الأربعاء، 24 ديسمبر، 2008

بلد شعارات


مع التغير المستمر فى حالنا وحال البلد اللى القطر فيها ما بيستناش حد

الا اللى ناويها طبعا ومع الاعتذار لصاحب الشعار السابق

(( انها بصحيح بلد شهادات ))

فأصبح (( انها بصحيح بلد شعارات )) فلاقيت ان الفرصه مهيأه ومتاحه

وجياللى لغايه عندى ومن مبدأ الشعار النهارده ببلاش بكره هيكون بفلوس

وبردوا الشعار الابيض ينفع فى اليوم الاسود

فقررت انى اعطى كل ذى حق = شعاره
-----------------------------------

شعار منظمه حقوق الانسان : حذاء فى يد كل انسان


شعار الصيادله الحكوميين : الدواء فيه سم قاتل والاعمار بيد الله


شعار نواب القروض : احسبها صح تهرب بيها صح


شعار الشرطه : اضرب المربوط يخاف السايب


شعار وزاره الاستثمار : بيع على المكشوف


شعار مستشفيات الصحه: تتدخلها على رجللك تطلع منها على نقاله

ولا مواساه للمرضى


شعار وزاره المواصلات : توك توك لكل مواطن


شعار المجلس القومى للمرأه: لا للواو الذكوريه

نعم للنون النساءيه


شعار مدرسين المدارس : هنسيب علامك فى ابنك


شعار وزاره التعليم : الضرب اولا


شعار وزاره القوى العامله و الهجره : الحق القطر -- قبل ما ينحرق

الحق العباره -- قبل ما تغرق

الحق الطياره قبل ما تقع

ان فاتك دا كله

الحقلك مركب غير شرعى


شعار الطريق الصحراوى القاهره اسوان : لا للموت الرحيم


شعار مشايخ قنوات الافتاء : هنغلط هنغلط


شعار وزاره التموين : لقمه لكل مواطن مطحون
شعارالكليات الحكوميه : عفوا رصيدنا من الطلبه الفاهمين قد نفذ
شعار وزاره التصالات : وزاره ذكيه دوت كوم


------------------------------------------

هى طبعا شعارات من واقع الاعلانات يعنى مش تأليف اوى

بس فعلا لكل حاجه دلوقتى شعار

طبعا الى عنده اى شعارات ما فيش مانع

هناك 34 تعليقًا:

megat يقول...

your blog very beautiful and more info,I like your blog

ِِAdem El-Mahdy يقول...

شعارات رائعة

و لكن يجب أيضا كمسلمين ألا نكون أصحاب شعارات

يجب أن نعمل و نجد و نبدع
حتى نصل بديننا إلى المعالى

و بس
ocula

احمد بدر الدين يقول...

منذ متى ونحن ننتمى الى خلاف الشعارات
دائما تحكمنا تلك الكلمات

اتفق مع ادم لا بد من الابداع

تحياتى

Abeer Soliman يقول...

والله هم يضحك وهم يبكى.. بس سيبك انت دمك خفيف جداً

تسعدنى زيارتك فى مدونتى "يوميات عانس"

romansy يقول...

ههههههههههههههههه
يا نهار ابيض على الشعارات اللى غيرت مفهوم البلد

مع ان دا اللى بيحصل

وشايفينه

ســمـــر احمد يقول...

والله صح يا بسبس
بس خدى بالك هايعملوا ضرايب على الشعارات
بوست تمام التمام

صفـــــــاء يقول...

.
انت كدة خليتى الموضوع شعار لكل مواطن

دة مش فاضل غير انى ابعت الاسم على رقم وهما يبعتولى الشعار اللى يتماشى عليه زى رنات الموبايل

فكرة حلوة يا دكتور

.

Selfmeaning يقول...

نسيتى شعار المصرية للاتصالات


شركة واحدة بتفرقنا كلنا

و ان اتسرقت متقولش ليه

اسلام ابوغزاله..... ليه بس ؟ يقول...

حضرتك متعرفيش شعار طالب مش عارف يذاكر وامتحاناته قربت؟

kemet يقول...

السلام عليكم ورحمة الله وبركاته

صح والله بلد بتاعة شعارات صحيح
يمكن دا اللي خلانا خلاص فاقدين الثقة في كل شئ

احيكي علي اسلوبك الساخر

تحياتي
الي اللقاء

بسنت يقول...

megat
شكرا على ذوقك
ودمت طيب

بسنت يقول...

ادم
زى ما قلت يجب كمسلمين
بس طبعا دا يبدأ بأنفسنا هل حد بيعمل كدا علشان نعمل مش هقول نبدع اصلا
على العموم دى شعارات من باب السخريه مش اكتر لان الحال لا يختلف عنه كتير
شكرا على زيارتك الجميله
ودمت بخير

بسنت يقول...

احمدبدر الدين
احنا لا ننتمى لاى شئ والا ما كان دا حال المسلمين
احنا كل واحد ويالا نفسى
وزمن الشعارات موجود والا ما كانت الجرايد الحكوميه بتبيع نسخ كتيره
شكرا على زيارتك الجميله
ودمت طيب

بسنت يقول...

عبير
انا الاسعد بزيارتك هنا
وبسعد اكتر لما بزورك فى مدونتك المختلفه
دمتى بخير

بسنت يقول...

احمد الرومانسى
نورت المدونه
دمت بخير

بسنت يقول...

سموره
لو هيعملوا ضرايب على الشعارات هتبقى مشكله
لاننا بلد شعارات زى ما قلت
كدا هنعيش علشان ندفع الضرايب بس
نورتى يا ارق سموره

بسنت يقول...

صفاء
بس فكرتك الاحلى
كدا عايز شعار لكل مواطن
وشعار لكل رقم موبايل
هتبقى زحمه اوى
نورتى يا صفاء
ودمتى بخير

بسنت يقول...

self meaning
ههههههه
جميل الشعار دا طبعا نسيته خالص
سلمتى دايما

بسنت يقول...

اسلام
شعاره التوكل على الله والمذاكره هى اللى بقيالك
وذاكرللك كلمتين ينفعوك فى العمر كله
ربنا يوفقك

ســـــــهــــــــــر يقول...

يعنى بستان رقه و روحانيات جميله ده كنت عارفاه
لكن موضوع خفة الدم و الساخر بالشكل الجميل ده جديده بجد

هو هم يضحك فعلا

لو انتابتنى اى شاعارات هجيلك تانى و اقولك

اسلام ابوغزاله..... ليه بس ؟ يقول...

جزاك الله خيراً يا فندم , وشكراً لأهتمام حضرتك

طوبة ذهب وطوبة فضة يقول...

عندك حق شعاراتك كلهابس نسيتى شعار المواطن لاشعار لمن تنادى وطنش تعيش ونفض للدنيا تنفضلك تحياتى لهذا الموضوع

لحظة تأمل يقول...

شعارات بس واقعية
والمفروض يشيلوا اسم المكان ويحطوا الشعار
هيبقى واقعى اكتر بدل اللف والدوران

تحياتى

الازهرى يقول...

شعارات ثم شعارات ثم شعارات
كلامك صح
لكن فى سؤال غريب شوية
هل الحكومة فقط هى صاحبة الشعارات ام اننا تعلمنا منها هذا الامر واصبحنا نحن ايضا ممن يتغنون بالشعارات بدون الاقدام على التغيير ؟
طبعا السؤال على العموم

تحياتى دوما

life يقول...

كل سنة وانتى طيبة

فعلا بلد شعارات البوست رائع اختى
واسلوبك جميل بجد

سلمت يداكى

فى أنتظار شعارات جديدة ههههه

لحسن الشعارات بقت زى الهم على القلب

فى حاجة كده بتمنى تشيليها من المدونة قبل ما اعيط وأغرقلك المدونة
يلاش الحروف الانجليزى اللى محطوطة على التعليقات دى اللى المفروض نأكيدها وفى كل مره اكتبها تطلع غلط وارجع اعيد كتابتها

شوفتى كمان الحول يابنتى بدال ما اكتب تعليقى فى البوست اللى قريته كتبته فى بوست تانى
ومضطرة اعيد كتابة الحروف الانجلش تانى
لا كده هغرق المدونة عياط

بسنت يقول...

kemet
شوفى لانها بلد شعارات يعنى كلام وكلام وفعل مش هقول ما فيش بس فعل فردى لبعض الاشخاص فطبيعى فقدنا الثقه فى مسئوليها
الامل فى الله كبير ان كل دا يتغير بينا
دمتى بكل الخير

بسنت يقول...

سهر الغاليه
ما انا فيا مواهب كتيره مكبوته
ههههههه
شكرا كتير على ذوقك والله
وفى انتظارك تانى باى شعار
نورتى يا اجمل سهر

بسنت يقول...

اسلام
اى خدمه يا اسلام من اختك
وربنا معاك بس ذاكر كويس فعلا
لاننا مازلنا بردوا بلد شهادات

بسنت يقول...

دهب
لا ما نستوش لانى مجرباه كتير
هههههه
سلمتى دايما

بسنت يقول...

لحظه تأمل
شوفى معروف ان الطريق المستقيم اقصر الطريق
وطبيعى احنا بنحب اللف والدوران فما اعتقدش هينفع نحوش الاسم العادى ونحط الشعارات
تعرفى لو دا حصل هنكون دوله شديده الصدق
ملائكيه او افلاطونيه
دمتى بكل الخير

بسنت يقول...

الازهرى
لا طبعا احنا قبل الحكومه بتوع شعارات
يعنى اقرب مثال لكدا انك بتقول مثلا انى هعمل باخلاص وتلاقى كتير من طلاب الجامعه نادرا ما يحضروا محاضرات
تقول هعمل باخلاص وتلاقى موظفين الحكومه من 12 الضهر ما حدش على مكتبه
الجو كله شعارات اخى الفاضل
دمت بكل الخير

بسنت يقول...

life
بدون عياط ولا دموعك الغاليه الموضوع باختصار انى فعلا مش عارفه الغى طباعه الحروف دى ازاى اصلا
لو عرفتى يا ريت تبلغينى اكون شاكره
ويا ستى نورتى المدونه
ودمتى بكل الخير

hager za3bal يقول...

انا جيت بس أقولك

كووووووووووووووول سنه وانتي طيبه يا جميل
ويااااااااااااااارب 2009 تبقي أجمل من 2008 وتحقق كوووووووووووووووووول اللي بتتمنيه
وتبقي سنه سعيده علينا كلنا ياااااااارب

تحياتي

بسنت يقول...

شكرا يا هاجر على تواصلك الدائم الجميل
سعدت اختى العزيزه بمرورك
ودمتى بكل الخير