الأربعاء، 16 يوليو 2008

لوحدى-- طب وماله


(1)هل الصداقه هى الوجه التانى للوحده ؟
اكيد لأ  وتكوين الصداقه دا مش محتاج لعمليات ذكاء ولا حاجه
 هو شرط واحد لو وجد انتهت
المعضله وهو وجود حاجه واحده على الاقل مشتركه -- دا الشائع طبعا
بس انا اكتشفت بردوا ان الاختلاف بيكون صداقه وممكن تكون اجمل بكتير من التشابه
لان فى الاختلاف بيحاول كل طرف يقرب وجهه نظره للتانى بجانب محاوله تشكيل التانى للحاجه اللى الاول بيحبها ودا جربته فعلا مع تلاته اصحابى اتنين منهم مختلفين جمله ومضمونا عنى من الافكار للتخصصات حتى اسريا والتالت متشابه فى كتير معايا اللى طلعت بيه من التجربه دى ان الصداقه ملهاش شروط معينه غير موضوع الاشتراك فى نقطه لا ممكن الاختلاف بردوا


(2)هل الصداقه مراحل؟
اكيد ايوا فعلا لكل مرحله اصحابها اللى ممكن جدا تنتهى العلاقه بيهم بمجرد انتهاء المرحله دى يعنى مرحله الطفوله والصبا لغايه الثانوى لو فضل اصحابى معايا يبقوا دول اصحاب العمر ودا عن تجربه فعليه فى الكليه لو استمروا بعد الشغل والجواز يبقوا بردوا صداقه عمر ودا ما حصل معايا خالص للاسف
انتهت بمجرد انشغالهم --الدنيا تلاهى بردوا مش هنكر
الشغل بقى واصحابه دول عن تجربه تبعا لكل شخص ممكن تننهى بانتهاء
الشغل وممكن تستمر حتى لو تركنا المكان
يعنى ممكن زمايل ممكن اصحاب ممكن ولا حاجه ليا

(3) اسباب فشل اى صدقه بمعناها الفعلى ؟

حاجات كتيره اغلبها ذاتى ونفسيات يعنى الغيره والحسد دى اكتر حاجه بين البنات وعن تجربه طبعا بتفسد فعلا الصداقه بس الاصحاب فعلا او صداقات العمر ليا الحمد لله الموضوع دا مش موجود بينا خالص
يمكن علشان احنا اصلا مختلفين فى حاجات كتيره من الاهتمامات للطموح اساسا
تانى حاجه المصلحه دى بقى بتهد الثقه وتقتل اى محبه او صداقه مالهاش حل غير
افساد الصداقه مهما كانت مدتها والمصلحه دى ممكن شخصيه او شغل او فلوس
اخر حاجه من وجهه نظرى البعد او البعاد وفعلا على رأى المثل اللى بعيد عن العين بعيد عن القلب ودا حقيقى انا فعلا بنسى ناس كتير كنت بفتكرهم اصحابى لمجرد البعد مش زهايمر بس اكيد هى بردوا ما كانت صداقه بس المعانى بتختلط علينا دايما

(4) فى صداقه على النت؟

اكيد  فى بس مش المعنى الفعلى للصداقه
ازى؟
هى بتكون زماله واخوه فعليه فى الله قبل اى حاجه بس اكيد مش صداقه ولا اى حاجه تانيه لان اهم شرط للصداقه الفعليه غير الشروط اللى فاتت هى الرؤيه الفعليه ورؤيه الانفعالات على الوش لان مهما حصل النت او الكمبيوتر آله سواء وافقتونى ولا لأ هى بلا مشاعر اطلاقا مهما ادعينا العكس
انا شيفاها فى نظرى اسلاك لا راحت ولا جت وطبعا اخوه فعليه مع ناس بعتبرهم اخوات فعليين هما يمكن مش بلاقيهم فى ازماتى او وقت الحاجه بس موجودين فى حياتى اكيد
وبعتز بشويه صغيرين منهم كأخوه فعليين ليا


آخر حاجه بقى دى كلمات كنت كتبتها من فتره بدون سبب ودا الطبيعى عندى بكتب حاجات مالهاش علاقه بيا من قريب ولا بعيد
بس للحظ جت ظروفها دلوقتى لان فى ناس كنت بعتبرهم اصحابى—كنت –
هما ما خسرتهم نهائى بس مكانتهم عندى اتهزت اوى وصعب ترجع تانى
زى ما كانت
لاقيت الكلام دا مناسب اوى للظروف دى
( هل سنبقى اصدقاء -2-)

...........................................................

كم كذبنا عندما قلنا إننا أصدقاء
وأن صداقتنا صداقه عمر ستدوم ليوم القضاء
وإنها ستزول كل حزن وألم تركه الآخرين
بنا لبعدهم وللجفاء
أنظر خلفى الآن وأضحك على من كنت أقول
إنهم فعلا أشقياء
وهل بعد وحدتى الآن يكون هناك معنى للوفاء؟
كم تغيرنا ولم نعد ذلك الأستثناء
صرنا كغيرنا نتذكر صداقتنا بكل رثاء
ونقول كنا وكنت—وبالنفس ليس ذاك النقاء
كم تفتحت أعيننا على زيف ذاك الاخاء
وعلى صداقه بريئه ضاعت بتجربه خرقاء
وظل بنا ذكرى وعندا يفوق كل الكبرياء
ربما لم نذق معا ابدا طعم البكاء
لكنه أحاط بفراقنا وخمد بالعيون التى
غادرتها الألوان وبقيت فقط
خطوط سوداء
صديقى وداعا بكل لغه فى الحياه الغناء
التى عرفناها سويا وعذرا سألتزم صمت
الكلمات وإشارات الخرساء
فصداقتنا أنتهت حتى قبل موعد اللقاء

هناك 26 تعليقًا:

قهوة بالفانيليا - شيماء علي يقول...

بسنت :)
الصداقة مهمة جدا جدا في حياتنا ..
و دايما بتلاقي في غل و حقد و حسد ..
بس في بنات نقيات اوي اوي يا بسنت .. و الله انا ليا صديقات غاية في الروعة و الهدوء و الرقة ..
ربنا يوفقك لصديقات طيبات :)
على فكرة في صداقة عن طريق الانترنت ..
اناليا صديقتين غاليين عليا جدا ..
و صدقيني .. االحب في الله بيبقى صداقة حقيقية .. :)
ربنا يوفقك يا بسنت .. :)

أحمد عبد اللطيف يقول...

بسنت
البوست طويل والموضوع محتاج كلام كتير . لا أحد يكره الصداقة ، بل ان الجميع يسعي إليها ، وأتفق معك أن لكل مرحلة صداقة ، لكن ، تجربتي الشخصية تقول أننا كلما تقدمنا في السن كلما قلت صداقاتنا وزادت معارفنا ، والأسباب كتير طبعا ، منها دقتنا في الاختيار وعدم الثقة في أحد بسهولة وضيق الوقت والانشغالات ، حتي اننا نفقد صداقات كثيرة أثنلء ذلك ، والأهم من ذلك اننا نبدأ في رؤية الأشياء علي حقيقتها ، فنري مساويء الناس ، فنحاول تجنبهم .
بالناسبة للصداقة علي النت ، وليه لأ ؟ أعتقد ان المدونات فكرة رائعة ليتعارف ذوي الميول المشتركة ، وربما تطور الصداقة وتصير ملموسة ومرئية ليست فقط عن طريق أسلاك ، كما اننا نتعرف علي اشخاص كنا حقا نتمني معرفتهم ، فتصير علاقة مودة واحترام .
بسنت
مع الوقت يتغير منظورنا للأشياء والأشخاص والحياة كلها ، ونكتشف دائما الجديد الذي غلبنا يبعدنا عن الأصدقاء .
لك تحياتي

blue-wave يقول...

حلو البوست اوى يا بسنت
تسلم ايدك

بسنت يقول...

شيماء
شوفى انا عارفه طبعا ان الصداقه مهمه على الاقل بالنسبه ليا انا شخصيا
لان اصحابى فعلا سواء الانتيم او المقربين ليا جدا ودول صداقات عمرى زى ما تقولى كدا
ولكنى كنت بتكلم بواقعيه عن باقى الصداقات اللى صادفتنى فى حياتى
وبالنسبه للنت انا ليا اخوات واخوه
ليا فعلا ولكن بمفهوم الصداقه والفهم
هما اتنين بس وانضم ليهم واحد يعنى 3
ودول بيقفوا معايا معنويا طبعا بس
سلم مرورك اللى اسعدنى جدا يا شيماء
ودمتى طيبه

بسنت يقول...

احمد لطيف
معلش هو فعلا بوست طويل بس انا حبيت اقول فكره فى عقلى من فتره شغلانى-- مش اوى يعنى
بس حبيت اوصلها واشوف اراء الاخرين
شوف فعلا احنا بنشوف الحاجات صح واوى كمان لما بنبعد شويه ومنها طبعا علاقتنا بالاخرين زى الصداقه
وعجبتنى اوى فكره ان مع الوقت فكرتنا عن الحاجات والناس بتختلف دى اوافقك معاها طبعا
بس بالنسبه لصداقات النت انا رديت على شيماء زى ما انا شايفه الحقيقه
ووجهات النظر لا تفسد للود قضيه
سلمت دايما

بسنت يقول...

عمرو
شكرا على زووقك بس كنت اتمنى تقول رأيك الفعلى بردوا
سلمت دايما

ادم المصرى يقول...

اذيك بسنت وحشتنى مدونتك جدا وافكارك الجميل والمتجدده بجد بوستك المرادى جميل ولكن الصداقه لو عيذا الجد بجد عشان تريحى دماغك بلاش تعملى صداقه مع شباب غير ان تكون صداقه خارج نطاق النت خاالص لكن لو صديق فى جامعه جار عمل اى حاجه اوك عادى دا هيكون شيفك والكلام بينكم فى الوجه لكن شباب النت فى البدايه هيقولك اهلا انا بجد حاسس انك اختى انتى والله عزيزه عليا انا فخور بيكى ويفضل الواد يعلى فى زاتك ويخليكى تفرحى بنفسك ويوم ورا يوم انتى كمان تعجبى بى شخصيتى الى هيا اصلا مش حقيقيه اكيد بيعمل كدا لهدف معين انو مثلا يخرج معاكى فى يوم او يشوفك او اهو ترنى عليه والحجات دى او انو يكون مريض نفسيا بمرض الحب فى شباب كدا تمشى تحب على نفسها وربنا يعفينا منهم بجد بسنت فى بنات صدقتها جميله جدا ولكن بردو خارج النت انا اتحداكى لو فى صداقه مع شاب عن طريق النت مقلبتش بغم فى الاخر هههههههه

بسنت يقول...

ادم
نورت المدونه طبعا
وشكرا على النصايح الجامده دى لاختك
بس علشان تبقى عارف انا قلت لو قريت كلامى كويس ان فى اخوه فى الله وزماله على النت مش صداقه بالمعنى الفعلى يعنى تلاقيه وقت الحاجه بس فعلا فى مسانده معنويه كبيره ونصايح بدون مصلحه او غرض
ودول موجودين فعلا فى حياتى والحمد لله ما شفت من صوره الناس اللى بتحب على نفسها او الغير محترمه كل اللى اعرفهم ناس محترمه اتعرفت عليهم من خلال منتدى محترم جدا والبنت طبيعى هى اللى بتحط حدود لا يتخطاها حد
والحدود دى بتتبع للشرع والمجتمع والدين
لو فهمنا كدا يبقى مش هيكون فى مشاكل ولا الكلام الفاضى ابدا
سلمت لمرورك الجميل كالعاده

وجه جديد د.أحمد عثمان يقول...

بحث كامل شامل
عن الصداقة
بس تعرفي
احنا مش بنضحك على بعض
لما نسمي بعض اصدقاء
احنا ساعتها بنضحك على نفسنا
ساعات كتير الانسان بيلجأ لأنه يصادق
لأنه عنده فراغ
و مفيش صديق حقيقي يملى الفراغ ده
بالظبط تمام
زي كل قصص حب المراهقة
ساعتها الواحد بيحب لأنه عايز يحب و خلاص
لأنه عنده فراغ عاطفي محتاج يملاه
كذلك الصداقة

تحياتي للبوست الجميل ده

Dr.m يقول...

السلام عليكم
كم تكون الصداقه جميله عندما تكون بمعناها الحقيقي
بس للأسف هذه الأيام أصبحت الزماله هي السمه الرئيسيه لمعظم العلاقات
..........
ربما لم نذق معا ابدا طعم البكاء

لكنه أحاط بفراقنا وخمد بالعيون التى

غادرتها الألوان وبقيت فقط

خطوط سوداء
........
كلماتا جميله معبره
تحياتي
سلام

حبيبـــــــة القمـــــر يقول...

اتكلمتي عن الصداقه وبعض انواعها بشكل جميل
وانا اتفق معاكي في كلامك كله

ولو ان اغلب اسباب البعد بالنسبه ليا على الاقل
هو اختلاف الاهتمام وتغير الاخلاق والمبادئ مع مرور الوقت
دا غير بعد المسافات فيصبح البعيد عن العين بعيد عن القلب
بس مش مع الجميع طبعا

خالص ودى ياجميل

ســـــــهــــــــــر يقول...

الصداقه
يا ااااااااا يا بسنت
ده موضوع عاوز كلام كتير اوى
انتى قلتى فيه كلام كتير
و انا بقرا كلامك شفت تاريخ حياتى و ممكن اشهد لك ان كتير منه حقيقى جدا

فى مشاوير الحياه دايما بنقابل و بنفارق .. و ما بيبقى غير الاقرب


خلينى اختلف معاكى ف صداقة النت
ان فيه صداقات من النت بتدوم و بتكبر سواء بانها بتتحول للقاء فعلى .. و ساعات بتدوم حتى تواصل على صفحة نت
يعنى ما بننساهمش اول ما بنقفل


بستان الرقه بسنت
بوست مميز و جدلى كبير

Abd-Alrahman يقول...

بسنت

ازيك يا دكتورة الصعيد

اخبارك اية انا نزلت بوست جديد وطلعت من مود الكئابة الي كنت فيه

عايز اقولك ان الحياة من غير الصداقة متمشيش

بوست هايل

دمتي بس مش الجبنة لالالالالالا
دمتي بخير وسعادة

ياريت تلغي الورد فيركيشن دة عشان بيخنقني كل ما اجي عندك

زى الهوا يقول...

مقالة جميلة لمت كل جوانب الصداقة , فكرتينى انا زمان كنت كاتبة قصيدة عن الصداقة , كانت اول قصيدة كتبتها فى حياتى

بسنت يقول...

د- احمد عثمان
هى وجهه نظر جديده فكره ان الصداقه لملأ وقت فراغ
بس هى بالنسبه لى مش وقت فراغ اكتر من
وجود اتصال لاشخاص ارتاح لهم ويدونى النصيحه لاى موقف احب اخد رأيهم فيه بجانب المسانده المعنويه فى مشوار الحياه
بس طبعا ساعات بنسمى العلاقات مش بمسميتها الصحيحه فالامور بتختلط علينا
نورت يا دكتور
وشكرا لتعليقك الجميل

بسنت يقول...

محمود
هى الزماله فعلا كتيره بس هى الطريق الاول للصداقه اكيد بروا
بس فى ناس كتير بنقابلها آخرها معانا بردوا زماله ومعرفه وبس
الصداقه بقت حاجه قليله اوى دى الحقيقه اكيد فى حياتنا
نورت المدونه يا دكتور

بسنت يقول...

حبيبه القمر
اكيد اصحابنا الانتيم مهما بعدوا مش بننساهم
دى حقيقه بردوا بس فى فعلا ناس كنا بنعتبرهم اصحاب ولا نبعد بيتنسوا يبقى اكيد ما كانت صداقه من الاساس
متهيألى زى ما قال اخونا احمد عبد اللطيف
لما بنبعد بنشوف الامور بشكل مختلف ويمكن احسن كماننورتى بجد يا حبيبه واحب اشوفك دايما
سلمتى

بسنت يقول...

سهوره الغاليه
انا دايما كدا كل فتره اعيد ترتيب زى ما بيقولوا اوراقى او اصحابى الاقى ناس دخلت وناس خرجت
زى ما قلتى شريط حياه
بس مهما حصل فى ناس دايما ثابته ما بتهتز ابدا مكانتها داخلنا
سلمتى على تعليقك الجميل اوى
سلامى للغالى أهلاوى

بسنت يقول...

عبد الرحمن اخويا الصغير والله انا مبسوطه فعلا انك طلعت من مودك اللى مش عايزين نجيب سرته ولا نفتكره خالص
سعدت اوى بزيارتك دى
دمت طيب يا رب

بسنت يقول...

زى الهوا
نورتى مدونتى البسيطه بزيارتك الجميله دى
وانا هدخل اشوف قصيدتك ان شاء الله
دمتى بكل الود

مصطفى السيد سمير يقول...

جميل يا بسنت
فعلا الصداقة دي حاجة نادرة
وعشان كدة غالية
والمفروض نبعد بيها عن المصلحة والأنانية
انتي صعيدية برضه مش كدة
انا كنت عايز انتي منين
اصل احنا عاملين مدونة اسمها حلم الجنوبي
للجنوبيين فقط
حيكون شيء جميل لو شاركتينا
مستني ردك عشان ابعت لك الدعوة

www.wantasky.blogspot.com

د\أسماء علي يقول...

الصداقة حاجة حلوة اوي

بس تبقى مع الناس الصح

أحيانا بتبقى كمان الطبيعة مش متلائمة

يعني كل حد كويس بس مش ننفع نبقى اصحاب

حاجات كتير بتحدد

بوست جميل منك يا قمر

بسنت يقول...

مصطفى شكرا ليك اوى على دعوتك
وانا رديت عليك فى مدونه سما زرقا بس لاحظت ان ليك واحده تانى فى اللينك دا ماشى هدخل أأكد عليك تانى
وباعتذر على التأخير
وسررت لمرورك الجميل
دمت طيب

بسنت يقول...

ومرور جميل منك يا اسماء
وفعلا وقت واختيار الاصحاب بيختلف والظروف طبعا
سلمتى دايما

Beram ElMasry يقول...

عـــين الشــــمس عيانـــــة ومعصوبــــه بشـــال الليـــل
وفــــــــاس الحـــــزن منكـــودة ومرفوعـــة تهـد الحيـل
هجمـــت علينـــــــا عصابــــة زى الطوفــــان والســـيل
خلــــــــوا شبابنــــــا منكســــــر راضــــى يكـون الذيـل
باعـــــــــوا علينـــــــــا وهمهــم ووفـوا من دمانا الكيل
ولا خلـــوا فى البلـــد فــــارس ولا حتــى حداهــا خيــل

بسنت يقول...

بيرم المصرى
هو يمكن فعلا ما فيش لا فارس ولا جواد ولا حتى سيف
بس فى انسان يصلح انه يكون فارس وصديق وقت الحاجه ليه
بس للاسف لا يظهر الا فى النكبات
سلم مرورك الجميل