الاثنين، 15 فبراير، 2010

والمهنه : صيدلى


كليه الصيدله إحدى كليات القمه (زى ما بيقولوا)
* دخلناها على أيامى بمجموع أكتر من 97% مش زى الجامعات الخاصه الجميله دى اللى بتاخد 75% وخلت كل من هب ودب ومعاه فلوس صيدلى *
و يتميز خريج الصيدله بأنه ليس من ضمن نسب البطاله
فى مصر0 فنادرا ما تجد صيدلى خريج حتى حديثا ولا يعمل
(بدايه من الشغل بصيدليه الى فتح صيدليه خاصه الى العمل كمندوب دعايه أدويه الى العمل داخل مصانع الادويه الى الحكومى تكليف وتعيين وداخل الجامعه بالتدريس الى العمل بدول الخليج والخارج )
فالمهنه من مكاسب المجتمع لأنه بيتعامل مع الجماهير مباشره
بلا حواجز أى مهنه تانيه مهما كانت عاليه مقاما وهو ليس مجرد دكتور بيصرف الدوا ولكن احيانا بيعمل ككاتم اسرار وحلال مشاكل فأستماعه فقط للمريض أحيانا بيريح المريض ويشفيه
وهى الأقرب إنسانيا وفى ذلك للحق تتساوى مع الطبيب
وفى نفس الوقت قد تشترك مع الطبيب أيضا فى جريمه كامله
وهى إستغلال المريض

يعتبر حلم أى صيدلى أمتلاك مشروعه الخاص الشريف والمربح
فى نفس الوقت وهو الصيدليه ( كنت أستثنى نفسى حتى العام الماضى من الحالمين بذلك ولكن الآن بفكر بجديه)
التى بيوفر على الدوله أعباء توظيفه وكذلك لا يسرق مثلا القروض ويهرب كما يفعل أخرون
بل العكس بيوفر فرص عمل لآخرين معه من مساعدين صيدلى لعامل نظافه يعنى مشروع خدمى بدرجه كبيره ومع ذلك يعتبر مشروع صغير ( لأن صيدليات السلاسل استثناء فأصحابها رجال أعمال وليس صيادله) فرأس المال لا يتعدى 500 الف جنيه بل قد يصل الى 50 الف فقط كما فى القرى

كان القانون بينص على أن مساحه الصيدله هى 25 متر مربع حتى أكتوبر 2009 مع مسافه 100 متر عن أقرب صيدليه ولكن مع القانون وتعديله اصبح بموجب القانون الجديد 40 متر مربع ( كنت أيضا مع هذا التوسيع لتصبح شئ راقى واسع وجميل ) ولكن مع
أهتمامى بفكره فتح صيدليه وجدت أن اقل صيدليه ممكن تتأجر(وليس ملك) المتر يتراوح ما بين 1000 الى 4000 جنيه مصرى( تعبان ) وذلك غير البناء والتشطيب والتجهيز والأدويه ( يعنى من الآخر محتاج الخريج الشاب سرقه بنك أوثروه يرثها لفتح صيدليه صغيره ) الأمر أصبح فى غايه الصعوبه على الجميع
وخاصه المستأجرين القدامى لقرب انتهاء فتره الايجار الطويل بالقانون الجديد ايضا وانتهاء حلم امتلاك صيدليه لكل الشباب

( دا أكيد موضوع مختلف نهائى عن مرتب الصيدلى الحكومى التعيين زى حالاتى والتكليف والمرتب الذى لا يكفينى كفرد واحد وبنت كمان يعنى بدون مصارف أسره أو أولاد
البركه فى الوالد ربنا يخليه مش عارفه كنت هكمل الشهر أزاى
و كنت هعيش ازاى فى البلد دى فى الغلا دا )

( 12-2-2010)
تاريخ مهم فى حياه كل صيدلى شريف لانه موعد اقامه الجمعيه العموميه الطارئه فى دار الحكمه بالقاهره والتى شرفت بحضورها يوم الجمعه الماضى وصوت طبعا ضد القرار (الخاص بزياده مساحه الصيدليه ل40 متر) وهو قرار وزير الصحه ( صاحب دار الفؤاد المشروع الاستثمارى ولن أقول المستشفى )
الأمر أصبح لا يحتمل أن كل قرار يصدر (مثل قرار الضرائب ايضا) نحتاج فيه لرجوع حقنا أضراب أو أعتصام مهما بدا شئ جميل لكنه ليس الحل ( النقابه كان لها دور أكيد وأصبح لها دور حاليا قوى ومتين المفروض لأنصاف أى صيدلى- حكومى أو خاص )
قانون الصيدله ولن أقول التفتيش الباليه التى طبقت بقرار
منذ عام 1958 م لا تصلح بالتأكيد لأى صيدلى منحرف
وهم عدد كبير للأسف حاليا ففساد الصيادله ( ككل سيئه تنتشر أكثر من الحسنه) من شراء أدويه مجهوله المصدر والهويه ( من مخازن أدويه طبعا غير مرخصه ) لشراء أدويه مهربه غير مسجله بالوزاره
لبيع أدويه مؤثره على الحاله النفسيه ( منومات مخدرات مسكنات) بدون روشتات رسميه من طبيب ( زى تجار المخدرات تمام )
الى بيع بأسعار خارج التسعيره ( أعلى أو أقل ) لأساليب أكثر التواء من منافسه زميله الصيدلى بالاتفاق مع الاطباء ( بنسميه الشغل الغير نظيف ) لمصايب كتير تانيه

لا أعرف كيف ينصلح حال الصيدلى ألا بقانون يحمى الشريف
ويجرم المنحرف والكل تحت طائلته ( لأن فى ناس تخاف ما تختشيش)

العام الماضى تفاءلت خير بتعيين صيدلى لأول مره كمساعد
لوزير الصحه فى الشئون الصيدليه ( والذى يشغل منصب مشابه فى ايرلندا – يعنى مش محتاج المنصب ولا الفلوس)
وهو الرجل الجنتلمان كما احب ان اسميه ( د\ كمال صبره ) لأنى ألتقيت بهذا الصيدلى الناجح ثلاث مرات العام الماضى فى مؤتمرين بأسيوط والقاهره واحتفاليه يوم الصيدلى بشهر أكتوبر الماضى بالمنيا – أصلح بعض الشئ الحق
ولكن مازال الخراب يدمر فى الأساسيات الصيدليه

1- نحتاج لأشخاص نزيهه ونظيفه اليد وشريفه (وهذا المستحيل الرابع كما هو واضح فى منظومه الفساد فى كل ما هو حكومى )
فى المواقع الاخرى بالوزاره وكل هيئات الصيدله والدواء

2- بجانب تحسين أوضاع (مرتبات وحوافز ) الصيدلى الحكومى
على الأقل يتساوى مع زميله الطبيب فى الكادر ليتقن عمله ( المفروض دى مسأله ضمير بس التشجيع كويس بردوا للحياه الكريمه )

3- اجراء انتخابات للنقباء فى كل نقابات الجمهوريه تكون ايضا نزيهه لأن أى نقيب موجود من اكثر من 10 سنوات والدور الآن لجيل الشباب ( أمثالى طبعا - فنفسى أرشح نفسى أكيد- من باب المساواه يا جماعه وحقوق المرأه و ماما سوزان)

4- تغير كل قوانين التفتيش الصيدلى خاصه غرامه المحاضر
( يعنى حد يصدق غرامه عدم وجود صيدلى بالصيدليه حوالى 10 جنيه- يعنى لما تبقى 1000 الى 10 الاف ما اعتقدش هيستهين الصيادله بحياه الناس ويخلى واحد تعليم متوسط يصرف الدوا بالشبه والافتاء كأنه دكتور)

مهنه الصيدلى ككل مهنه أخرى الاصل فيها الضمير والاخلاق
ولكن الانسان الذى تسكنه هو الذ1ى أصبح نادر ( ولكن شاءت ظروف حياتى أن ألتقى بصيدلانيه بعتبرها أختى الكبيره وصيدلى فى مقام الوالد عملت معهم جعلونى أحب المهنه التى لم أحبها بعد دراستها للاسف لأن الدراسه شئ والعمل شئ أخر تمام ويمكن هما السبب بوجود أمل فى الاصلاح وأن بكره يكون أحسن

وربنا يشفينا جميعا – لان دايما بعتقد أننا جميعا مرضى—بشئ ما

هناك 8 تعليقات:

تايه في وسط البلد يقول...

بالصدفة كنت مارا امام دار الحكمة وشاهدت تجمعا عرفت فيما بعد انه للصيادلة( حتي كان فيه حد بيتكلم في الميكروفون عن كليات التمريض والممرضات وكده)!

والمهنة في العموم مثل اي شئ في مصر تحتاج لضبط
وفي رأيي فان اهلها اولي بضبط امورها وأقرب من اي احد اخر

تحياتي

صيدلانيه طالعه نازله يقول...

يظهر اننا بقت عاده عندنا كل سنه لينا اضراب و خناقه السنه اللى فاتت كان 17 فبراير و السنه دى شكله قريب

مش عارفه ليه هما بيعملوا معانا كده و الظاهر انهم بعد موضوع الضرايب السنه اللى فاتت حبوا ينتقموا مننا بموضوع مساحه اصيدليات و الاشتراطات الصحيه الجديده

ربنا يساعد الجميع و يعدى الازمه

فتاه من الصعيد يقول...

دوسو ع الحكومه ... 40 متر ليه هو هيتجوز فيها

وروا الحكومه العين الحمرا وهي تتلم :)
اصلها ما بتجيش غير على الناس المحترمه

تحياتي

Hossam يقول...

بجد حرام عليكى,مش تخدى بالك ان حسحس صديقك فى صيدلة بردة كدة تحبطية hahahahahahhahahaahhahahahaha
بجد موضوع تحفة طبعا عشان انا فى صيدلة فاهتميت انى اقراة بس الحمد لله دخلت الابرنامج الجديد اللى اسمة clinical pharmacy
وهننزل تدريب من سنة تانية او تالتة مخع طلاب طب الامتياز بس تفتكرى دى هيتعمل بجد فى مصر؟
اتمنى
تحياتى صديقتى

بسنت يقول...

تايه
ماينفعش الكلام دا خالص
يعنى كنت جنب دار الحكمه وما دخلت تساند اخواتك الصيادله

وكمان مش عايز تقول ضوابط ايه
لا تنسى انك مواطن وبتمرض-لاقدر الله-
يبقى الدوا دا شئ اساسى فى حياه كل واحد منا ازى نقول ان اهلها اولى بيها
لا كلنا سواء صيادله او لا اولى بيها مادامنا بنتناولها

لعلمك الى خلانا نعرف مثلا ان الدوا مغشوش شكوى اكتر من واحد ان الدوا مش بيجيب تأثير او ان السعر غلى عن ما كان زمان مثلا وهكذا
تعاون الجميعه يعنى

دمت بكل الخير

بسنت يقول...

علا
الموضوع لسه طبعا ماخلص
وانا اثرت نقطه واحده وهى المساحه ولكن فى اشتراطات اقل قسوه وهى التوصيل بشبكه نت على اعتبار ان فى تليفون اصلا
والتهويه بالتكييف كمان فيها مشقه على الصيدلى لحد ما بالرغم انها طبعا الاكثر صحيه لحفظ الدواء
الامور متأزمه جدا وخاصه هنا بالمنيا
عاملين مشاكل وصلت لمحافظ ربنا يسترها
دعواتك

بسنت يقول...

مروى
ههههه والله عندك حق
امال لو عرفتى ان السلاسل زى سيف والعزبى بتوصل ل 500 متر
يعنى فى صيدليه فى روكسى كانت فى الاصل معرض سيارات شيفروليه وبقت صيدليه
دا احنا غلابنيين اوى والله

للاسف انا اكتشفت ان الحكومه دى كبيرها السلطه والفلوس ربنا ما يوريكى ممكن يعملوا فيكى ايه بسلطتهم

ربنا يبعدنا عن شرهم
قولى آمين

بسنت يقول...

حسام
ازيك الاول وان شاءالله يكون الترم التانى سعيد وكله نشاط

شوف انت مادمت دخلت الكليه برجليك بقيت صيدلى ربنا يسهل
ويهمك كل شئ المفروض يعنى- يتعلق بالصيادلهولعلمك اللى انضر اكتر هما الشباب الرجال لانهم الى المفروض محتاجين دعم لتكوين نفسهم لحياتهم المستقبليه

ونظام الصيدله الاكلينيكيه-او السريريه هو نظام جديد بمواد تميل اكتر للطب وطبيعى تتدرب معاهم لان شغللك فى المستقبل المفروض كله مستشفيات
هو نظام ظريف ومطلوب جدا دلوقتى
بس مش الاساس اساسك مهما حصل فى الصيدليات الا لو اتجهت للدراسات العليا والتدريس
ربنا يوفقك