الأربعاء، 13 أغسطس، 2008

شويه رومانسيه


معلش بس هى ساعات كدا تقلب معايا رومانسيه شويه زى ما بتقلب
حزن وبتقلب سعاده
وانبساط وزى ما بتقلب اكتئاب وضيق
بس الرومانسيه شئ جميل لما ندخله فى حياتنا الجافه او
الحياديه المشاعربردوا
المهم اللى قلب معايا الموضوع دا بعد سماعى لفيلم جميل اوى اسمه
( فى شقه مصر الجديدة )
بدايته بسماع اغنيه جميله بردوا ( أنا قلبى دليلى - لليلى مراد )
ما سمعتها من زمان اوى بس الراديو شئ جميل بيذكرنى بكل حاجه
قديمه زى الاغنيه دى
وزمانها اللى ممكن نطلق عليه الزمن الطيب بصرف النظر
عن سماع الاغانى او رفضها
هى نقطه فاصله فى الفيلم دا المهم
الفيلم باختصار شديد بيوضح ازاى ان بحثنا عن السعاده شئ
جميل وهيجى فى الوقت المناسب
مهما انتظرنا لانه بردوا بيدور علينا زى ما بندور عليه
والاجمل ازاى لما نقابل شخص او اشخاص معينه نعرف اننا
هنفضل مرتبطين بيهم بشكل ما وأنهم هيمثلوا حاجه فى حياتنا
ودا ممكن بمره واحده او اكتر دايما كدا فى ناس لما نقابلها ما نقدرش ندير
ظهرنا ليهم علشان نكمل حياتنا عادى
لا هما بيكونوا نقط فاصله -- ودا حصل مع بطله القصه ( نجوى= غاده عادل )
عن لقاءها بمدرستها للموسيقى ( تهانى )
وعند لقاءها ب ( يحي= خالد ابو النجا )
لازم ندور على الرومانسيه فى حياتنا وهى اللى كانت مصدر السعاده فى الفيلم
والسعاده ممكن تختلف فى مفهونا بعد دا بحاجات تانيه خالص غير الرومانسيه
وفى مقوله ظريفه لعالم نفسى شهير ( ايفرت ورتنجتون ) بيقول
إذا اردت ان تكون سعيدا ليوم واحد فاذهب للصيد
وإذا اردت ان تكون سعيدا لشهر واحد تزوج
وإذا اردت ان تكون سعيدا لعام واحد فاحصل على ميراث
وإذا اردت ان تكون سعيد مدى الحياه فساعد انسان واحد
انا موافقاه بس نضيف ليها ادخل فى حياتك شويه رومانسيه
وايمان بالله والقدر ان المكتوب مكتوب
وتفاءل بالقوه وما تجعل الحياه ابدا تسخر من انهزامك قدامها
اهو قبل ما تقلب معايا حاجه تانيه
هرجع بسرعه للشويه الرومانسيه اللى معايا دى

هناك 27 تعليقًا:

ســمـــر احمد يقول...

و القلب المكتفى بالدق حياة مش عايش
و العين اللى ما تلمع فرح و انتظار و شوق و دموع قلق ما تبقش حلوة ..
و الانسان ازاى يكون انسان اذا ما حلمش؟؟؟
رومانسية هى و لا حياة ؟

بسبس ... رائع البوست يا قمر
دى مقدمة و راجعالك تانى

د\أسماء علي يقول...

تعرفي يا بسبوسة أنا لما تفرجت على الفيلم ده .. بعيد طبعا عن كام غلطة اخراج ..

بس بجد حسيت برومانسية هادية ..

و كأن الدنيا بقت رايقة ..

حسيت بحاجة مختلفة ..

الفيلم ده من الأفلام اللي مفيش فيها اي اكشن ولا حزن ولا حب من بتاع هاقتله والكلام ده ..

لا تحسي انها رحلة بدأت من حب البطلة لأبلة تهاني و فضلت ماشية لغاية مالقت يحيى و في خلال الرحلة اتعرفت على ماس وحاجات كتير حلوة ..

شكلك يا بسبوسة مزاجك زيي في الأفلام ..

دمتِ جميلة الروح ..

و بحب اللون الأسود آه

و النيو لوك للمدونة حلو برضه

بس فتحيها ربنا يفتح عليكي :)

blue-wave يقول...

وهوا فيه احلى من الرومانسيه؟؟؟
طيب ياريت كلنا نبقى رومانسييييين على طول:))
تحياتى

ســـــــهــــــــــر يقول...

دى شويات كتير
بس متكاملين

شوية رومانسيه
و شوية ايمان
و شوية تآلف اجتماعى
يجيبوا ف الاخر تآلف نفسى
و النتيجه
صفــــــــــــــــــــــاء

دايما بتصيبنى هنا حاله جميله من الصفاء

بسنت يقول...

هى حياه فعلا يا سموره
بتدق بكل الالوان لو فيها لون الرومانسيه اكيد تبقى احلى حياه
دمتى بكل الخير احلى سموره
وفى انتظارك

بسنت يقول...

فعلا يا اسماء هى رحله وممكن نقابل فيها اى حاجه بس لو رومانسيه اكيد تبقى رحله جميله
بصفه عامه كل ما انزل القاهره احس انها رحله هتغير فيا كتير
بالرغم من اختلاف ما اقابله عما قابلته البطله بس يظل التوقع والاحلام شئ جميل
ويا سمسم انا حبيت اغير شويه فى المدونه من باب الملل اللى اصابنى من القديم اطمنى شويه وهغير دا اكيد اختك ملوله ومش بتثبت
ودمتى طيبه ومتفاءله دايما

بسنت يقول...

لا طبعا ما فيش احلى من الرومانسيه يا عمرو
خاصه اما تيجى من استاذ الرومانسيه فى التدوين
نورت المدونه
دمت بكل الخير

بسنت يقول...

فعلا يا سشهوره المهم النهايه التألف النفسى ودا صعب جدا جدا فى الوقت دا
الخلطه الجهنميه دى دايما ناقصه للاسف
سلمتى لصفاء كلماتك ومرورك اللى بيسعدنى اوى
سلمتى دايما

Noha El-arabi يقول...

اي فيلم لخان جميل جدا و راقي جدا جدا
اهم حاجة هنا انك تؤمني ان فعلا الانتظار حيسفر عن شئ جميل
و فعلا حيجي
:)

ahmed_k يقول...

جميله جدا لحظات الرومانسيه
في حياة أي إنسان
وياليتها تدوم

ولأنه لكل شيئ نهايه
فتلك اللحظات تكون نهايتها سريعه
وسرعن ما نعود لمواجهة الحياه
بصعوباتها وإحباطاتها أحيانا

وربنا يديم اللحظات الحلوه علينا جميعا

تقبلي تحياتي

momken يقول...

وصفك تحفه
وتحليلك للمواقف فى شقه مصر الجديد روعه

الرومانسيه فعلا مفتقده
بس الى هيرجعها مفروض احنا
محدش هينزل بيها من السما
احنا الى ضيعنا الرومانسيه بمديتنا
ولازم نرجعها بمشعرنا

اسلوبك رائع
تحياتى

قهوة بالفانيليا - شيماء علي يقول...

جميل اوي :)
صحيح ..
زي ماحنا بندور هي كمان بتدور :)
تحليلك جميل ..و بسيط .. :)
وجهة نظرك عن السعادة حلوة اوي .. :)
تسلمي .. :)

lyssandra يقول...

بس عارفه يا بسنت

المشكله ان الواحد لما بيطول بيه الانتظار
ممكن بعد ما ييجي اللي كان مستنيه .. تضيع فرحته بيه

لأنه كان محتاجه في وقت سابق
ومجاش في معاده

-----------

مش عارفه هيا وجهة نظر كنت نفسي أقولها لحد

جت فيكي انتي بقي

معلش استحمليني يا قمر

ربنا يسعد قلبك يارب

تحياتي وآسفه لتأخيري عنك

دمتِ رومانسية


lyssandra

أحمد عبد اللطيف يقول...

بسنت
أنا بس بامسي عليكي ، وباقول لك أني ما بحبش خالد بيه أبو النجا ، عشان كدة ما شفتش الفيلم .
بس دا مش معناه ان الفيلم ممكن ما يكونش جميل
عموما البوست حلو ، يمكن بسببه أشوف الفيلم لو جي علي ميلودي

بسنت يقول...

نهى
اولا نورتى المدونه
ثانيا جميل الانتظار بس فى اثناءه نعمل حاجات تانيه مفيده مش انتظار للسعاده بدون عمل مقدمات ليسها يعنى بطله الفيلم سافرت ودورت عليها مش مجرد انتظارها
دمتى بخير

بسنت يقول...

احمد زكى
فعلا لحظات السعاده قليله اوى لدرجه انها بتكون زى الحلم اللى بنصى منه على كابوس الحياه الصعبه
بس تبقى ذكريات وممكن مستقبل لو ربنا اراد
دمت طيب دايما

بسنت يقول...

ممكن
السعاده اكيد احنا اللى بنعملها ونخلقها بس ساعات بتيجى من نفسها لينا
ودا زى المفاجأت القدريه ودى بتكون اجمل اكيد

سلمت

بسنت يقول...

ويسلم مرورك الجميل كالعاده يا شيماء
انا فعلا مقتنعه ان السعاده بدور علينا زى ما بندور عليها حتى لو جت صدفه ولو احنا اللى خلقناها

دمتى بكل الود دايما

بسنت يقول...

لا طبعا يا ليساندرا انتى منوره واحب اشوف وجهه نظرك وتعلسقك هنا فعلا
انا معاكى ان لكل حاجه وقتها بس لو متأخره شويه مش مشكله
البمهم تيجى-- ليها فرحتها وسعادتها بردوا

دمتى طيبه

بسنت يقول...

احمد لطيف نورت فعلا
بس اسمع الفيلم بصرف النظر عن لرأيك فى ابو النجا لان البطله الفعليه للفيلم هى نجوى ( غاده يعنى )
ولازم ميلودى يعنى؟
ولا علشان بتتحدى الملل

سلمت دايما

momken يقول...

انا متق معاكى ان الرومانسيه بتيجى فجاءه علشان تصلح كل الى الماديه بوزته وتبيض كل الى اسود جوانا وتحلى مرار ايامنا


انا جاى اصلا اقولك كل سنه وانتى طيبه وبالف خير


تحياتى

MoHaMeD - AmEeN - Al.MaSrY يقول...

لا أدري لماذا حين اقرأ عن الرومانسيه ينتابني احساس بالضعف..واتسأئل كثيرا ماهو معنى الرومانسيه.. هل حب-تسامح-طيبه-عطف-كرم..جميعهم صفات غير مكتمله فينا...
لكي التحيه

Tamer_silit يقول...

بسنت مبروك على المدونة ولو انها متأخرة

اعتقد ان مرورى من هنا سوف يكون كثيرا فى الايام القادمة

بسنت يقول...

وانت بكل الخير يا ممكن
رمضان كريم عليك ان شاء الله

بسنت يقول...

نورت المدونه يا محمد
ورأيك فى الرومانسيه هى تجمع دا كله انا شايفاها كلها صفات= الرومانسيه بس الاهم
ان يكون عندنا استعداد فعلا ليها لان
لو جت ومالقتنا فى وضع يسمح من ضيق مثلا او حزن هتعدينا ولا هنشوفها

رمضان كريم ودمت بخير

بسنت يقول...

ياااه يا تامر
ايه الزياره الجميله اوى دى
نورت طبعا
وفى انتظار طلتك الطيبه
ورمضان كريم عليك

zainab يقول...

واذا اردت ان تكون سعيد مدى الحياه فساعد انسان واحد

***************

جميله قوى المقوله دى

**************