الثلاثاء، 21 يوليو 2009

حقيقه الأشياء


سأبدأ التدوينه الفاصله دى بمقوله جميله تقول

( أحيانا يساعدنا الآخرون بأن يكونوا فى حياتنا فحسب )

ل د\ أحمد خالد توفيق

هكذا كان الاخرون فى يومياتى التى بدأتها تحديدا فى 27-4-2008

وكتبت نهايه البلوك نوت بتاريخ 14 - 7-2009

وهى كانت بردوا مساعده جميله فى خلال السنه وكام شهر اللى مروا

فوجئت بانتهاء الصفحات ومش بفكر اعمل بلوك نوت تانيه حاليا

فمكتفيه بالمدونه حتى اشعار أخر


كانت النصيحه الى قريتها سواء فى كتب التنميه البشريه للدكتور

ابراهيم الفقى او حتى النصائح الخاصه بسلوكيات المرأه فى القرن

دا انها لازم تتخلص من انهزاماتها او حساباتنا اليوميه لانفسنا

بطريقه اكتر فائده وهى تفريغها على الورق ثم قراءتها وبكدا بتفتح الباب لحوار

مع نفسها يومى لتصلح الاخطاء او ترى نفسها بعيونها بعد انتهاء الحدث او لاخذ القرار

المهم انها تكون امامنا لنراجع انفسنا من حين لاخر وكدا

كانت اليوميات دى اللى اعدت قراءه كل ما كتبته قبل

كتابه الجديد يمكن مره او اتنين بلاقى حاجه غريبه جدا

انى المستفيده فعلا ولاقصى درجه

لدرجه انى كتبت فى يوم مشحون نهايه يوميه

انى مسامحه الدنيا - من مقوله ( إن عرفنا حقيقه الاشياء سامحناها)


ولاقيت ان اليوميات ليها حق جميل علي وربما مستقبلا اتخلص منها

لان كتير من محتوياتها لن يعرفه غيرى وليس هناك نيه لنشره مستقبلا

ربما لانى تغيرت من عام وربما لانها انتهت وربما لاسباب كثيره


بس لى رسايل جميله ختمتها فيها اوجهها لناس كانت خير صحبه على ورق

البلوك نوت اللى مسمياها (MINE) وشملت معظم مناقشاتنا وصحبتنا


( رساله لصديقتى وتوأم روحى -HONA- بقولها انا مفتقداكى فعلا

تشجيعك و دعائك وجودك فى حد ذاته بنفس البلد ونفس الشغل

غيرتى فى كتير بنظرتى للامور يكفى رومانسيتك الى عدتنى

وواقعيتى اللى جذبتك فاصبحنا صديقتين متكاملتين

وربما لو بقت اليوميات دى اخليكى تقريها زى ما نفسك تعملى)


( رساله لشغلى القديم بطل معظم اليوميات انا سامحتك بجمله من سامحتهم

وبكل ما سببته لى من تدمير لاعصابى وفقع لمرارتى ورفع لضغطى

سامحتك بكل سوءك اللى الحمد لله لم يؤثر فى سلوكى واخلاقى يوما ما )


( رساله ل -FOFA - اقرب الاصدقاء لى اللى تعرفنى من الداخل عيوبى بمميزاتى

ولكنها تحبنى بالمجموع اقول لها انى مفتقده قربنا القديم حكاياتك المدهشه

روحك اللى دايما بقول عليها - فريش- ذكرت فى يومياتى رحلاتنا اكلنا

همومنا المشتركه- بقولها مفتقداكى بجد ونفسى ربنا يصلح حالنا احنا الاتنين لما يحب ويرضى )


( رساله لشخصين عرفونى من الداخل ولكنهم لم يفهمونى جيدا وعرفتهم من الداخل

ولكن لم افهمهم ايضا - احيانا كثيره اظن اننا ثلاثه جمعهم القدر وفرقتهم الايام الغريب اننا

الثلاثه اصدقاء فى هذا الزمن الصعب فيه الصداقه بالطريقه دى

اقولهم انتما من اجمل من عرفت قلبا وروحا لن انساكم ابدا واتذكركم بكل الخير

فقط سامحونى لو قصرت معكم ولا تنسوا اخت احبتكم فى الله فعلا )


( رساله ليومياتى الجديده ربما تكونى اجمل مما سبق وربما

لا تكونى من الاساس ولكن لتعلمى انى متفاءله بالايام القادمه مهما تكن )


( رساله ليومياتى اللى انتهت شكرا لكى لانك استحملتينى بكل ما فى

شهدتى صفحات حب وفرح وصفحات اكتئاب وحزن وواجهتنى فقط بنفسى

بلا اى رتوش فقط ارجو الا تغضبى لو حرقتك يوما او تخلصت منك

لانى اجيد فعلا- الابتعاد فى اصدق لحظات الاقتراب- دا اكتشاف كان خطير

ولكنها الحقيقه- وانتى قربتى منى اكثر من الازم )


التدوينه دى كتبتها للذكرى فقط لكل شئ جميل عرفته على ورق

ابيض نقى يحمل ختم الادويه( لانها بلوك خاصه بالاطباء )
وبقلم فقط يكتب الصدق


واختمها بمقوله جميله بردوا بتقول ( سافر مع الاوراق قليلا واستمتع

بحيوات اخرى أكثر موده وأقل قسوه- انج بنفسك فالعالم ملئ بالاكاذيب

وليس امامك الا سحر الكتابه والكاتبين

ليس امامك الا الهروب الى هذه والى هؤلاء)

ل جمال الشاعر

هناك 27 تعليقًا:

الست فرويد يقول...

بسنت

تعرفى عندى فضول قوى اقرا يومياتك اللى انتهت :)

اعتقد انها هتكون زاخرة بالمشاعر والافكار والجنون والعقل والالم والفرح ومختومة ببصمة قلبك اللى اعتقد بشكل يقينى انه قلب ذهبى

انا تقريبا قراءة كل البوستات القديمة هنا وفى مدونة قراءتى

بحس ان فى حاجات فينا شبه بعض كتير مش عارفه ليه :)))

علشان كده حاسة بود طاغى ناحيتك

ورغبة قوية فى معرفتك ، بحقق بعض منها بوجودى دايما فى مدونتك

اعتقد انى اتكلمت كتير
نحتصر بقى

باختصار بحبك :)))

واتمنى يومياتك الجديدة وايامك كلها يارب تكون بلون الورد والفرح ان شاء الله

على فكرة انا صعيدية برضه
وان كنت لم اذهب الى هناك الا مرة واحدة فقط :)))


خالص مودتى لكى
وشديد اعجابى واحترامى لكى ايضا

الازهرى يقول...

تعرفى
جميلة جدا فكرة الكتابة لنفسك
فى فترة من عمرى اصابتنى فاجعة وكنت اعيش تائها فنصحت ان اكتب ولو لنفسى فليس من عادتى التحدث وبذلك بدأت ولم انتهى حتى الأن
وبالفعل وجدت صفاءا ذهنيا وروحيا فى ذلك واستطعت تجاوز العديد من الازمات خاصة بعد فراق أصدقائى الأقرب فى المكان لظروف معينة

أغبط مفكرتك أنها عاشرتك كل تلك الايام وحوت من مشاعرك الكثير
كما أغبط أصدقائك على شخصية جمية مثلك

تحياتى دوما وخالص مودتى

بسنت صلاح الدين يقول...

فكره جميله اوى اننا نكتب عشان نسامح كل شىء حوالينا و حياتنا السابقه عشان نبدأ من جديد بنفسيه افضل،اتمنى تكون يومياتك الجديده مليئه بالأفراح ان شاء الله
تقبلى تحياتى

نبراس العتمة يقول...

العزيزة بسنت
تستظلين بمقولات عميقة..لترسيخ عادة الكتابة..
لمست من خلال حديثك عن اليوميات إيمان قاطع بالكتابة والجدوى منها على الأقل تبعدنا عن يأس الحياة وأكاذيبها..
انه الشيء نفسه الذي يجعلني أقول لك اكتبي بحرف مثل سيف مشقوق في طرفيه النصل والوردة
اكتبي وانشري..لا شأن لك بمن يحاسبون النوايا أو يقيدون الأخيلة الجامحة
اكتبي فهناك شفاه تقرأ كأنها تقبل

مودتي

طوبة ذهب وطوبة فضة يقول...

rbna ydem 3leky sdk el a7sas wlkalemat wkol sana wanty wafkark wmodwantk fy afdl 7al

صفــــــاء يقول...

جميله يومياتك
الاجمل أسلوبك فى الكتابه بطريقه النقاط والملاحظات
رسايلك لأصحابك
والاقوال اللى عجبتك
اعتقد ان فكرة اليوميات كلها بتعتمد على فكرة الكتابه للنفس ومصارحتها والمكاشفه مع الذات
بتغيبى كتير بس بترجعى بكتابات ذات وقع مميز ليكى

تحياتى لك

وجه جديد د.أحمد عثمان يقول...

دائما آتي الى هنا
صافي الذهن
منصتا للحرف المكتوب
قارئا السطر الخفي

في كل مرة لا يخيب ظني
فصاحب القلم هنا

انسان

تايه في وسط البلد يقول...

انا لا أري الا رقي ذوقك المتبدي في اختيارك كلمة جمال الشاعر كختام

كل التقدير

hager za3bal يقول...

انا برضو بحب اكتب مقتطفات ومواقف وحكم علمتهاني الحياه وبعملها بوستات خاصه في المدونه ..

بحب اوي البوستات اللي من النوعيه دي ، بحس ان فيها الواحد بيخرج همومه عشان يبدأ فتره تصالح مع النفس عجيبه ..

يارب تكون الفتره دي انتي فيها دلوقتي :)

تحياتي

نهــــــــــار يقول...

السلام عليكم....
جميل أن نحتفظ بذكريات لمجرد الذكرى ....
.....
قليلون من يستطيعون المسامحه ...
فالحمدلله على هذه النعمه ...
....
أحيانا يساعدنا الآخرون بأن يكونوا فى حياتنا فحسب
وأنتي أحدهم...
بالرغم من عدم معرفتي الشخصيه بك ولكن تكفي كلماتك
...
دمتِ بخير

بحب الحكومة يقول...

لو ان الاحساس يشترى

لعرضت عليكى شرائه


بأى تمن

انا استمتعت جدا


تقبلى مرورى

micheal يقول...

اختيارات أكثر من موفقة يا بسنت وأجكمل حاجة تنوعها

إن عرفنا حقيقه الاشياء سامحناه..أكتر جملة عجبتني الصراحة
:)
تحياتي

لحظة تأمل يقول...

لا ادرى كم مرة قرأته
ولكنى قرأت كلماتك كثير جدا

وحقا تعجز كلماتى عن مجاراة تقديرى وحبى لاحساسك فى كتابة هذه الكلمات

محبتى وتقديرى

بسنت يقول...

الود الطاغى متبادل يا فرويده
فأنا ايضا اشعر بشئ قريب عند قراءه قصصك واسلوبك النسائى الجميل فعلا

انا احب ايضا ان اتعرف عليكى اكتر
وشكرا على كلامك الكبير فعلا
دمتى بكل الخير

بسنت يقول...

الازهرى
اعتقد انى انا الاسعد بصحبه الورق ويومياتى فعلا على الاقل بتريحنى وقت عدم وجود من يستمع الى مشاكلى
اما صديقاتى فانا الاسعد بردوا لانهم اجمل ما امللك وعلى فكره هما اكتر من المذكورين فقط لبعد الاتنين لظروفهم الخاصه

سعدت جدا بتعليقك ودمت بكل الخير

بسنت يقول...

بوسى
انا فعلا اليومين دول بامر بظروف صعبه
ونفسى اعمل مذكرات او يوميات جديده

ربنا يسهل
دمتى بكل الخير

بسنت يقول...

شكيب
تعليقك فيه دفعه قويه جدا
ربنا يكرمك
والكتابه فعلا عندى اسهل شئ للتقرب منى شخصيا
افضلها كثيرا عن الكلام وعن كتابه النت حتى
كتابه بصحبه ورقه وقلم

دمت بكل الخير

بسنت يقول...

دهب
شكرا ليكى وكل سنه وانتى بالف خير
بس ياريت بلاش الفرانكو اراب علشان ماليش فيه

دمتى بكل الخير

بسنت يقول...

صفاء
فعلا اليوميات هى احسن وسيله للتكلم مع النفس
هى يمكن مش بتدينى الحل بس بتريحنى كتير

دمتى بكل الخير

بسنت يقول...

د احمد
ايه الغيبه دى كلها؟
ربنا يكرمك لذوقك الكبير
دمت بكل الخير

بسنت يقول...

تايه
وكل الموده لزيارتك الجميله
دمت بكل الخير

بسنت يقول...

هاجر
تعرفى للاسف انا مش فى فتره تصالح
انا فى فتره تساؤلات
علشان كدا عملت فعليا يوميات جديده
بالامس فقط
لعلنى استقر اكتر عبر صفحاتها

دمتى بكل الخير

بسنت يقول...

نهار
نعم تسامح الاخرين والحياه شئ سهل
بالنسبه لتسامح النفس اللى اعتقد انه الاهم دا بعد خبره الايام

ووجودك ايضا شئ جميل حقا يا نهار
لانك من بلد لديها مكانه غاليه عندى جدا

وانا اعتز جدا بعرفتك وان كنت اتمنى اعرفك اكتر

دمتى بكل الخير

بسنت يقول...

بحب الحكومه
بدايه نفسى اعرف طيب بتحبها على ايه بالظبط؟ اكيد انت منهم!

شكرا على زيارتك الكريمه
ودمت بكل الخير

بسنت يقول...

مايكل
شكرا على زيارتك الجميله كالعاده
وياريت تكون بتطبك الجمله دى لان ليها مفعول سحرى للنفس علشان تعرف تواصل فعلا

دمت بكل الخير

بسنت يقول...

لحظه تأمل
وكل الموده لكى لرقه كلماتك

بسعد فعلا بطلتك هنا
دمتى بكل الخير

اعتراف عاشقة يقول...

بسنت .. كيف الحال عزيزتي ؟؟

من الجميل أن نكتب عما يخالجنا لنرفع العتمة من قلوبنا ، ولنغفر الأخطاء أينما وجُدت ...لتبدأ من جديد بصفحة بيضاء مع مَن حولنا... تحياتي