الثلاثاء، 27 يناير، 2009

كلاكيت تانى مره --- تاج


التاج دا بعتتهولى اختى الصغيره الجميله هاجر
وهى فرصه كويسه اوى نغير المود وراحه من الموضوعات الحزينه والكئيبه

الاخيره بتاعتى

-----------------------------------

1- لو كان ينفع تختار عصر تعيش فيه هيبقي انهي؟ ومين الحاكم؟

هما عصرين الاول عصر الفاروق عمر بن الخطاب


الراجل الصحابى الرائع دا بحبه جدا لان شخص حازم وشديد بس فى الحق


والشخصيه دى بتعجبنى جدا



العصر التانى عصر الملكيه بالرغم من سوءه بس نفسى اكون مع السيدات المناضلات


ضد الاحتلال وعلى الجبهه لتضميد الجرحى الجو دا نفسى فعلا اعيشه ولو ربنا اراد وفتحوا الجهاد


والتطوع للحرب ضد اسرائيل الملعونه ان شاء الله اكون من اول المتطوعين



- 2- أول أولويه في حياتك؟


دينى بحاول على قد ما اقدر انى اعمل اى حاجه تغير مفهوم الاخرين فى الاسلام


مش بالكتابه طبعا بالفعل لانه اهم سواء شغل او حياه


وثانيا اسرتى هما حياتى واكتر ناس تحبللى الخير وبتحبنى بجد


واخيرا اصدقائى لان ليهم مكانه غاليه اوى عندى



- 3- أكتر حاجه بتحبها في رمضان؟
صلاه الجماعه فى الجامع فى التراويح


بكون فى حاجه كدا خارج حدود الزمن


والفانوس اللى بنعلقه فى بلكونه غرفتى



4- أوصف أجمل فطار ممكن تفطره؟
. مش مهم الاكل لانى طبييعى اكلى قليل

بس فعلا احسن فطار بفطره كل سنه اليوم اللى بنعزم فيه اخواتى وازواجهم واولادهم

بيكون يوم ما لوش حل لمه ومحبه ورمضان


5- لو انت حاكم هتكون عادل؟ وهتعرف ازاي؟

متهيألى هكون عادله لانى مش بقرر اى قرار غير بعد ما ادرسه واستشير فيه


اسرتى واقرب الناس ليا وناس تانيه مالهاش علاقه بالموضوع بس ناس بتفهم


ودى من رأى صفات الحاكم العادل يسمع كل الاطراف والنظريات والظروف


هعرف ازاى لانى فى موضوع مسئوليه طبيعى فى شغللى دلوقتى


ومسئوله عن صيادله تانيين فى تقدير شغلهم وكتابه تقارير عنهم


بس طبعا لكل انسان اخطاءه اللى لازم يتعلم منها واللى حواليه ينصحوه بردوا

6- مين أكتر اعلامي بتحبه؟


منى الشاذللى - احمد المسلمانى- محمود سعد



- 7- لو ممكن شغلانه تانيه تختار ايه؟


مهندسه معماريه او صحفيه فى القسم الادبى


المهنتين دول بحبهم جدا بالرغم انى ما انفعش فيهم خالص



- 8- تاني بلد تحب تعيش فيه بعد مصر؟


المدينه المنوره

وباريس (مدينه النور)



-9- اوصف ترتيبات أجمل فرح ممكن تحضره؟
- يكون بسيط العريس العروسه فى الكوشه اللى تكون بالورد الطبيعى الابيض او البنبى


والفل وتكون الموسيقى هاديه او انشاد بصوت هادى بردوا وحواليهم فى

الدخول بنات صغيرين جدا كلهم لابسين فساتين نفس الشكل بيضاء طبعا


المعازيم كل واحد ملتزم بالترابيظه بتاعه اللى مكتوب عليها بكارت فى ورده بفازه صغيره خشب


اسم العريس والعروسه ودعاء صغير لهم

والفرح يكون فى سفينه على النيل طبعا وممكن تتحرك لمده ساعه فى النيل خلال الفرح


ويكون فى كل الالعاب الناريه الملونه فى السما خلال الفرح



10- بتراعي كلام الناس والقيل والقال؟ وليه؟


لا - دا الصراحه مش بيهمونى


الا اسرتى واصحابى غير كدا بطنش على الاخر


لانهم مهما عملت مش بيعجبهم العجب-- انا اعمل اللى عليا وخلاص


اللى عاجبه عاجبه اللى مش عاجبه ما يهمنيش ابدا



- 11- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟


فرصه بردوا اجرب عصر تانى



-12- السعاده هي ... ؟


-الامان


-اشوف اصحابى اللى بحبهم وبيحبونى ونتجمع فى اى مكان


-اساعد حد ويشكرنى من قلبه مهما كانت المساعده حاجه بسيطه


-قرايه اى كتاب جديد اكون بحثت عنه كتير



13- عندك أمل؟ وأسبابك؟


دايما عندى امل ومتفاءله


لانى اؤمن ان الاقلام رفعت والصحف جفت وما هو مقدر ليه


هشوفه يبقى الحمد لله على كل شئ



14- لما تحب تهرب من كل حاجه بتروح فين؟
مكانين = الاول غرفتى وسريرى اكتر مكان برتاح فيه ومع نفسى فى غرفتى


التانى الكورنيش على النيل فى المنيا محافظتى فيه اغسل اى هم او حزن


مكان ساحر



15- امتي أخر مره أخدت فيها نفس وقلت ياااااه أنا كبرت؟


السنه اللى فاتت



16- بتشرب سجاير ولا لا؟ وايه رأيك في الستات والرجاله اللي بيشربوا؟


لا طبعا انا ضده بشكل نهائى


واللى بيشربوا بعتبرها حريه شخصيه ما داموا بيشربوا بعيد عنى ومش


بيؤذونى بدخانهم


والصراحه بكره اشوف حد بيدخن


-17- بتعرف ايدك الشمال ازاي؟


دايما بسند عليها وانا بكتب او بقرأ اى كتاب



- 18- أكتر آله موسيقيه بتحبها؟
البيانو



19- ليه الزوق والنخوه اتعدموا؟
علشان ما فيش اخلاق ولا دين بيتعلموا فى البيت او المدرسه


البركه فى التليفزيون والدش والنت حاليا قايم بالواجب تمام


حتى لو فيه هيتعدموا فى ظل الانحلال الاخلاقى اللى بيحصل دا



20- ايه الحاجات اللي لو حصلت هتبقي سعيد؟


(خاصه)


- انى احج ان شاء الله او اعمل عمره


- انى اتجوز شخص محترم ومتدين ومثقف


-انى اعمل جمعيه خيريه خاصه بيا مش مجرد عضوه ومساهمه فيها


(عامه)


-ان مصر تتغير فيها كل حاجه من نظام دوله لنظام شغل تغير شامل بعدل وحريه


-ان الدول العربيه تتوحد لهدف قومى واحد وعمله واحده وسوق واحده


- ان الاعلام العربى يفوق ويبطل التوهان والأى كلام اللى بيقدمه


ويقدموا برامج مفيده موجهه للخارج تصحح صوره الاسلام



21- تحب أرض زراعيه ولا اجنس عربيات ولا كام عماره ولا فلوس في البنك؟


ارض زراعيه لانى بحب لون الزرع الاخضر جدا



-22- تحب البحر ولا النيل؟
-النيل طبعا


23- مركب ولا طياره؟
-طياره لانى لسه ما جربتها


24- شخص مجنون ولا عاقل؟
-مجنون

لان العاقل فى الزمن دا مجنون


25- تقرا كتاب ولا تتفرج علي فيلم؟
- اقرأ كتاب طبعا.

هناك 32 تعليقًا:

أسير الجراح يقول...

اول تعليق


محجوووووووز



اسير الجراح

أسير الجراح يقول...

-22- تحب البحر ولا النيل؟
-النيل طبعا



23- مركب ولا طياره؟
-طياره لانى لسه ما جربتها



24- شخص مجنون ولا عاقل؟
-مجنون

لان العاقل فى الزمن دا مجنون



25- تقرا كتاب ولا تتفرج علي فيلم؟
- اقرأ كتاب طبعا.

كام سؤال اجباتك فى محلها


على فكرة كل اجباتك جميلة جدا

والله احساسك جميل فى اجباتك

بس الكام سؤال دول عجبنى جدا

اجابتك فيهم


مبروووووووووووك التاج


كل التقدير



اسير الجراح

hasona يقول...

تاني

الاجابات منتظمة
بس عايز حضرتك تضيف شوية لها

romansy يقول...

انا برضه حليت التاج دا من هاجر برضه
عماله تبعت فى تاجات
وادينا حلناه اهو


دايما الانسان بيكون ليه احلام نتمنى ان ربنا يحققها يارب

Fantastic يقول...

اجاباتك عجبتنى جدا
واحلى حاجه انها بتدل على شخصيتك..

لحظة تأمل يقول...

بجد جميلة جدا
اجابات بسيطة بس بتقول كتيير
يارب تحققى كل اللى بتتمنيه

تحياتى

Hossam يقول...

سلام عليكم
اول زيارة ليا
مدونتك لذيذة اوى بس الموضوع طويل اوى
بليز حاولى تقصرى فى المواصيع
انا والله مقصدش ان المووضع وحش
بس الاختصار افضل
سلام واتمنمى نكون اصدقاء

الازهرى يقول...

اجابات اكثر من رائعة

وطبعا انتى كده انضميتى الى حزب البيانو
ودا شىء جميل

الف مبروك التاج
وعقبال المرة الجاية

وربنا يحققلك كل امانيكى الخاصة والعامة

☼♫♪ عمــاد الدين يــوسف ☼♫♪ يقول...

اجابات جمده جدا وعاقلة

بسنت يقول...

اسير الجراح
شكرا لذوقك
ربنا يوفقك

بسنت يقول...

حسونه
شكرا لزيارتك واتمنى تكررها
بس يا ريت توضح انت عايز ايه بحكايه الاضافه دى
ودمت بخير

بسنت يقول...

احمد الرومانسى
شكرا ليك وهاجى اشوف تاجك ان شاء الله على طول
ربنا يسمع منك
دمت بخير

بسنت يقول...

fantastik
شكرا لوجودك
ويا ريت تكررها دايما
دمت بكل الخير

بسنت يقول...

لحظه امل
ربنا يخليكى
ويوفقك انتى كمان
دمتى طيبه

بسنت يقول...

حسام
شكرا لزيارتك
وحاضر هحاول
دمت بخير

بسنت يقول...

الازهرى
شكرا ليك
والبيانو اله لا اعتقد هناك من لا يحبها
دمت طيب

بسنت يقول...

عماد
شكرا لذوقك
ودمت بخير

د/ رامي شهاب الدين يقول...

إجاباتك رائعة ومنطقية

أنا قضيت فى المنيا سنة كانت من أروع سنوات عمرى ، وليا فيها ذكريات جميلة وخصوصا الكورنيش ..بجد كورنيش المنيا تحفة

كلامك فكرنى بالمنيا وذكرياتى فيها ، أيام تويتى وكشرى سافوى وسينما القوات المسلحة وميدان بالاس والمحطة وأبوهلال إلخ إلخ

معلش بقى ..صندوق الذكريات بتاعى إتفتح فى مدونتك

سلامى لكل أهل المنيا..راجع لهم قريب إن شاء الله

دمتى بكل الود .. تحياتى

mohamed ghalia يقول...

رائعة الإجابات
سعيد بالتعرف على مدونة حضرتك
دمتى بكل الود

alshared يقول...

تحب البحر ولا النيل؟
-النيل طبعا

طيب وليه طبعاً دي يعني

أنا شخصيا بعشق البحر

أجاباتك جميله أوي تنم عن شخصيه رائعه ما عدا الجزء بتاع النيل :)

...
أسف جدا علي التأخير ولكن ظروف الأمتحانات


دمتي بكل الود

أخوك

وجه جديد د.أحمد عثمان يقول...

اعتقد ان التاج ده لو اتبعت لي
هتكون اجاباتي متطابقة مع اجاباتك
بما يقارب 90%

خاصة
النيل
و الوظيفة الأخرى
الهندسة و الصحافة

انشاء و المساهمة بعمل اجتماعي خيري

المدينة المنورة

موفقة يا دكتورة

hasona يقول...

السلام عليكم
كنت أقصد
ان كل واحد يستلم التاج يضيف
مجموعة من الاسئلة من وجهة نظره
،،،يعني مش مجرد انه يجاوب وبس
يكون له بصمة في التاج

،،،
شكرا
دمتم بالخير

بسنت يقول...

د- رامى
حمدالله على السلامه ايه الغيبه الطويله دى
المنيا بلد جميله زى ما انت عارف وفيها سلبياتها الموجوده فى كل مصر
بس يظل اهلها طيبين بالمقارنه باى محافظه تانيه
وهى تنور طبعا لما تشرفها بزيارتك تانى وتالت
دمت بكل الود

بسنت يقول...

محمد
انا الاسعد بتشريفك
واتمنى تنورها دايما بالزياره
دمت طيب

بسنت يقول...

د-محمود
شوف ما ينفع تقول لواحد اسكندرانى مثلا بتحب البحر ولا النيل اكيد هيقوللك البحر
بردوا ما ينفع تقول لحد صعيدى والنيل جنبه فى بلده وتقوله البحر ولا النيل

دا لا يمنع انى احب كثيرا البحر وكثيرا جدا كمان وما عندك فكره انا كل مصيف بكون اد ايه فرحانه لمجرد انى هقعد على البلاج واشوف البحر والغروب والموج
دا جو تانى خالص
بس النيل شئ اخر - انا عايزاك تجرب تقعد على كورنيش على النيل مباشره
وهتعرف انا اقصد ايه - النيل شخص هادى يسمعك بلا صخب ترتاح نفسيا لما تشوفه مختلف تماما عن البحر الهائج بامواجه
يا ريت تكون فهمت وجهه نظرى
وربنا يوفقك فى الامتحانات ان شاء الله
ونورت المدونه
دمت طيب
ودمت طيب

بسنت يقول...

دا احمد
ايه الغيبه الطويله دى
نورت المدونه اخى الفاضل
وربنا يكرمك لذوقك
دمت بكل الخير

بسنت يقول...

حسونه
ماشى انا فهمت قصدك
بس دا لو انا هبعته لحد تانى
وانا مش ناويه ابعته لحد الصراحه
انا هفكر اعمل تاج تأليفى فى الحاله دى هبعته لكل الاخوه والاخوات الافاضل
ونورت المدونه لمره تانيه
دمت بخير

الرابطة وبناء الأمة يقول...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

أسماء علي يقول...

ياااه يا بسنت

يوم عن يوم بالاقي إن اجاباتك الشفافة هي انتِ بكل رقة روحك ..

مااعرفش ليه باحس إنك شخصية نورانية

صباحك شهد ..

بسنت يقول...

ومساءك فل يا سمسم
ربنا يكرمك لذوقك الكبير اوى دا
دمتى نور بلا نار

hager za3bal يقول...

الله عليكي يا بسنت
بجد اجاباتك جميله اوي.. بينت اد ايه انتي شخصيه جميله..:)

عجبتني اجابتك دي في سؤال الأمل:

دايما عندى امل ومتفاءله
لانى اؤمن ان الاقلام رفعت والصحف جفت وما هو مقدر ليه
هشوفه يبقى الحمد لله على كل شئ
*****

بجد انتي شخصيه جميله اوي تستحق الاحترام

تحياتي

بسنت يقول...

كل الشكر ليكى يا هاجر
وانتى كلك ذوق
ربنا يوفقك