الخميس، 8 أكتوبر، 2009

ما تفوقى بقى يا مصر


مش عارفه مش حاسه بيا ليه يا مصر
ولا كأنك تعرفينى ولا أعرفك

فكرت أكتبلك رساله قلت يمكن تفهمينى
يمكن لما تنطقى يوم هتردى عليا وتكلمينى

وبعد ,,,,, يا مصر

بقيتى ضعيفه أوى كدا ليه؟
بعتى كل حاجه فيكى لغريب
نفسى أعرف فاضل ليا فيكى أيه


خايفه أبطل أحبك يا مصر
لا أنا خايفه أكرهك وما أرجعلكيش
ويوم ما تحتاجينى جنبك أكون على أرض
تانيه بعيد هناك كأنسانه
بجد بعيش


هتتحررى من أستعمارك أمتى يا مصر؟
هتخرجى من ذُلك دا وهسمع للحريه فيكى أمتى صوت
ولا هتفضلى بقهرتى عليكى كدا لحد ما يجى
علينا سوا ميعاد الموت

سمعانى يا مصر؟
الخير اللى كان بيتباهو إنه مغطيكى
وبلد الامن والامان حواليا وانا بدور عليكى
والناس الطيبه والزرع الاخضر اللى اختفوا على
اراضيكى

فين هما يا مصر؟
فاكره صلاه العيد وضرب الصواريخ
فاكره طوابير المدرسه والاحترام للكبير والتلاميذ
فاكره الحرب علشانك والشهيد على الجبهه

فكرتك بكل حاجه ولا لسه ناسيه؟

وأخيرا يا مصر
نفسى أسمع روحى مره تانيه بتقول فداكى
نفسى يرجع النشيد فى الميكرفون زى زمان
نفسى تتحركى بجنود الارض للاقصى من الميدان
نفسى ترجعى تفتكرى ولادك اللى حبوكى بجد
ويملوا عنيكى وقلبك بالعزه مش الهوان

يا ريت تتشجعى شويه وتجاوبينى

هتفوقى أمتى بقى يا مصر؟

هناك 38 تعليقًا:

شاب فقرى يقول...

هقولك حاجة واحدة بس

ان البلد دى بتتسرق من سبع تلاف سنه ولسه فيها خير

فيها اولادها اللى بيحبوها
وهيخلوا بكره احسن

قولى يارب

وقولى امين :)

وابتسمى للحياة وحاولى تغيرى فيها ولو باى شىء بسيط

شاب فقرى

بسنت يقول...

شاب فقرى
انا بحاول بس للاسف هى مش مسعدانى
زى ما قالى صديق من زمان
حبنا لمصر هو الحب المستحيل
لانه من طرف واحد

شكرا لمتابعتك الجميله
دمت بخير

romansy يقول...

وشرفك يا بلدى
سحابة وتعدى
وبرضة أنتى بلدى

مهما عملوا يا بلدى فيكى
أحنا ليكى
احنا بيكى
دا أحنا ياما خدنا منك ... فيها أية لو يوم نديكى

romansy يقول...

كلنا بنحب مصر
كلنا بنخاف عليها ونتمنى انها تبقى دايما ودايما رافعها راسها لفوق
نتمنتى ان عمر ما يهزمها طوق
نتماها عاليه دايما
بس صدقينى هتفوق هتفوق

المهاجر يقول...

شكرا على المشاعر التى تكنيها لوطننا الحبيب
ويا ريت القيم التى كانت موجوده ترجع
ولكن كل هذه القيم تدبلت للاسوءوالاسوء
نسأل الله أن يعيد الخير على بلدنا الحبيبة

كاتب مصري يقول...

وحشتني المدونة جدا وحشني الي فيها ووحشني المكان واصحابه

ازيك أنا جي أسلم وأمسي ع السريع وليا عودة للقراءة

بس ده إعلام لكي يعني اني رجعت لمدونتي تاني بعد فترة طويلة من الإهمال بسبب ظروف خاصة

هرجع هنا وهكون موجود علطول بإذن الله

دمتي بكل ود

تحياتي

كلمة حق يقول...

السلام عليكم ورحمة الله وبركاته

أختى الكريمة

يجب أن نفرق بين مصر والمتحكمين فى مصر

اما مصر فهى حبيبة لقلوبنا جميعاً ولن يتأثر هذا الحب مهما تغيرت الظروف ومهما فعل المحكمين فيها فهو حب عقائدى فلقد ذكرها الله فى القرأن وأثنى عليها رسول الله صلى الله عليه وسلم .

أما المتحكمين فيى مصر فنقول لهم كفاية بقى ارحموا من فى الارض يرحمكم من فى السماء

وأنا كلى يقين بأن هناك طائفة من هذه الامة يعلمون للإصلاح وبإذن الله سيكون صلاحها بتوفيق الله على أيديهم

والسؤال الأن الى أى طائفة ننتمى نحن للمخربين أم المصلحين


جزاك الله خير

أخيكى
أبو مريم

صفــــــاء يقول...

لا تنتظرى من مصر انها ترد عليكى قريب
ومش عاوزة اقولك أفقدى الأمل ولا تنتظرى رد على الاطلاق لأن فقدان الأمل يأس والعياذ بالله
بس مصر هتفضل سلبيه وهتفضل مستسلمه لحد ما يدبحو أخر رجا فيها

ولو لقيتى يا دكتور ارض تانيه تقفى فيها وتبصى لمصر من بعيد
روحى لأن الارض دى هى اللى مبقتش بتبص لنا

mohamed ghalia يقول...

يارب يقرب اليوم

الثريا يقول...

عندما كنت صغيرة كنت اسمع نشيد(مع اعتزازي بنشيد بلدي طبعا الأصلي وتعلمته في المدرسة ) :
بلادي بلادي بلادي لك حبي فؤادي
وكنت اظن بأنه نشيد بلدي وتربيت وأنا اسمع كل تلفاز وكل مذياع يهتف به وأول معلمه لي منذنعومة أظافري هي مصرية طيبة القلب وأول دكتورة علمتني هي مصرية شامخه كالقاهرة فتحياتي لك

تايه في وسط البلد يقول...

اهلا بسنت

كل سنة وانت طيبة

بالنسبة لهذه الكلمات فانا اشهد بصدقها وتعبيرها الرائع حتي ولو لم يتم تصنيفها كشعر او نثر

يكفي بها كلمات صادقة يا بخت مصر بيها


وبالنسبة للتدوين الفائت فتأخري عنه كان تردداً لأنك مررتي لي تاجا صعباً
وان كنت دوما اراجع افكاري اولا باول واتخلي عن الذي اراه جامدا دون داع لذا فقد تسلمت منك التاج ولك كل الشكر وبهذا فقد نجحتي في تحديد البوست القادم لي وهذا شئ لم انجح فيه انا شخصياً

دمتي بالف خير

معتز شاهين - باحث تربوي يقول...

وأنا والله نفسي أرجع لكي يامصر
أتكيتي على الجرح
أمتى ترجع مصر؟

تحياتي

ويبقى التواصل

بسنت يقول...

احمد الرومانسى
انا بحب مصر دا انا حتى كتبالها تعيشى يا مصر كعنوان عندى على طول
بس اللى بتعملوا فينا اكيد طبعا مش اقصد الارض هى الحكومه والمسئولين والفساد اللى مالوش اخر دا
هيخلونا نكرها لوجودهم فيها

شكرا لتواصلك الجميل
دمت بخير

بسنت يقول...

المهاجر
كلنا بنقول ياريت
بس النوايا والامنيات وحدها لا تكفى

دمت بخير

بسنت يقول...

كاتب مصرى
حمد الله على السلامه
هى غيبه فعلا وان شاءالله تكون وفقت فيها

فى انتظار مرورك الجميل دوما

دمت بخير

بسنت يقول...

كلمه حق
انا اتمنى طبعا اكون فى الجانب الصالح
وانت اكيد عارف صعوبه العيش فى البلد دى وسط كم الفساد والغش فى حياتنا كلها
بس بحاول بردوا
نورت المدونه ابو مريم
ودمت بخير

بسنت يقول...

صفاء
الاول نورتى
ثانيا انتى ليكى استجواب بسيط كدا فى البوست اللى قبل دا بيسموه تاج قال

ثالثا انا نفسى فعلا الاقى الارض التانيه دى
ولو تعرفى فيلم never land
هى الارض دى اللى نفسى الاقيها

بلدياتى الجميله
دمتى بخير

بسنت يقول...

محمد غاليا
فينك من زمان
وربنا يقبل منك ويقرب البعيد

دمت بخير

بسنت يقول...

ثريا
بدايه نورتى المدونه
ثانيا اوعى تفتكرى انى بكره مصر
لا دا عتاب كدا بينى وبينها
اسمه عتاب الاحباء مش هجاء يعنى ولا حاجه

لانى نفسى اشوفها احسن مكان فى الدنيا
بدون كل الفساد اللى وصل فيها واكيد انتى عارفه ان دا وصل لكل الدول العربيه
لاننا فى مركب واحده قربت تغرق

دمتى بخير

بسنت يقول...

تايه
وانت بكل الخير
تعرف انا كنت هسميها لى كلام ليكى يا مصر
لانى طبعا مش بعرف اكتب شعر ولا يحزنون
هى خاطره لا اكثر= بدون تصنيف


ثانيا عذرك مقبول مؤقتا لحين ظهوره لنور
وواضح انى دبستك
بس معلش علشان تدى نفسك فرصه تكلم نفسك انا بعتبر التاج او الاستجواب دا كدا تذكير بحاجات واحلام وناس تانيه

دمت بخير

بسنت يقول...

معتز
السؤال محتاج اجابه
نتركها مصر تجاوب براحتها
المهم ما تاخدها السنين وتنسى انها اتسألت


دمت بخير

نبراس العتمة يقول...

مشاعر وطنية متميزة
لأني رأيت كثيرا ممن يتحاملون ضد وطنهم وكثيرا ممن يبالغون في حب ينبيء أن الأحوال بخير
ولم أر هذه الحنيو والمعاتبة الجميلة في مخاطبة عفوية وغير متكلفة حتى أن التعليقات ردت عليك تواسيك في أعز ما لديك وهذا دليل على أنك حزت تعاطفا جميلا
الله يخليك لمصر
الله يخلي ليك مصر

مودتي

الازهرى يقول...

مصر
كلمة فى الوجدان
اتمنى ان تكون كما نرجوا جميعا عن قريب


تحياتى دوما

تحذير صحي : هذه المدونة تسبب أمراض الهلوسه يقول...

لا أعرف ماذا أقول لانه موضوع محلي

بارك الله دياركم

عبد من عباد الله يقول...

مصر ههههههه

مصر هى امي .. نيلها هو دمي

علشان كده امي جالها السكر ، و انا دمي اتحرق

بسنت يقول...

شكيب
يا ريت فعلنا ربنا يخليلنا مصر

دا عتاب زى ما قلت قبل كدا
بس للاسف بلا رد

دمت طيب

بسنت يقول...

الازهرى

انت عارف مصر مش كل الى بنتمناه ليها بيكون
بس مين عارف
دمت طيب

بسنت يقول...

الرجل اللى رحل

مش عارفه ايه اللى انت كاتبه
بس انا متأكده انك شربت من نيلها
ودى الاعراض

ربنا يبارك ديارنا فيها

دمت طيب

بسنت يقول...

عبد من عباد الله
عادى كلنا كدا
مرضى بيها وفيها
ولسه على فكره ياما هنشوف
بلد العجائب هى
وبلاش موضوع مصر هى امى دى علشان بتفكرنى بكتاب اسامه غريب لو قريته

دمت طيب

نهر الحب يقول...

البلد دى بلد المعانة
كلها بتعانى فى كل زمن ومع كل نظام لكن مازالت صامدة

اسلوبك جميل
تحياتى

micheal يقول...

يا رب تكون لسه سامعة والغمة تروح

صفــــــاء يقول...

الله الله على مدونتك التانيه
اول مرة اشوفها النهاردة
قد ايه جميله مسليه ومميزة
كمان شوفت التاجين اللى اجاباتك عليهم فعلا جميله
بس والنبى والنبى اعفينى من التاج احسن انا ولا بعرف اجاوبها ولا بلاقى كلام اقوله فيها

سلامى ومودتى لك

بسنت يقول...

نهر الحب
ايوا هى لسه صامده بس الواحد
عايزها صامده وشجاعه وعادله

انتى الاجمل ايناس

دمتى بخير

بسنت يقول...

مايكل ربنا يسهلها ان شاء الله
انت ليك تاج على فكره
هقولك فى مدونتك

دمت بخير

بسنت يقول...

يااه يا صفاء انتى لغايه دلوقتى متعرفيش مدونتى التانيه
على العموم انا سعيده انها عجبتك
والعذر بتاع التاج مش مقبول اوى يعنى
بس سماح علشان انتى بلدياتى

دمتى بخير

hasona يقول...

السلام عليكم

عا فسنا تفوق

لكل المشكلة مشفي مصر

عمرناما هنكره مصر

المشكلة الكبيرفي مجموعة حكمت مصر
وبتحاول تذلها وتخضعها

لكن هانت وقريبا-مر هتنفض عبائتها من كل هذه الاتربة لتي علق عليها
ومن كلما توثت ب خلال 25 نة أو يزيد



تحياتي

بسنت يقول...

حسونه
شكرا على مرورك الكريم
دمت بخير

هانى سعيد يقول...

وانا كمان نفسى اعرف والله امتى هتفوق مصر بالله عليكى لو عرفتى تقوليلى لانى مستنى بقالى كتير وخايف اموت قبل ما اعيش لحظة فوقة بلادى ورجوعها لنفسها ولولادها واهلها
تحياتى