الجمعة، 27 يونيو، 2008

أعذروه فهو لا يتجمل ولكنه يكذب

مش عارفه ليه كل ما اشوف وش الاخ دا افتكر فيلم شويكار
لما كل حد يقول اسم عز تقوله : تبقى أنت اللى قلت بابايا
سبحان الله دلوقتى بنقول كلنا انت اللى قتلت الشعب والشباب وكل من له طموح
فى حياه احسن هو اكيد مش السبب فى كل حاجه احنا بردوا السبب ان سكتنا كتير
المهم اطل علينا بوشه البرئ اللى بيعلن بثباته انه يكذب ويتجمل
وببراءه الاطفال فى عينيه جاوب بثبات دى اهم حاجه على اسئله منى الشاذلى فى برنامجها الجميل العاشره مساء
لا انكر انى انبهرت باجاباته المتمساكه او اللى بثبات تمام
الراجل حافظ كل حاجه ومقنع الحق بالحجج والبراهين والقوانين؟ ( دى اهم حاجه)
ومنى قالت جمله هزته فى الاخر بس بردوا بثباب
قالت ( انك تستطيع ان تخدع كل الناس لبعض الوقت وبعض الناس كل الوقت لكنك لا تستطيع ان تخدع كل الناس لكل الوقت )
اطمنى احنا مش مخدوعين احنا فاهمين – بس هنعمل ايه – المراره والضغط والقولون العصبى
وكل امراض العصر جتلنا نحن معشر الشباب والبنات
مش فاضل غير نودعكم وبس
اللى نفسى اعرفه فعلا من – عز – يا ترى احساسه لو فى يعنى –
بايه لما يلاقى الاباء والشباب والبنات وكل من لا يستطيع السكنه بعد اسعار الحديد والعقارات بقت فوق طاقه اى حد الا بتوع مارينا طبعا
دعاء الناس دى عليه؟
حاجات كتيره--- ما فيش كلام ساعدنى الحقيقه دلوقتى
تمثليات قوانين الاحتكار والقوانين الجديده على المخالفين
والشركات الكبيره كله اتاخد فى غلوه كدا ولا كأنه قانون هيتكتب فى دستور
ويمكن نقعد ننفذه الى مالا نهايه
وللحظ كنت لسه قبل البرنامج بساعه يمكن قاريه ( تحت المتراس )
ملخص للكتاب وهو كتاب بكلام دينيس تاتشر زوج المرأه الحديديه مارجريت
تاتشر رئيسه وزراء بريطانيا فى عصر سابق بقلم ابنتهم
وازى بدأت وانتهت
الكتاب وضح اهم حاجه ان لكل شئ نهايه – يا عز --- مهما حصل
ربنا كبير اوى
( فصبر جميل والله المستعان )

هناك 20 تعليقًا:

ادم المصرى يقول...

البوست رائع بجد جميل جدا المشكله كبيره اوى وصعب تتحل بساهل والمشكله الاكبر ان الموضوع مش فى المظهرات او النواح او بتحديف الطوب لئن دى مش من صفات النبى صلى الله عليه وسلم ولكن نلجأ كما لجأ سيدنا عيسى من مأجوج ومأجوج الى الدعاء نذهب الى الله ونرجو من المغفره لا يغير الله ما بقوم حتى يغيرو ما بى انفسهم الهما اعزنا بى الاسلام

blue-wave يقول...

مش عايز اقولك ان بعد ما شوفت المخفى دا واجاباته المستفزة ضغطى ارتفع وحسيت انى بغلى
يلا ربنا قادر على كل ظالم

بسنت يقول...

الاجمل مرورك يا ادم
وزى ما انت قلت لازم احنا اللى تتغير سلبيتنا للامور وانتظار انها هتتحل لوحده بس بردوا مش المظاهرات بس هى الحل
ادينا بنفكر يمكن نلاقى حل لكل صعوبات واللى بيصعبوا علينا حياتنا
سلمت

ahmed_k يقول...

يا بسنت العيب مش عليه العيب علي اللي اداله الفرصه والسلطه ليعمل كده في البلد ويصول ويجول دون محاسب او رقيب احنا في بلد احوالها غريبه يعني كان الناس كارهه الشاذلي فشالوه وجابوا الألعن منه علشان يتقال فين ايام الشاذلي كانت نعمه والناس كارهه قانون الطوارئ فحطوا بداله قانون مكافحة الرهاب ولما يتنفذ حنترحم علي ايام قانون الطوارئ , الحال ماشي من سيئ لأسوأ فالعيب مش في الشخاص العيب في النظام باكمله اللي بيصلح حال بحال اسوأ منه , عز ده رجل اعمال يعني بزنس مان ماله والأمور السياسيه يعني دخل مجال مش بتاعه فلازم يسنخدمه لخدمة اغراضه الشخصيه وخدمة اللي اعطاه القدره ليتسلط ويحكم بلد باكملها , مش عايز اقول ان الكبير عجز والبساط بدأ ينسحب من تحت رجله ولكن حال البلد ميسرش عدو ولا حبيب , ولنا الله آآآآآآآه مع السلامه بقي

أمل فتحى عزت يقول...

السلام عليكم بكل الحب والاحترام


ادعوك لمتابعة الحلقة الرابعة من حكاية عمى رمزى وعم عمارة فى الحارة


تعالوا نسمع ونشوف العفاريت بتقول ايه عن الحارة
********************
يازائرة الحارة لقد كتب التاريخ أسمك فى دايرة عمى رمزى لقد تشرفنا بك مع أهل الحارة
*********************
أسعد الله صباحك يابسنت وصلنى تعليقك مع اطلالة نسمات الصباح لك منى خالص الشكر لمرورك الجميل بمدونتى
كما أحب ان الفت انتباهك الى ان باقى القصةمنشورة كاملة ويمكن تصفحها من الارشيف الجانبى على مرحلتين وهما
ـ الشطر الاول
ـ الشطر الثانى

مع خالص تحياتى

بسنت يقول...

كلنا جالنا نفس الشعور بس اللى يغيظ هو الثبات والبرود اللى فى الشخص دا علشان كدا عايز كلنا -- نثبت اوى فى الايام الجايه
وربنا يريحنا منهم كلهم
سلمت دكتور عمرو لمرورك الجميل

بسنت يقول...

بالنسبه للى اداله الفرصه طبعا محدش بيخدم او يعلى لله كله مفهوم مصالح مشتركه او ارتباط السلطه بالمال زى ما بيقولوا--- عز بيصرف كويس اوى-- فطبيعى ياخد حقه وحقوق الكل
سلمت يا احمد على مرورك الجميل

بسنت يقول...

انا الاسعد يا امل بمدوناتك وبستفيد فعلا من اسلوبك الجميل
دمتى بكل الود

nonni يقول...

عندك حق فى ل الكلام اللى قولتى على الباشا عز و كنت حاسة فعلا انه حافظ اجابات و بيرصها و قد ايه بيجاوب بكل برود و هدوء اعصاب و احنا دمنا بيفور
من قدرش نعمل حاجة غير ان احنا نقول حسبنا الله و نعم الوكيل

مدونتك حلوة اول زيارة ليها اكيد مش الاخيرة
"تحياتى"

بسنت يقول...

طلتك الاحلى يا نونى
وربنا ياخدهم كلهم ويريحنا منهم قريبا
قولى يا رب

د\أسماء علي يقول...

الجميلة بسنت
عز ظهر في البرنامج لزوم التلميع الإعلامي ..
هو عارف اللي هيتسأل فيه وعارف المخارج كويس اوي
لأن ماحدش يوصل للي فيه ده و الجبروت اللي هو فيه ده من غير مايبقى ذكي جدا وأساليبه ملتوية
يعني دي حاجة بديهية
...
العيب بقى في الشعب اللي ساكت
ماهو كل واحد في وادي
نقول اضراب نص الناس تخاف
بجد حرام اوي اللي بيحصل ده
...
تدوينة متميزة
...
تحياتي

بسنت يقول...

فى كتير منا ما خاف يا د- اسماء
بس صعب نكون واحد من كل 10 بس اللى مش بيخافوا
للاسف دا زمن عز وبس
شكرا على طلتك الجميله

mregypt7 يقول...

اولا السلام عليكم ورحمه الله وبركاته
دى اول زياره ليا ومش هتكون الاخيره باذن الله
كنت بس عاوز الفت نظرك لحاجه
انتى بتقولى عز رفع الحديد ومش عارف ايه
على فكره احمد عز بيطلع طن الحديد من مصنعه ب 5990 السبب فى ان الحديد بيغلى اوى
هم التجار بياخدوه بسعر المصنع ويبيعوه باكتر من 8000 للطن
وده برضه ما يغنيش ان احمد عز بيمارس سياسه الاحتكار هى موجوده
بس معلش له حق
مافيش مصانع بتجيب خام الحديد وتنتجه كله بحزافيره يعنى من الاول للاخر
ديه بس كانت مداخله سريعه
اتمنى انك تنورينى
خالص تحياتى
الباش مهندس بوحميد

ســمـــر احمد يقول...

على فطرة يا بسبوستى هو احمد عز رمز من رموز عصرنا ده بكل فساده ... متدرب اعلاميا كويس و قادر يواجه الاتهامات ويرد بدلوماسية .. تعرفى نفسى نكون قادرين على قول الحق بنفس المهارة اللى بيتقال بيها الباطل ..

على فكرة التدوينة حقيقى رائعة و الاراء المطروحة ..


و على فكرة كمان ... ليكى واجب فى مدونتى تعالى شوفيه ...

حبيبـــــــة القمـــــر يقول...

السلام عليكم
بتتكلمي عن عز وكأن اللي عمله حاجه غريبه
يابنتي صدقيني بقى خلاص كله محصل بعضو
الناس اللي بتتكلم عن الفساد هم اول الفاسدين
واللي بيتكلموا عن بيع البلد هم اول ناس باعتها
وحتى لما بنقول نتكلم ومانسكتش
وقت الجد تلاقينا مستخبيين في البيت
وبنقول من خاف سلم

لأنهم بيعرفوا ازاي يخرسونا ويبثوا الرعب في قلوبنا
مبقاش في ايدنا غير الدعاااااااااااء
وحتى الدعاء يبقى في السر بدون جهر

والا قانون عمنا طارق ولا اخوه ايهاب
هيشتغل علينا

بسنت يقول...

باشمهندس ابو حميد
اولا شكرا على زيارتك الجميله ويا ريت طبعا تشرفنى كتير
ثانيا انا مش قلت انه بيغلى السعر ولكن احتكاره للحديد بيغلى سعر الشقق والعقارات كنتيجه طبيعيه
وبالنسبه لاعلانات الجرايد ان سعر طن الحديد اقل من 6000 فدا على الجرايد بس لكن فى منفذ البيع مش بيحصل هلى دا عيب احمد عز انا بردوا ما قلت كدا
دا اكيد عيب الرقابه على منافذ البيع دى
هى سياسه شيلنى واشيلك الحكومه مع رجال الاعمال-- متهيألى طبعا

بسنت يقول...

يا يا سموره فينك من زمان
طبعا عز هو رجل ورمزللزمن دا
انا شايفه اننا نسميه زمن عز واصحابه
اصلا
وبالنسبه للخوف من قول الحقيقه
او الحق فدا صحيح جدا الحقيقه يعنى
ان اللى بيقول الحقيقه مباشره وبينفذ بيتاخد فى الرجلين الناس ليها حق تخاف
دا اكتشاف متأخر اوى ليه

سموره-- ما تغبيش تانى
والواجب-- جايه اهو حالا

بسنت يقول...

حبيبه الرحمن من ناحيه من خاف سلم فدا زى ما لسه قايله لسموره
حقيقى واكتشاف ليه متأخر
لان علشان تاخدى حقك اللى هو حقك لازم تملكى سلطه ونفوذ او-- فلوس
والبجاحه بتاعه العالم الفسدان دا طبيعيه بردوا
لان المثل بيقولك يا فرعون مين فرعنك قال ما لاقيت حد يلمنى

يالا على الله
شكرا لطلتك الجميله

Ahmed Al-Sabbagh يقول...

رائع

انا كنت اتشغلت كام يوم قوم لقيت الدنيا كلها مقلوبة على عز وكمان منى الشاذلى عملت برنامج روعة

انا جيت اهو ما لقيتش الواجب اللى قولتى عليه

؟؟؟؟

فين

تحياتى

احمد

بسنت يقول...

ماشى يا صباغ
فرق التوقيت بس
الواجب نزل اهو
شكرا على طلتك اللى بتسعدنى دوما