد جدا عليا وانبسطت انى عملت حاجه كويسه للخير خاصه ان اسرتى كانت رافضه تماما للموضوع ( ولكنى تمسكت بحقوقى فى الرأى والقرارات  كالعاده) فوافقوا مجبرين
وأخيرا ولابد من التذكره فى رمضان والأيام العشر الأواخر هتبدأ
قول الله تعالى ( لن تنالوا البر حتى تنفقوا مما تحبون )

هناك 34 تعليقًا:

الحب الجميل يقول...

جزاكى الله كل خير
دمتى بخير

همس الاحباب يقول...

جزاكى الله خيرا
وجعله فى ميزان حسناتك
احنا اسفين جدا اليوم كان صعب والعدد كبير جدا
ان شاء الله نتعارف فى ظروف اخرى اكثر ملائمة
تحياتى

فاتيما يقول...

كل سنة و انتى طيبة يا بسنت

ربنا يبارك ف مشاركتك
و عقبال كل مرة تكونى معانا

انا مبسوطة و الله انى شوفتك
و اسفة لأنى ملحقتش اقعد معاكى كفاية

كنتى متوقعانى اكبر سناً
و لا تقصدى خيخة ؟
اصل انا برضو اول مرة
روحت شوفت البت خيخة
كنت متوقعة ست بيت
مصرية تقليدية نوعا ما
رغم شقاوتهاع المدونة و كدا

اتفاجئت انها شقاوة
و شكلها ف تانية ثانوى
او اولى جامعة بالكتير
حسيتها طفلة ف صورة ام


يا ريت تكونى متابعانا
علطول عشان تحضرى اى لقاء بعد كدا
و نتعرف عليكى اكتر ..
انتى حد لطيف قوى
و ان شاء الله لما نحدد
اللقاء الحريمى
لازم تيجى
هنبقى ستات و بنات ف بعضيشنا
و الجو هيبقى اروق
و نعرف نتكلم على رواقة اكتر


كل سنة و انتى طيبة
و انتى
نورتيناااااااااااااا

بسنت يقول...

الحب الجميل
زياره عزيزه
وربنا يتقبل منا جميعا
ورمضان كريم

بسنت يقول...

استاذ خالد
ويجزيك كل الخير على تعبك ومجهودك
ولا استغرب فأعتقد انك فيك عرق صعيدى
من الشهامه والمساعده
وان شاء الله يكون فى تعارف تانى فى الخير بردوا
وكل سنه وانت طيب

بسنت يقول...

فاتيما
أنا الاسعد حقيقه يا فاتيما وانا كنت اقصدك انتى لانى تعرفت على كتابتك قبل ما اشوفك من بوست مؤثر جدا فى كتاب انا أنثى اللى قريته قريب وصراحه انفعلت جدا مع حبك وحنانك زى كل ام حقيقيه مصريه فتوقعت انك كبيره
ولكن طبعا طلعتى زى السكر وصغيره جدا
مع كل الحنان اللى بتكتبى بيه
ربنا يجمعك بيوسف على خير يا رب
ويحققلك كل الخير بحق الايام الكريمه اللى احنا فيها
وكل سنه وانتى بخير

اقصوصه يقول...

رمضان كريم

مبارك عليكم الشهر

وكل عام وانتم بخير :)

كيــــــــــــارا يقول...

كان يوم جميل

بس مش شفتك ممكن زحمه الناس المهم اننا اتجمعنا في الخير

ويارب يارب نتقابل المره الجايه

كل سنة وانتي بخير

شاب فقرى يقول...

كل سنة وانتى طيبة
ربنا يحفظك ويعزك
اللقاء كان منور بيكى مع انى مش شفتك
ربنا يقدرك على فعل الخير دايما يارب
تحياتى
شاب فقرى

Sameh Ezzat - (خواطر خاطر) يقول...

سلام عليكم..

اولا كل سنه وانتي طيبه يا بسنت
انا كنت موجود معاكو بس مش عارف هتفتكريني ولا لأ

عموما من غير ما نتعب في التفكير.. اليوم كان جميل والكل كان مبسوط وحتي الناس اللي ملقتش تتعرف علي بعض اهم علي الاقل شافو ناس اشخاص لحم ودم مش مجرد كلام علي البلوج او الفيس بوك
لا اللقاءات دي بتأكد ان المدون ده مش عايش عشان يتكلم وخلاص لاااا احنا اهو بنتقابل وبنعمل خير سوا وبناكل عيش وملح سوا وبنتعرف علي شخصيات بعض علي الحقيقه وبنخدم بعض وبحب الخير لبعض.

انا كنت اجرأ منك شويه لاني كنت مجهز العده بتاعت كل لقاء وهيا
(النوت والقلم)
وماشي اشبه علي الناس واللي قلبي يختاره اجي عليه واقوله:
ازيك ؟؟ انتا مين ياعم ؟؟ ههههه
حظك انك موقعتيش قدامي بس الجيات اكتر
اشوفك علي خير

طوبه فضه وطوبه دهب يقول...

ربنا يكرمكم ويجعله فى ميزان حسناتكم يارب وكل تجمع وانتم طيبين

بسنت يقول...

أقصوصه
كل سنه وانتى طيبه
غيبه طويله ليكى
ان شاء الله تكونى بكل خير

بسنت يقول...

كيارا
للاسف انا ما كنت اعرف اساميكم او مدوناتكم ليسهل التعارف ان شاء الله يكون فى فرصه تانيه واقدر اتعارف على كل الناس الجميله لان الكلام اللى قالوه فاتيما يشجع الواحد انه لازم يتعرف احسن عليكم
وكل سنه وانتى بكل خير

بسنت يقول...

كريم
ما كنت اعرف انك حضرت يا شاب يا مكافح لانى طبعا اعرف مدونتك كويس جدا
وكانت فرصه كويسه اشوفك على الحقيقه بس ان شاء الله يكون فى فرصه تانيه
وكل سنه وانت بخير

بسنت يقول...

سامح
انا شوفتك اكيد لان الصوره بتاعه بروفيلك تمام انت على الواقع
بس للاسف ما كنت اعرفك تدونيا من قبل بجانب ان الناس كلها كانت غريبه وماكنشى معايا بلوك نوت وقلم

وان شاء الله يكون فى فرصه فى لقاء خير تانى
وكل سنه وانت بخير

بسنت يقول...

دهب
اهو انتى يا دهب واحده من اللى كنت متوقعه انى اشوفهم
بس القا نصيب فعلا
ان شاء الله يكون فى لقاء تانى وتقدرى تحضرى لانك هتنبسطى فعلا
وكل سنه وانتى بخير

мαησηα يقول...

:((

عاااااااااااااا انا ماشوفتكيش

طيب انتى كنتى مين هه ؟

كان نفسى اعرفك يا بسنت بجد واضح انك عثولة وجميلة

ان شاء الله نتقابل تانى

كل سنة وانتى جميلة وزى الفل ومعانا
دايما يارب اللهم اميييييين

بسنت يقول...

منونه
انا اللى كانت هتسعد لو اتعرفت عليكى
وعلى كل البنات الجميله اللى اكتشفت بعد ماجيت ان اغلبهم مدونات
ربنا يسهل فى مره تانيه
وكل سنه وانتى طيبه

تايه في وسط البلد يقول...

مش عرفنا يا دكتورة انك رايحة!!

الظاهر ان القرار كان يواجه مقاومة عنيفة لكنك انتصرتي :-))

عموما مثابة باذن الله علي مجهودك ونيتك وان شاء الله نشوفك في مرات قادمة

بس هو ايه موضوع الفيلسوف ده؟!!!

مش كنت بعت اعتذار باين؟!!
كل التحية والتقدير

بسنت يقول...

صاحب وسط البلد
وبلاش منها الفيلسوف الكبير اللى بتزعل دى (بدل ما يجى عليا الدور اقدم اناالاعتذار ) ولو أنها مدح قوى فى العقل المنير لصاحبها
وبالنسبه للقاء الخير ما توقعت أنك ما تروح دى كانت مفاجأه
توقعت ناس كتير من اصدقائى المدونين هيحضروا بس واضح انى كان لازم اقدم الدعوه بنفسى
ههههه
وكل سنه وانت طيب
وتتعوض فى لقاء خير تانى إن شاء الله

!!! عارفة ... مش عارف ليه يقول...

كل سنة وأنت طيبة بسنت

وجزاكي الله خيراً على مشاركتك

ومع الأسف ظروفي لم تسمح هذا العام بالمشاركة في لقاء أبوالريش

وسعدت على وجه الخصوص بلقاءك مع داليا

وكل الشخصيات الرائعة التي كانت موجودة والذين افتقدهم كثيراً هذا العام

وإن شاء الله يدوم التواصل بين المدونين لفعل الخير دائماً

وفعلاً خالد فيه عرق صعيدي، والشهامة اللي بيتحلى بيها دي فعلا لها مصدر :)

الازهرى يقول...

فى ناس من دول عرفتهم فى ظروف مختلفة وكلهم على العموم شخصيات أجمل من بعض
وكان نفسى أكون موجود هناك بس أعمل يه بقى ظروف احياة
قدر الله وما شاء فعل

تحياتى دوما

بسنت يقول...

وليد
الشكر يعود لصاحب الفضل الاول
فلولاك ما كنت اتعرفت على داليا ومن ثم كل باقه
المدونين المحترمين اللى شرفت بمعرفتهم هناك او بعد عودتى ومعرفه مدوناتهم
كل سنه وانت طيب
وان شاء الله نلقاك على خير فى لقاء خير تانى

بسنت يقول...

أزهرى
لو قريت تعليق سامح هو الشئ الملائم تجمع واقعى (لحم ودم) إنسانى بحت بلا اى غرض سوى التجمع والثواب على خير
فكره جميله يمكن يتميز بها المدونين مستقبلا عن باقى مستخدمى النت

وان شاء الله تحضر معانا لقاء خير أخر
لرؤيه أخ محترم أخر بجانب من تعرفت عليهم
وكل سنه وانت بكل الخير

Diyaa' يقول...

جزاكم الله كل خير :) وحمداً لله على السلامة :)

بسنت يقول...

ضياء
ربنا يكرمك
وكل سنه وأنت طيب
عيد سعيد

بحر الالوان يقول...

كل عام وانت بخير بمناسبة عيد الفطر المبارك.... وربنا يوفقك دايما لطريق الخير والثواب

فتاه من الصعيد يقول...

كل سنه وانتي طيبه يا بسنت :)

معلش لو كنت موش قدرت أتابعك في رمضان :)

عيد سعيد عليكي وعلى كل الاسره :)

بسنت يقول...

معتز
كل سنه وانت طيب وان شاء الله عيد سعيد عليك
تحياتى دائما

بسنت يقول...

مروى
متشكره جدا كلك ذوق المدونه مكانك تجيه براحتك
وكل سنه وانتى بكل الخير
وان شاء الله عيد سعيد عليكى

فتاه من الصعيد يقول...

كل سنه وانتي طيبه :)

أنا من المنيا على فكره :)

تحياتي

فاتيما يقول...

كل سنة و انتى طيبة يا بسنت

عيد سعيد عليكى يا حبيبتى

عقبال كل عيد و انتى معانا
و منورة دايما


خالص حبى ليكى
و البوسات و الحضونات

بسنت يقول...

مروى
المنيا منوره بزياده مدونه
بنت كمان
كل سنه وانتى طيبه

بسنت يقول...

فاتيما
العيد والدنيا منوره علشان القلب الجميل زيك موجود فيه
كل سنه وانتى بخير
وان شاء الله العيد الجاى محققه امنياتك كلها