الجمعة، 30 مايو، 2008

هى-- وهما صغيرين

(1)


استمعت لصوت  صديقه عمرها كما تعتبرها
قالت لها انا مفتقداكى اوى نفسى اشوفك علشان اعرف انى لسه صغيره ما كبرتش
حاسه انى عجزت مش سنه واحده جواز بس عدت عليا دى ميت سنه
( فاكره لما كلمتينى الساعه 6 الصبح علشان تقوليلى نكته قرتيها )
كنا صغيرين وصافيين يا هاله
الولد عيان وانا فى هم مع حماتى اللى مش مهنيانى على هانى
غيرانه منى تصدقى والدنيا غاليه اوى المرتبين مش مكفينا واحنا تلاته بس
طيب سلام بقى احسن هانى جه مش هخلص لو ما لقى الغدا جاهز
بقولك ايه وانتى اخبارك أيه؟
------------------------------------------------

(2)
أنتى حره من دلوقتى انا بخليكى من اى وعود او عهد
انا ضايع ومش شايف حاجه وانتى ليكى عين كاشفه لكل حاجه عين الصقور
ازاى ما قرتنيش وقريتى مستقبلنا كويس
بعد سنين
قالها معقوله الكلام اللى قلته دا زماان
فاكره كلامى المتلخبط-- كنت صغير اوى
وعامل نفسى بطل
وانا عارفك مش بتنازلى عن دور البطوله
وانتى مبسوطه فى جوازتك دلوقتى؟
هى:الحمد لله
دا اللى يهمنى ويخلينى فعلا سعيد
انتى عارفه دلوقتى مكانى لو احتجتينى ... تلاقينى
هى : لما تلاقى نفسك الاول
--------------------------------------------------------

(3)
قرت الروايه بتركيز محبب جدا لها
للمره التانيه تلاقى نفسها تماما فى قصه... القصه الاولى كانت شابه مندفعه وجريئه
التانيه شابه منفتحه بس الصراعات الداخليه فيها بتكسرها وتعيدها تانى
صحبتها قالتلها ايه دا يا بنتى
انا شايفه نورا فى القصه مش البطله
تمنت تعمل زى البطله الخجوله جدا وان تطيع الزمن
هى أكتر جرأه بكتير منها
الشخصيات حول البطله موجوده فعلا فى حياتها هما الاتنين موجودين
الغريب ان البطله احبتهم هى كمان.. الاصحاب اصحاب... حتى مقولتها اتقالت...
الصدفه كانت اقوى من احتمالها .... لوجود حياتها فى كتاب
بس هى مش هتخلى الدنيا تكسرها زى البطله هى اقوى بدون انكسار
قالت لها صاحبتها اللى اشترتلها الروايه بس النهايه كانت سعيده وفى صالح البطله
قالت ما اعتقدش --- دى احلام صغيره اوى عليا


---------------------------------------------------------
(4)
هى :متشائم دايما
نفسى اشوفك متفاءل مره مش عارفه دكتور ازاى وانت مش عارف تعالج نفسك
هو :لما الدنيا تتعدل والحق يتحقق هخف اكيد
بطل مثاليات الحق والعدل ...عارف تنفع محامى فى الامم المتحده
بفكر اكمل دراسات عن حقوق الانسان
انا مش هكمل طب تانى
مدحت وصل لفين يا هاله
سمعت انه دلوقتى بيقول محاضرات فى جامعات اوروبيه بعد المنحه
اللى خدها للماجستير
ولسه متشاءم اخوكى دا بردوا
لا مش متشاءم بس دا محبط كمان دراسته بتخليه يزور كل
البلاد اللى فيها مجاعات وفيضانات
الانسانيه شغلاه جدا... مش هيخف ابد...
ويعرف ان اللى بيدور عليه دا
احلام فى السما..... واحنا لسه على الارض

هناك تعليقان (2):

سـهــــر... ساكن دروب الليل .. مستنى نقطة نور يقول...

ملامح مختلفه لمشاهد انسانيه
هى فى اساس هذا الكون
اختلافاتنا مع الاخرين .. اختلاف رؤيانا بعد السنين .. و توقف نظرة البعض عند نفس الرؤيه

الاختلاف عزيزتى هو ميزتنا

بسنت

بوست جميل و مدونه رائعه
تقديرى و احترامى

بسنت يقول...

اختلاف فعلا انا قصدت المعنى دا
وان فى منا بيقف عند نفس النظره وفى بيتغير مع الوقت
هى مواقف حياتيه
سلمتى يا سهر لمرورك اللى نور مدونتى البسيطه
ودمتى بكل الخير