الأحد، 21 فبراير 2010

وآه يااانى يااانى


حلقه من مسلسل (صيدلى وبراحتى)

موضوع الحلقه اعتصامات الصيادله بسبب قرارات
وزير الصحه الخاصه باشتراطات الصيدليه فى مصر
وبسبب قرارات التفتيش التعسفيه بمحافظه المنيا

وتتكون من 5 مشاهد مع الفاصل الموسيقى للاعتصااام
وآه ياانى يااانى مش هعمل كدا تاانى**

----00000-----00000------000000-------

مشهد أول- أتوبيس مكيف صعيدى فى طريقه للقاهره
( يحمل 25 صيدلى منياوى واسرهم الصغيره-
دى مصر يا رأفت – مش بنروحها بالساهل)

(ميدو) أنا ماما دكتوره وبابا دكتور
هما اللى قاعدين قدام ورا السواق
(حماده) انا ماما دكتوره الى قاعده جنب طنط قدام
وبابا فى الشغل
(ميدو) تلعب معايا تابط وحراميه
(حماده) ماسى
(ميدو) انا تابط ولابس بدله تابط وانت حرامى ولابس بدله حرامى وانا وعساكر هنحطك فى العربيه جيب دى(ويشاور من نافذه الاتوبيس على عربيه جيب ماشيه فى نفس الطريق)
ونحبسك فى السجن
(حماده) لا انا مش هلبس بدله حرامى انا اللى تابط
(ميدو) لييييه !! دى بدله الحرامى كميله اوى

وآه يااانى ياااانى مش هعمل كدا تانى

------00000------000000------0000000------

مشهد تانى ( فى نقابه الصيدله)
يفتتح المتحدث باسم الشعب الصيدلى الجلسه:
يا ريت يا صيادله الهدوء- وينظر بشذر للاطفال الصعايده الموجودين
فى القاعه بجانب إمهاتهم وإباءهم الصيادله

أولا يا جماعه ما تنسوش إننا صيادله وناس
مؤدبين ومحترمين و000

يهتف صيدلى 1 ** يا نقابتنا يا نقابتنا الوزير هيخرب بيتنا **
ويتعالى التصفيق الحاد
ويكمل المتحدث : إحنا هنعتصم خارج النقابه على السلم لاخر
درجه فيه ومش هنخرج عن الحدود دى لأننا يا جماعه ناس مؤدبين ومحترمين و00

يقاطعه صيدلى 2 هاتفا ** 25 25 أو من هنا مش ماشين **
ويتعالى التصفيق الحاد

ويكمل المتحدث : الوزير دايما بيسمعنا وزى ما سمعنا فى موضوع الضرايب هيسمعنا فى موضوع ال25 متر وقرارات التفتيش ودايما فى بين النقابه وبينه ايميلات متبادله وهو أكيد يستجيب لأبناءه الصيادله الخريجين والقدامى

وتقاطعه صيدلانيه 3 ** صيدلى صيدلى يحيا الصيدلى **
وتصفيق حاد

ويكمل المتحدث: ولاننا ناس مؤدبين ومحترمين وديمقراطيين هيكون فى فرصه لكل صيدلى حر وانا بقول حر يا جماعه يعنى بدون انتماءات حزبيه يتفضل يقول كلمته

وتقاطعه صيدلانيه 4 موهوبه شعريا ** مش ناقصاك يا وزيرنا يا سكر مش ناقصاك ** وتكمل قصيدتها الحماسيه
و يهتف الجميع ورائها مش ناقصاااااااك وتصفيق حاد

ويتابع المتحدث : الاعتصام هيبدأ الآن وهيستمر فى كل نقابه فرعيه ومحافظه لحين رفع الظلم 000 ولأننا ناس محترمين ومؤدبين لازم نكون كلنا بأيد واحده ونقول ** لا اللى مالوش خير فى الصيادله مالوش خير فى مصر يا حاتم **
وتصفيق حاااد


وآه يااانى يااانى مش هعمل كدا تانى

----- 000 ---0000 -----0000-----

مشهد ثالت ( على سلم النقابه)
اعتصام صيدلى كامل مع اصوات اطفال ودندنات
و نغمات موبايلات وتعارف بين الصيادله
ولافتات تحمل شعارات تطالب برفع الظلم عن الصيادله والمفتشين

---- 000 ---- 0000 ---000------

مشهد رابع ( فى الاتوبيس ) فى طريق العوده القاهره المنيا
صيدلى 5 : احنا يا جماعه هنتقابل بكره قدام مبنى المحافظه وهعنتصم هناك من الساعه 10 الصبح قبل ما المحافظ يخرج
وهنقابله أو هنقرف الحكومه لغايه ما يقولوا خلاص حرااام 00كفايه

صيدلانيه 6 : وهنبعت تلغرافات وفاكسات من المنيا وهنقلب الدنيا
حد معاه رقم الحياه ودريم وعايزين صحفيين من المصرى اليوم والدستور زى ما كان هنا فى القاهره لازم يكون فى المنيا
ويا إحنا0000 يا هما

(ميدو ) أنا بكله مش رايح معاهم
(حماده ) ليه أنت رايح الحضانه بكله ؟

وآه ياااانى يااانى مش هعمل كدا تانى

------ 00000 ---- 00000 -----00000----

مشهد خامس ( عند المحافظه أمام كورنيش النيل مباشره ) اعتصام20 صيدلى
صيدلانيه 6 : والله وقفه مصريه بصحيح
صيدلانيه7 : وتفتكرى هنقابل المحافظ
صيدلانيه 6 : وإحنا ورانا ايه ؟ منين ما نزهق اهو الكونيش قدامنا
وفرصه نتهوى شويه على النيل
صيدلى 8: خلاص المحافظ نازل وهيقابل اتنين مننا
زى ما قال مقدم الشرطه اللى فى حرسه علشان بس احنا ناس مؤدبين ومحترمين و0000


------ 0000 ------------0000 -------------
وتتصاعد ضجه موسيقيه من مركب فى النيل
وآااه يانى يااانى مش هعمل كدا تانى

هناك 17 تعليقًا:

تايه في وسط البلد يقول...

بقي المحافظ هيقابلكم عشان انتم ناس مؤدبين ومحترمين بس؟

وميدو وحمادة؟

حظهم احسن من اطفال تانية لان تجربة النضال الثوري اللي انحفرت في عقولهم هتطلع اطفال لهم ملفات عند الامن..يعني مؤدبين ومحترمين!!!!
:))

تايه في وسط البلد يقول...

وبالنسبة للتعليق الماضي فلا يعني ابدا ان الصيادلة فقط من يصلح ولكن اقصد ان الأولي بهم ان يكونوا اول من يتحرك...وساعتئذ لكم منا كل الدعم حتي ولو لم اكن استفيد مباشرة من الاصلاح... اعني ان دعمنا لن يفيد شيئا لو ان ( الصيادلة ) يختارون نقباء نشطين ومخلصين للقضية ويجتمعون بالفعل وجمعاء لاجل ان يدافعوا عن انفسهم وهكذا

صدقيني نحن ندعمكم وندعم اي فئة بمقدار ما تجاهد به هذه الفئة وبمقدار دفاعها عن الناس ككل

فتاه من الصعيد يقول...

طيب كويس ان المحافظه ع النيل... شفتي الميزه

معلش... اصمدوا بقا

تحياتي

بسنت يقول...

تايه
طبعا امااال انت فاكر ايه

تعرف ان المتحدث باسم النقيب العام فضل يقول انتو مؤدبين ومحترمين لدرجه انى بقيت اقولها على الفاضى والمليان زى ما انت شايف كدا

وبالنسبه لميدو وحماده اهو يطلعوا سوابق من الاول بل ما يتعلموا على كبر
زى حالاتنا
-------------------
وبالنسبه لمساندتك للصيادله انا متأكده من كده
انا بس كنت عايزه اخد أصوت مدونين من الشعب مسانده لنا بقوه

دمت بكل الخير

بسنت يقول...

مروى
طبعا دى الميزه الوحيده فى كل الموضوع
النيل

وبالنسبه للصمود للاسف فى زمايل كتير ليا اتكسروا بجد
من القرارات التعسفيه هنا فى المنيا
بس زى ما بقول ما ضاع حق وراءه مطالب

دمتى بكل الخير

صيدلانيه طالعه نازله يقول...

انا مش عارفه هما عايزين يوصلونا لايه بالضبط
السنه اللى فاتت كانت برضه فى نفس التوقيت و الامور عدت و الله اعلم مخبيين لينا ايه تانى

بس اللى مخوفنى انى سمعت ان النقابه باعت الصيادله ووافقوا فعلا على الاشتراطات الجديده دى فى مقابل حل مشكله الضرايب اللى اصلا مش حتخدم غير الحيتان الكبيره مش احنا خالص

ربنا يستر لان لو ده كان حقيقى يبقى الله يعوض

بسنت يقول...

علا
النقابه فعلا كانت هتبيع الصيادله لانها اللى قدمت طلب توسيع المساحه فى الاصل لوزير بس ربنا رجعلها عقلها وعرفت غلطها وبقت مسانده للى بتمثلهم
بس للنقابات الفرعيه للاسف خطايا لا تغتفر حاليا المواضيع كبرت عن الصيدليه دلوقتى الامور تأزمت كمان لتفتيش ربنا يسترها وتعدى على خير ان شاء الله
سلمتى دايما

صفــــــاء يقول...

دة انت بقيتى ثورجيه يا دكتور
واعتصامات ولافتات وهتافات
بس انت اصلا ماعندكيش صيدليه

امال بتتضامنى لييييييه
اعملى زى كل البلد ما بتعمل
مدام الحريقه فى بيت الجيران .... سيبها تولع يا عوضين

بقولك ايه ... هو حمادة أو ميدو مرتبطين ؟

تأثير الفراشة يقول...

فيه قرارات عجيبة كل شوية نسمع عنها الفترة اللى فاتت ، و آخرها فعلا كان موضوع ال40 متر ده

ربنا يستر

تحياتى لك ، أتمنى الموضوع يمر على خير بإذن الله

قيس بن الملووووح يقول...

نحن في حاجه الي رأيكم في مشاكل القراء علي مدونة "دقات قلب بعد الخمسين"

بسنت يقول...

صفاء
انا متضامنه معاهم فعلا لانى ربنا يسهل ممكن يكون لى صيدليه فى المستقبل واكون فى نفس الوضع - الصراحه ناس كتير كانت مستغربه فعلا وقوفى فى حاجه مش منضره منها
بجانب التفتيش نفسه فيه مشاكل انا موجوده فيها طبيعى الاعتصام كان لاكتر من غرض الحقيقه
بالنسبه لميدو هو فاضى (خالته صحبتى هى اللى افتتت)
اما حماده فمشغول(مامته -صحبتى هى اللى أكدت) هههههه
سلمتى دايما

بسنت يقول...

نهى
انها الحكومه لاغير
مش عارفين يرضوا رجال الاعمال- اصحاب السلاسل الكبيره- ازاى
للاسف بلدنا فيها قانون وتحكم بلا قانون
ربنا يوفقنا ان شاء الله فى الخطوات القادمه لانها مصيريه
سلمتى دايما

بسنت يقول...

قيس
حاضر ان شاء الله - افضى واتابع

Hossam يقول...

صديقتى بسنت
وحشتينى جدا جدا
شكرا عل التعليق الجميل وعلى فكرة كبرت الخط وغيرت اللون كمان
شكرا بجد عل الفيد باك الجميلة دى
موضوع جميل كالعادة قريتة واهتميت بيه لانى خلاص بقيت زميل مع مراعاة انى كلنكل طبعا hahahahahahahahha
ربنا معاكى بجد
تحياتى

بسنت يقول...

حسام
كويس اوى كدا احسن كتير علشان عنينا بس يا حسام

وربنا معاك ويوفقك

بحر الالوان يقول...

كل سنة وحضرتك طيبة والامة الاسلامية بخير .

واللهم صلي وسلم وبارك على نبيناالمصطفى الهادي الامين

بسنت يقول...

معتز
وانت وكل امتنا بخير
وصلى الله على محمد صلى الله عليه وسلم