الأربعاء، 18 فبراير 2009

واحه الغروب


 نعيش الآن فى مصر وما تمر به من أزمات على صفيح ساخن
 أو ظلام لا ينجلى
 أو كما لا اريد فى واحه الغروب
 الروايه الأصليه للكاتب الجميل ( بهاء طاهر ) طرحت نفسها كلماته أمامى
 فى ظل أزمتنا كصيادله فى مصر حاليا
 هبدأ الاول بقول بهاء طاهر
 (( أسأل نفسى طوال الوقت عن الخيانه- سألت نفسى كثيرا لماذا خان
 الباشوات والكبار الذين يملكون كل شئ؟
 ولماذا يدفع الصغار دائما الثمن؟ يموتوا فى الحرب ويسجنون فى الهزيمه
 بينما يظل الكبار أحرارا وكبارا !!! ))
 الغريب ان الدنيا او حتى الصحراء كما فى الروايه من طبيعتها الغدر
 بس غدر الناس والمسئولين كتعبير بيكون أشد وأقسى
 بدايه من خيانه الأمانه وهى الموقع اللى هما مش على قدره
 وأنتهاءا بعدم مراعاه الشعب اللى المفروض هم فى خدمتهم
 وخدمه مصالحهم وتعبير عن نفسى كصيدلانيه خدمه الصحه والمواطن العادى
 اللى بيمثله الصيدلى
 يعنى قانون الضرائب العشوائى واقرارت مصلحه الضرائب نفسها كالعاده
 تم تسديده من معظم الصيادله لانهم كمشروعات تعتبر صغيره أقل من المليون
 فالجميع او معظمهم للدقه تم سداد ضريبته بالفعل
 الغريب ان دائما الشرفاء اللى بيدفعوا الثمن
 السؤال أين اصحاب مصانع الادويه ومخازن الادويه وأصحاب جميع المصانع للمنتجات المختلفه
 ومن أصحاب الملايين والمليارات من سداد الضرائب المعلنه
 أنا فعلا فى حيره شديده من اتجاه الحكومه للهاويه
 وخاصه بعد أصبحت الاعتصامات والاضراب هو الحل الامثل( مثل وقفه الاطباء
 الاحتجاجيه واعتصام وظفى الضرايب العقاريه)
  لتستجيب الحكومه او المسئولين و مثل (ازمه سيارات النقل الثقيل ايضا)
 الاسبوع القادم سنحتفل بعيد الصيدلى والشريف خاصه اللى بتضيع حقوقه
 حاليا مع من دخل المجال وتاجر بالادويه وبصحه الناس من ادويه
 ومستحضرات مغشوشه بلا اى جزاء رادع عليهم
 أضراب الصيادله بالامس - 16-2-2009
 أعتقد انه يوم فى تاريخ الصيدله لانه شهد اضراب جماعى
 وصل لنسبه 98% من الصيدليات كانت بالفعل مغلقه بمصر من شمالها لجنوبها
 عوده للروايه مره تانيه هى بتحكى عن الخيانه من مسئولين فى عهد الاحتلال
 بجانب موضوعات تانيه لانى لم انتهى منها بعد
 ولكنها تتحدث من منظور معاصر عن خيانه تحدث الآن و بلا وجود اى احتلال
 والسؤال الى أين ستأخذنا الهاويه هذه المره؟

هناك 18 تعليقًا:

mohamed ghalia يقول...

مش هقدر أجواب بصراحة
لأنى محدش يقدر يقول إحنا رايحين لفين فعلا
دمتى بكل الود

نهــــــــــار يقول...

السلام عليكم ...
عزيزتي بسنت ..
كان الله في عونكم..
........
سمعت الكثير عن هذه الروايه ..
ربما أقرأها يوما ..
..
دمتي بخير

SemSem يقول...

دلوقتى كل حاجه مش بتيجى غير بالاضراب
وياترى مين اللى عليه الدور فى الاضراب

تسنيم حسين يقول...

السلام عليكم ورحمة الله وبركاته

رايحين لفين دى الله وحدة اللى يعلم...
وبالنسبه للخيانه فاحنا كلنا عارفين ان اللى بيخون مابيحبش وبيكره اللى خانه....(اكيد فاهمه قصدى)

والسلام عليكم ورحمة الله وبركاته

الازهرى يقول...

الاضراب معناه ان الامور وصلت الى طرق مسدودة فى الحوار
والاسوأ انه لغة الحوار افتقدت تماما
والقادم اسوأ

تحياتى دوما

بسنت يقول...

المستقبل فعلا فى علم الغيب
بس يا محمد دايما البدايات توحى بالنهايات
ربنا معانا جميعا
دمت بالخير

بسنت يقول...

نهار
وعليكم السلام ورحمه الله
الروايه تستحق القراءه فعلا
وخاصه ان اسلوب بهاء طاهر اعتبره وسط مجموعه الروايات اللى قرأتها متأخير
الاسلوب المهذب السلس
دمتى طيبه

بسنت يقول...

سمسم
اللى عليه الدور باقى فئات المجتمع لان الطاحونه مش بتفرق بين الحبوب وهى بتطحن
ربنا معانا ويقوينا على الحكومه
دمتى بكل الخير

بسنت يقول...

تسنيم
وعليكم السلام ورحمه الله وبركاته

انا بشوف ان الخاين مش كمان بيكره لا دا ضعيف واوى كمان

بس حتى الخيانه ليها نهايه
وبتكون من نفسها

دمتى بكل الخير

بسنت يقول...

الازهرى
انا معاك ان القادم يمكن يكون اسوأ
بس الامل موجود ان الوضع القائم فى مصر
يتغير وتيجى ناس بتحب البلد دى فعلا

دمت طيب

اقصوصه يقول...

قريت هالروايه

فعلا رائعه جدا

روايه تستحق القراءه بحق

تقبل مروري من هنا

بسنت يقول...

اقصوصه
نورتى مدونتى البسيطه
وفى انتظارك دايما
وبهاء طاهر ككاتب يستحق ان نقرأ له كل ما يكتب
ولكن واحه الغروب روايه متفرده عن حق
دمتى بخير

ahmed_k يقول...

للأسف أحنا ربنا كارمنا بحكومه كل هدفها محاربة الشعب في رزقه ومعيشته
وعلى رأي المثل الحكحه في أيد اليتيم عجبه
يعني الحكومه بتصدر قرارات وإجرائات تخصيص وبيع للقطاع العام والمرافق الحيويه بثمن بخس طبعا لأن الأسعر الحقيقيه لا تعلن وتدفع عباره عن عمولات ومتحت الطربيزه
وبعدين لما تحدث أزمات ماليه يطلعولنا بقرارات وقوانين فاشله كل هدفها إستنزاف الناس وإخراج كل ما في جيوبهم لسد رمق الحكومه وعجز موازناتها
ده لو كان في جيوب الناس حاجه فضلت

فالمفروض أن الصيادله مش يضربوا يوم واحد لأ
المفروض الإضراب يكون لإسبوع على الأقل
حتى يكون مأثرا لأن الباشوات لما بيحتاجوا دوا مش بيجيبوه من صيدليات
دول عندهم مصادرهم اللي مبتضربش


وربنا يخلصنا من الحكومه اللي نضفت كل حاجه حتى جيوبنا خدوا الفكه منها

تايه في وسط البلد يقول...

تحية لبهاء طاهر

والسلام عليكم

الا ترين ان موقفك قد تطور قليلا تجاه الخيانة عما كنت اوضحتي لدي قبلا.. تري هل السبب ان الموضوع هذه المرة يمس الصيادلة ام كرها في الخيانة وخلاص؟

وما موقفك من القائمة السوداء؟

عموما وبعيدا عن اي شئ فحركة الصيادلة تمثل نموذجا للحركة الجماعية في مقاومة الخيانة والنتيجة واضحة جدا..لن يكون هناك مضار من اي قوائم بأي لون

تحياتي

بسنت يقول...

احمد زكى
شوف واضح جدا دلوقتى ان الاضراب فعلا بيجيب نتيجه
لانه بحمد الله تم التصالح بين لصيادله ووزير الماليه مش هقول رئيس مصلحه الضرايب لانه كمسئول فى المكان لم يكن على قدر الازمه
والتصالح دا جه فى وقته لان هناك اعاده صياغ لكل حقوق وتعينات حتى حوافز الصيادله والمفتشين ودى حاجه تدعو للتفاؤل الصراحه
ربنا يسهل والحال كله ينصلح
نورت المدونه

بسنت يقول...

اللى مش تايه ابدا

وعليكم السلام ورحمه الله

شوف موقفى ممكن تقول عليه اتحسن مش تطور بس اكيد الخيانه فى حد ذاتها دافع
بس الصراحه الروايه اثرت فيا كتير
وجاءت قرأتى ليها متزامنه مع ازمتى كصيدلانيه اولا وكمفتشه حكوميه ثانيا
يعنى انا فى الوعائين الحاكم والمحكوم

موقفى من القائمه السوداء
اعتقد انى فيه
لان الموضوع لا يحتمل قوائم اخرى يا ابيض يا اسود-- او ممكن تقول معاهم او عليهم-- فعليهم لسه


حركه الصيادله جابت نتيجه بس ليه رد فعل كان سريع حتى ان جاء بعد اسبوع من الاعتصام تحديدا فى يوم الصيدلى 21-2والفضل لوزير الصحه دا مش هننكرها بس يمكن وقفتنا مع بعض كانت حاجه مش بتتكرر كتير لان المصلحه كانت واحده -- زى ما قلهاللى زميل فاضل
بنتحارب فى لقمه عيشنا وفتح بيوتنا
يعنى مش مجرد ادويه ومرضى لا بعد كبير
مجتمع كامل واسر عايزه تعيش
اخى الفاضل انا مش هنكر انى سعيده جدا كصيدلانيه
باللى حققنناه وان كان صغير بس فى تغييرات قادمه فى مصلحتنا كصيادله
الدعاء ان تشمل كل فئات المجتمع
وربنا يرحمنا جميعا

دمت طيب دايما

صفـــــاء يقول...

.
ومن امتى حد كان بيحاسب الكبار

الحساب دايما على الصغيرين بس
.

بسنت يقول...

صفاء
عندك حق طبعا
لان الحياه للاسف غابه والبقاء فيها للاقوى

دمتى بكل الخير