الثلاثاء، 6 أكتوبر 2009

استراحه


بدايه اليوم اجازه بمناسبه جميله هى نصر اكتوبر
1973 طبعا التاريخ دا بالنسبه لافكارى حاليا مهم جدا
تاريخيا ومعنويا ونظرا لظروف الروقان اللى انا فيها
مؤقتا قبل الطحن اللى بضجيج اللى هكون فيه من الاسبوع القادم
ففرصه ترفيه شويه بحل التاجين دول
الاول من بسنت صلاح الجميله التى اتفق معاها تمامافى مناصرتها للمرأه
بحكم انتمائى لجمعيه أهليه لتنميه المرأه
***************************************
((
أذكر خمس أحلام على الاقل ..تخص ماضيك وتحلم فيها بتغيير اشياء
..ماذا ستعدل وماذا ستترك؟؟))

الاول= حلم حفظ القرأن الكريم كاملا من الطفوله
بس ان شاء الله اكمله فى المستقبل القريب

التانى= حلم كليه الاعلام حلم قديم اوى
بس مش هغيره لان الصيدله اضافت ليا كتير

التالت= حلم انى اسيب مصر واسافر
او اهاجر بس حلم بعدله تماما لانى اكتشفت
ان ارتباطى بمصر كل ما اكبر بيزداد

الرابع= اتقن لغات تانيه غير الانجليزى بس
هو صعب حاليا فعدلته

الخامس= جمعيه لى ولخدمه كل امرأه او بنت فى بلدتى
هو حلم قديم جديد ودايما بردده علشان ما انسهوش
طبعا هسيبه بلا تعديل

*************************************

أذكر خمس أحلام على الأقل ..تخص مستقبلك ؟؟؟

الاول= اخلص دبلومه الصيدله الاكلينكيه على خير الاول
وممكن افكر اعمل ماجستير

التانى= بحلم انى استقر نهائى واعمل اسره
خاصه بى مع شخص مختلف نهائى بردوا

التالت= اسافر لفتره مؤقته واشوف بلاد جديده
عربيه او اجنبيه

الرابع= احج او اعمل عمره مع ابى وامى
حلم غالى اوى عندى

الخامس= اعمل مكتبه اكبر بكتير من اللى عندى حاليا
والاهم اقرى كل الكتب اللى فيها


هخليهم 6 احلام علشان الجمعيه اللى ربنا يسهل وانفذها
ولو حاجه صغيره جدا ترضى طموحى الكبير فيها

****************************************

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن؟

اصدقائى فى الشغل الجديد لانهم خلونى اعرف يعنى ايه اسره فى الشغل
حب حقيقى خارج ضغوط الشغل الناس دى اثرت فيا ومش ممكن انساهم

صديقتى المسافره حاليا وتوأم روحى اثرت فيا بدايه من
قراءتها فى الدين كتابتها للشعر وهى احد
اسباب تغير افكارى فى حاجات كتيره سواء معاها او ضدها
كانت السبب فيها بردوا والسبب الاهم اننا بنشعر ببعض
عن بعد

بعض الدعاه مثل الدكتور محمد العريفى الذى كان سبب
تغير سلوكيات فيا خاصه بعد قراءتى لكتابه استمتع بحياتك

واكيد الدكتور عمرو خالد اللى كل ما اقراله كتاب
او اسمع له برنامج اعرف ان مصر لسه بخير وفيها ناس شرفاء

*******************************************

-
أذكر شخصين على الأقل غير متواجدين فى حياتك حاليا كنت تود
وجودهم الان او فى حياة اولادك مستقبلا ..

اصدقاء العمل القديم وهما شخصيتين فعلا كنت اتمنى يتواجدوا معايا
فى عملى الجديد ونفسى تفضل علاقتى بيهم فى المستقبل بردوا
زى دلوقتى واحسن


فى شخصين تانين اصدقائى ايضا ساعدونى كتير فى بدايات
كتاباتى واثروا فى مجريات حياتى وافكارى
ادعو ربنا تعالى ان يكرمهم ويوفقهم لانى لا اعرف عنهم
شئ حاليا بس فعلا اتذكرهم بكل خير


المدونين اى شخص اقريتله اى شئ مفيد او غير مفيد
بس فعلا عالم التدوين اتمنى افضل متابعه اصحابه
حتى لو شاءت ظروف وتوقفت عنه

\\\\\\\\\\\\\\\\\\\\\\\\\\\\\\\\\\\\\\\\\\\\\

التاج التانى من اخويا الصغير بس كبير افكارا
حسام شاهين صاحب رؤيه تسامح الديانات و حوار الحضارات


اسمك؟؟
على النت بسنت

سنك؟؟
28 سنه

اسم مدونتك؟؟
الاولى=خواطر شابه تعيش مع الاخرين وتريد ان تكون هى
التانيه= من قراءاتى
التالته= حلم الجنوبى ودى مشتركه مع مدونين اخرين



مجال دراستك؟؟
نقول عملى الصيدله

هل فكرت فى اغلاق مدونتك؟؟ والسبب؟؟
طبعا ودا بعد شهر من عملها لانى ما كنتش لاقيه ليها اى
معنى بجانب ما كنتش اعرف اى مدونات تانيه اتواصل معاها


أيه رد فعلك لو حد قل أدبة عليك فى المدونة؟؟
الحمد لله ما حصلتش بس انا بعتبر اى شخص سلوكه معبر عنه
سواء كلام او فعل والغير محترم سأتعامل معاه بسلوكى
مش تبعا للى هو كاتبه


أسوأ مدونة دخلتها؟؟
اى مدونه تعرض صور غير محترمه بعتبرها سيئه
اما عن الفكر فانا اؤمن بحريه الافكار
بس بشرط ما تسئ لغير شخص المدون نفسه


هايحصل ايه لأيميلك بعد لما تموت ؟؟
يمكن يفضل يمكن يموت بردوا


عطيت الباسوورد لحد قبل كدة ؟؟
ايوا لاختى


السفر بالنسبة لك؟؟
حلم جميل بيغير فى شخصيتى جدا حتى لو داخل مصر
كل سفريه بتعلم منها شئ فى التعامل مع ناس
مختلفه بجانب رؤيه اماكن ومعالم مؤثره فى ناس عاشت
فيها بس تركت اثر كل سفر برجع منه بالتأكيد احسن



المود بتاعك ايه ؟؟
غالبا هاديه بس ساعات يقلب اكتئاب
ساعات يقلب روقان


بتعمل ايه ف وقت فراغك ؟؟
القرايه هوايتى المحببه
او بنام


الأكلات المفضلة ؟؟
محشى ورق العنب و البوفتيك
والفراخ المشويه والارز بالخلطه و الجلاش بالمفروم
والفاصوليا واللوبيا الخضراء


الصفات اللى أخدتها عن والدك ؟؟
التواضع والعصبيه
ومساعده اى حد حتى بدون سابق معرفه
حب العمل واتقانه
حب الاهل وصله الرحم



الصفات اللى اخدتها من والدتك ؟؟
الطيبه والنظافه
مراعاه الاخرين وخاصه حق الجيران
حب الاهل وصله الرحم بردوا
تكوين صداقات



اكتر ست حاجات بتحبهم ؟؟
1-القراءة
2- تجميع الصور وكتابه المقولات فى اجنده خاصه لدى
3- يوم عمل خير سواء مع الجمعيه او لوحدى لناس محتاجه
4-اعمال الكروشيه والتطريز
5-مشاهده الافلام الاجنبيه الدراميه والاجتماعيه
6- سفرى القاهره خاصه فتره معرض الكتاب كل سنه
هضيف ليهم حاجه 7- شراء الكتب والمجلات ايضا متعه


أكتر ست حاجات بتكرههم ؟؟
1-الخيانه
2-الفراق
3-التقليد لاى شخص لان كل شخص له ميزته الشخصيه
4-الكدب
5-عدم الشعور بالامان
6- المواصلات الا المترو


شخصيتك نوعها ايه ؟؟
هاديه وغير اجتماعيه لحد ما
حاده الاراء احيانا كتيره


لماذا دخلت عالم التدوين من الأساس ؟؟
كترفيه فى اوقات اللى بكون فاضيه بعيد عن الشغل
و قلت اجرب شئ جديد وليه علاقه بالكتابه
لانى بحب الكتابه من زمان


احلى جملة قيلت فى وصف مدونتك ؟؟
ان لغتها بسيطه والمدونه نفسها بسيطه
وفى جمله عجبتنى اوى قالتها ايناس ( نهر الحب)
انها مريحه نفسيا


أهمية التعليقات بالنسبة لك ؟؟
تواصل مع ناس تانيه ممكن تفهم قصدى وممكن لأ
واحيانا بيكون التعليق نفسه اهم من اللى كاتباه
وبيضيف ليا شئ جديد فعلا بتعلمه


أحلى بوست كتبته مع ذكر السبب ؟؟
فى مدونه خواطر شابه = موضوع (آيات الله تعالى)
لان الايات دى فعلا زى ما كتبت بتأثر فيا كل مره
اقراها وبتهزنى فعلا

فى مدونه من قراءاتى = (سقف الكفايه)
لان الروايه ما عجبتنى ابدا بس قدرت اطلع مقولات منها
اثرت فيا كتير بعيدا عن ملل الروايه نفسها


أفضل مدونة قرأتها ؟؟
الصراحه كل المدونات اللى كتباها عندى فى مدونتى من قراءاتى
بعتبرها مفضله وان كنت مش كلها بعلق فيها بس متابعاها باهتمام
بس مدونه ( أم البنين) مدونه بستفيد منها دينيا فعلا


الشغل بالنسبة لك ؟؟
استقلال مادى عن اسرتى طبعا
والحياه الحقيقيه( الخيير والشرير) بعيدا عن حمايه اسرتى بردوا
محاوله اصلاح اوضاع ساءت للاسف فى مجالى من جانب صيادله اخرين
وبحمايه قوانين باليه

أهمية الأنترنت بالنسبة لك ؟؟
1- وسيله تواصل مع اخواتى واصدقائى فى حالات السفر
وبعد المسافات وصعوبه الاتصال

2-موسوعه معلومات حاضره فى اى وقت عن اى شئ

3-ترفيه( زى المدونه كدا والفيس بوك)


تمرر التاج ده لمين ؟؟؟

هما حاليا تاجين فالاتين اللى عايز يجاوب عن واحد بس ماشى
عن الاتنين ما فيش مانع بردوا
----------------
سمر صاحبه مدونه همس السمر
سهر صاحبه مدونه سهر
الباشمهندس احمد صاحب مدونه بالترجمه - المواطن المكافح
دكتور احمد عثمان صاحب مدونه وجه جديد
محمد الديب صاحب مدونه عايز اقول
الست فرويد صاحبه مدونه حكاوى الست فرويد
نهار صاحبه مدونه - بالترجمه م س ك
اللى مش تايه فى وسط البلد صاحب مدونه وسط البلد
الازهرى صاحب مدونه الفارس الاخير
صفاء صاحبه مدونه عصفور فى الاسر
مايكل صاحب مدونه مايكليتو
هاجر صاحبه مدونه مشاعر صنعت كلمات
احمد زكى صاحب مدونه دردشه عربى
الصيدلانيه صاحبه مدونه صيدلانيه طالعه نازله
انا حره صاحبه مدونه بنوته مصريه
كيميت صاحبه مدونه فى حبك انت
الشاب الفقرى صاحب مدونه يوميات شاب فقرى
دهب صاحبه مدونه طوبه فضه طوبه دهب
----------------------
اللى جاله التاجين من قبل يبقى عذره مقبول
واللى نسيتهم ان شاء الله افتكرهم وارجع اضيفهم

هناك 13 تعليقًا:

ســـــــهــــــــــر يقول...

ولا كانى شوفت اسمى اصلا
امبارح كنت بعملك رد ف البوست اللى قبل ده و الدنيا هنجت
فجيت النهارده لقيت بوست جديد
كل يوم و انتى كاتبه بوست جديد ( دعوه ليكى او بالاحرى لينا ) عشان كل بوست بتكتبيه بتلمسى بيه حاجه فيا

الازهرى يقول...

اجابات حلوة
ما عدا السؤال الاخير
لقيت اسمى واتصدمت على العموم قضا اخف من قضا
انا حليت واحد قبل كده

http://fritend.blogspot.com/2009/05/blog-post_22.html

وربنا يعيننا على التانى

شاب فقرى يقول...

كل سنة وانتى طيبة

صراحة متوقعتش الاقى اسمى خالص :$

كمان فى حاجة انتى اكيد مش تعرفى المترو كويس

انا فى مرة ركبت المترو دا وجالى هبوط حاد وكان هيغمى عليه من التعب :$

مش عشان انا شاب اى كلام
بس عشان كان عامل زى الفرن فعلا

قبل ظهور الانفلونزا والحاجات دى بجد كان فرن

انا بقى دلوقت مش بقرب له ولا بركبه غير فى اواوقات بيكون فاضى تماما

وربنا يوفقك فى الجمعية وفى الشغل

انا بفكر اتاخر شوية فى الرد عالتاج دا :$


تحياتى

شاب فقرى

طوبه فضه وطوبه دهب يقول...

كلامك جميل ياقمرايا وليكى وحشه كبيره اوى

طوبه فضه وطوبه دهب يقول...

ربنا يخليكى يا حبيبتى ومرسى على اجمل تاج ياقمر ويارب ديما فى احسن حال ياقمر

بسنت يقول...

سهر الرقيقه اوى
انا عندى نشاط فعلا الايام دى تصدقى انا كنت ناويه اكتب بوست عن اكتوبر النهارده بس قلت نأجلها كام يوم

ولا كأنى قريت الرد اصلا
لازم التاجين يتحلوا

سهر انتى الاجمل صدقا
دمتى بخير

بسنت يقول...

الازهرى
ما فيش صدمات ولا حاجه دا مجرد استجواب عادى جدا يعنى

ولا مفر من الاجابه

دمت بخير

بسنت يقول...

الشاب اللى مش عارفه فقرى فى ايه بالضبط

على فكره التسميه دى ممكن تجيبلك الفقر فعلا
تفاءلوا بالخير تجدوه

والصراحه انا لما بنزل القاهره لا اركب سوى المترو
وعربه السيدات حتى لو كنت واقفه بس بحس بالامان فعلا فيه والراحه

اما المواصلات الاخرى فمافيش داعى لسيرتها
فانتظارها مأساه فحد ذاته

فى انتظار اجابه التاجين
دمت بخير

بسنت يقول...

دهب
نورتى يا دهب
وعايزه اجابات سريعه عن التاجين طبعا

دمتى بخير

تأثير الفراشة يقول...

السلام عليكم و رحمة الله و بركاته

أشكرك على زيارتك لمدونتى و بإذن الله يدوم التواصل

مبروك على التاجين

ربنا يوفقك فى حياتك و تحققى أحلامك بإذن الله

تحياتى لك
دمت بخير

وجه جديد د.أحمد عثمان يقول...

طيب

انا استمتعت بقراءة الاجابات يا دكتورة
و أطلب انك تسمحيني في قبول التاج
بمعنى اني باطالبك انك تعامليني بالآجل بلغة الصيادلة
خاصة اني عليا شيكات (تيجان) كتير
مستحقة الدفع و للأسف متعثر
خليها عليكي بقى

تحياتي و أشكر ثقتك

بسنت يقول...

د نهى
انا الاسعد بزيارتى مدونتك بجانب اسمها
الجميل المرتبط لدى باجمل شعراء العرب محمود درويش

وامنتى اشوفك هنا دايما
دمتى بخير

بسنت يقول...

د احمد
ماشى التأجيل مسموح طبعا لان دى من اساسيات شغلنا
بس فى انتظار تحله بردوا

ودمت بخير