أسطورتى

أفهمنى 000 أرجوك

تقوم مناقشه شبه يوميه بينى وبين أستاذى الفاضل
بين أنه ينقم على كل شئ فى مدينتنا ومع ذلك لا
يريد أن يهاجر مثلا كما يفعل أقرانه وأقاربه
أو حتى يذهب للحياه بالقاهره المعنى الاخر المناقض
لمدينتنا - تكمن مشكلتى فى المناقشه ان- الذى لا يريحنى
لا شئ يجبرنى ان أتعامل معاه أو أعيش فيها مثلا
-تناقضاته بين كره المدينه والتمسك بالعيش بها
والمفترض فعليا هى مصدر رزقه الخاص تجعلنى أعترض عليه
وأصحح له أن بأمكاننا نحن سواء هو أو أنا أو الاخرين
المحطين بنا أصلاح أنفسنا بمعنى من الاصغر(أو أبدأ بنفسك)
لانه لا معنى ان أصلح رئيس مجلس الحى والفساد فى صغار الموظفين بالبلده
لا أصل ابدا لاصلاح هذا المفهوم وتوصيله له وهو الكبير عنى سنا وخبره وحياه
مشكله أن تعيش حياتك فى دائره سلبيه من فكرتك حولها
لا أنكر أننى أصبحت أتجنب المناقشه حتى لا يصيبنى شئ
من تلك الدائره الناقمه السوداويه
وأصبحت أؤمن أنه ليس دائما الكبار على الصحيح

(لا يمكنك أن تكون مزدوج الولاء)

قالها لى صديقى العزيز أنه ليس بداخلنا قلبين
فلا يمكننى أن أسمع مثلا مسلسل وأنا بذاكر
وهكذا ولكننى لا أعرف حتى الأن الافضل نصف من شيئين
أم الشئ الواحد الكامل
- الانتماء لأحد أم الانتماء لأثنين-
سنقول من ناحيه التعارض بين دراستين مثلا
بالتأكد العقل والقلب والوقت هو المتحكم
فى هذا الولاء او الاهتمام والتركيز
بس مؤخرا فهمت معنى الولاء لشئ واحد
والاخلاص له فقط عندما نبعد أحد الاثنين ويتبقى
فقط أخر هنا يثبت إلى أيهما سننتمى ونميل بصرف النظر
عن الفائده الولاء غالبا للذى أخترق دواخلنا وأستقر

(كل واحد منا سيأتى دوره فى القصه ثم ينتهى)

نعم هى هكذا دور لا أمثله طبعا ولكنى أعيشه
أحيانا يظهر لنا هدف وأحيانا أهداف وأحيانا
لا يظهر شئ على الاطلاق خلال أيام حياتنا ولكننا نستمر فى
الدوروأحيانا الحياه تدفعنا لموقف وطريق واحد بقوه دفع غريبه
ربما نسميها لا إراديه
لا أعرف وقتها أين سيكون الهدف تحديدا بعد توقف اختيارنا
اذن فلنتوقف عن التفكير و نجعلها تختار لنا الدور القادم ونرى

أن تعيش أسطورتك

أنا أفهم الأسطوره كما استمتعت بفيلم ملك الخواتم
lord of rings
أن تفعل شئ يغير فى العالم من حولك سواء اسرتك أو بلدتك
او كما فى الفيلم العالم كله بينما أن أصنع شئ لأحسن نفسى
أين الأسطوره فى ذلك؟ هذا السؤال أصبح يحيرنى بعد متابعتى
للاجزاء الثلاثه لفيلم الاسطوره فعلا
وجدته فى معنى بسيط من عامله بسيطه
أحبها كثيرا فى عملى عندما تطلب منى شئ بسيط أيضا
ولكنه يفعل بها شئ جميل من الفرحه مثل هذا اليوم
البسيط أيضا صنع جزء من أسطورتى التى ربما كُتبت أجزاء
منها فى ماضى السنوات السابقه والتى ربما تكتمل نهايتها
فى الأيام القادمه إن شاء الله

(الصفحات الأخيره 000 لك)

كما ترك الصديق أفردودو لصديقه
سام صفحات قصته ليكملها
سأتركها كذلك لتكملها كما تريد

ما تفوقى بقى يا مصر

مش عارفه مش حاسه بيا ليه يا مصر
ولا كأنك تعرفينى ولا أعرفك

فكرت أكتبلك رساله قلت يمكن تفهمينى
يمكن لما تنطقى يوم هتردى عليا وتكلمينى

وبعد ,,,,, يا مصر

بقيتى ضعيفه أوى كدا ليه؟
بعتى كل حاجه فيكى لغريب
نفسى أعرف فاضل ليا فيكى أيه


خايفه أبطل أحبك يا مصر
لا أنا خايفه أكرهك وما أرجعلكيش
ويوم ما تحتاجينى جنبك أكون على أرض
تانيه بعيد هناك كأنسانه
بجد بعيش


هتتحررى من أستعمارك أمتى يا مصر؟
هتخرجى من ذُلك دا وهسمع للحريه فيكى أمتى صوت
ولا هتفضلى بقهرتى عليكى كدا لحد ما يجى
علينا سوا ميعاد الموت

سمعانى يا مصر؟
الخير اللى كان بيتباهو إنه مغطيكى
وبلد الامن والامان حواليا وانا بدور عليكى
والناس الطيبه والزرع الاخضر اللى اختفوا على
اراضيكى

فين هما يا مصر؟
فاكره صلاه العيد وضرب الصواريخ
فاكره طوابير المدرسه والاحترام للكبير والتلاميذ
فاكره الحرب علشانك والشهيد على الجبهه

فكرتك بكل حاجه ولا لسه ناسيه؟

وأخيرا يا مصر
نفسى أسمع روحى مره تانيه بتقول فداكى
نفسى يرجع النشيد فى الميكرفون زى زمان
نفسى تتحركى بجنود الارض للاقصى من الميدان
نفسى ترجعى تفتكرى ولادك اللى حبوكى بجد
ويملوا عنيكى وقلبك بالعزه مش الهوان

يا ريت تتشجعى شويه وتجاوبينى

هتفوقى أمتى بقى يا مصر؟

استراحه

بدايه اليوم اجازه بمناسبه جميله هى نصر اكتوبر
1973 طبعا التاريخ دا بالنسبه لافكارى حاليا مهم جدا
تاريخيا ومعنويا ونظرا لظروف الروقان اللى انا فيها
مؤقتا قبل الطحن اللى بضجيج اللى هكون فيه من الاسبوع القادم
ففرصه ترفيه شويه بحل التاجين دول
الاول من بسنت صلاح الجميله التى اتفق معاها تمامافى مناصرتها للمرأه
بحكم انتمائى لجمعيه أهليه لتنميه المرأه
***************************************
((أذكر خمس أحلام على الاقل ..تخص ماضيك وتحلم فيها بتغيير اشياء
..ماذا ستعدل وماذا ستترك؟؟))

الاول= حلم حفظ القرأن الكريم كاملا من الطفوله
بس ان شاء الله اكمله فى المستقبل القريب

التانى= حلم كليه الاعلام حلم قديم اوى
بس مش هغيره لان الصيدله اضافت ليا كتير

التالت= حلم انى اسيب مصر واسافر
او اهاجر بس حلم بعدله تماما لانى اكتشفت
ان ارتباطى بمصر كل ما اكبر بيزداد

الرابع= اتقن لغات تانيه غير الانجليزى بس
هو صعب حاليا فعدلته

الخامس= جمعيه لى ولخدمه كل امرأه او بنت فى بلدتى
هو حلم قديم جديد ودايما بردده علشان ما انسهوش
طبعا هسيبه بلا تعديل

*************************************

أذكر خمس أحلام على الأقل ..تخص مستقبلك ؟؟؟

الاول= اخلص دبلومه الصيدله الاكلينكيه على خير الاول
وممكن افكر اعمل ماجستير

التانى= بحلم انى استقر نهائى واعمل اسره
خاصه بى مع شخص مختلف نهائى بردوا

التالت= اسافر لفتره مؤقته واشوف بلاد جديده
عربيه او اجنبيه

الرابع= احج او اعمل عمره مع ابى وامى
حلم غالى اوى عندى

الخامس= اعمل مكتبه اكبر بكتير من اللى عندى حاليا
والاهم اقرى كل الكتب اللى فيها


هخليهم 6 احلام علشان الجمعيه اللى ربنا يسهل وانفذها
ولو حاجه صغيره جدا ترضى طموحى الكبير فيها

****************************************

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن؟

اصدقائى فى الشغل الجديد لانهم خلونى اعرف يعنى ايه اسره فى الشغل
حب حقيقى خارج ضغوط الشغل الناس دى اثرت فيا ومش ممكن انساهم

صديقتى المسافره حاليا وتوأم روحى اثرت فيا بدايه من
قراءتها فى الدين كتابتها للشعر وهى احد
اسباب تغير افكارى فى حاجات كتيره سواء معاها او ضدها
كانت السبب فيها بردوا والسبب الاهم اننا بنشعر ببعض
عن بعد

بعض الدعاه مثل الدكتور محمد العريفى الذى كان سبب
تغير سلوكيات فيا خاصه بعد قراءتى لكتابه استمتع بحياتك

واكيد الدكتور عمرو خالد اللى كل ما اقراله كتاب
او اسمع له برنامج اعرف ان مصر لسه بخير وفيها ناس شرفاء

*******************************************

- أذكر شخصين على الأقل غير متواجدين فى حياتك حاليا كنت تود
وجودهم الان او فى حياة اولادك مستقبلا ..

اصدقاء العمل القديم وهما شخصيتين فعلا كنت اتمنى يتواجدوا معايا
فى عملى الجديد ونفسى تفضل علاقتى بيهم فى المستقبل بردوا
زى دلوقتى واحسن


فى شخصين تانين اصدقائى ايضا ساعدونى كتير فى بدايات
كتاباتى واثروا فى مجريات حياتى وافكارى
ادعو ربنا تعالى ان يكرمهم ويوفقهم لانى لا اعرف عنهم
شئ حاليا بس فعلا اتذكرهم بكل خير


المدونين اى شخص اقريتله اى شئ مفيد او غير مفيد
بس فعلا عالم التدوين اتمنى افضل متابعه اصحابه
حتى لو شاءت ظروف وتوقفت عنه

\\\\\\\\\\\\\\\\\\\\\\\\\\\\\\\\\\\\\\\\\\\\\

التاج التانى من اخويا الصغير بس كبير افكارا
حسام شاهين صاحب رؤيه تسامح الديانات و حوار الحضارات


اسمك؟؟
على النت بسنت

سنك؟؟
سنة 28

اسم مدونتك؟؟
الاولى=خواطر شابه تعيش مع الاخرين وتريد ان تكون هى
التانيه= من قراءاتى
التالته= حلم الجنوبى ودى مشتركه مع مدونين اخرين



مجال دراستك؟؟
نقول عملى الصيدله

هل فكرت فى اغلاق مدونتك؟؟ والسبب؟؟
طبعا ودا بعد شهر من عملها لانى ما كنتش لاقيه ليها اى
معنى بجانب ما كنتش اعرف اى مدونات تانيه اتواصل معاها


أيه رد فعلك لو حد قل أدبة عليك فى المدونة؟؟
الحمد لله ما حصلتش بس انا بعتبر اى شخص سلوكه معبر عنه
سواء كلام او فعل والغير محترم سأتعامل معاه بسلوكى
مش تبعا للى هو كاتبه


أسوأ مدونة دخلتها؟؟
اى مدونه تعرض صور غير محترمه بعتبرها سيئه
اما عن الفكر فانا اؤمن بحريه الافكار
بس بشرط ما تسئ لغير شخص المدون نفسه


هايحصل ايه لأيميلك بعد لما تموت ؟؟
يمكن يفضل يمكن يموت بردوا


عطيت الباسوورد لحد قبل كدة ؟؟
ايوا لاختى


السفر بالنسبة لك؟؟
حلم جميل بيغير فى شخصيتى جدا حتى لو داخل مصر
كل سفريه بتعلم منها شئ فى التعامل مع ناس
مختلفه بجانب رؤيه اماكن ومعالم مؤثره فى ناس عاشت
فيها بس تركت اثر كل سفر برجع منه بالتأكيد احسن



المود بتاعك ايه ؟؟
غالبا هاديه بس ساعات يقلب اكتئاب
ساعات يقلب روقان


بتعمل ايه ف وقت فراغك ؟؟
القرايه هوايتى المحببه
او بنام


الأكلات المفضلة ؟؟
محشى ورق العنب و البوفتيك
والفراخ البانيه والارز بالخلطه و الجلاش بالمفروم
والفاصوليا واللوبيا الخضراء


الصفات اللى أخدتها عن والدك ؟؟
التواضع والعصبيه
ومساعده اى حد حتى بدون سابق معرفه
حب العمل واتقانه
حب الاهل وصله الرحم



الصفات اللى اخدتها من والدتك ؟؟
الطيبه والنظافه
مراعاه الاخرين وخاصه حق الجيران
حب الاهل وصله الرحم بردوا
تكوين صداقات



اكتر ست حاجات بتحبهم ؟؟
1-القراءة
2- تجميع الصور وكتابه المقولات فى اجنده خاصه لدى
3- يوم عمل خير سواء مع الجمعيه او لوحدى لناس محتاجه
4-اعمال الكروشيه والتطريز
5-مشاهده الافلام الاجنبيه الدراميه والاجتماعيه
6- سفرى القاهره خاصه فتره معرض الكتاب كل سنه
هضيف ليهم حاجه 7- شراء الكتب والمجلات ايضا متعه


أكتر ست حاجات بتكرههم ؟؟
1-الخيانه
2-الفراق
3-التقليد لاى شخص لان كل شخص له ميزته الشخصيه
4-الكدب
5-عدم الشعور بالامان
6- المواصلات الا المترو


شخصيتك نوعها ايه ؟؟
هاديه وغير اجتماعيه لحد ما
حاده الاراء احيانا كتيره


لماذا دخلت عالم التدوين من الأساس ؟؟
كترفيه فى اوقات اللى بكون فاضيه بعيد عن الشغل
و قلت اجرب شئ جديد وليه علاقه بالكتابه
لانى بحب الكتابه من زمان


احلى جملة قيلت فى وصف مدونتك ؟؟
ان لغتها بسيطه والمدونه نفسها بسيطه
وفى جمله عجبتنى اوى قالتها ايناس ( نهر الحب)
انها مريحه نفسيا


أهمية التعليقات بالنسبة لك ؟؟
تواصل مع ناس تانيه ممكن تفهم قصدى وممكن لأ
واحيانا بيكون التعليق نفسه اهم من اللى كاتباه
وبيضيف ليا شئ جديد فعلا بتعلمه


أحلى بوست كتبته مع ذكر السبب ؟؟
فى مدونه خواطر شابه = موضوع (آيات الله تعالى)
لان الايات دى فعلا زى ما كتبت بتأثر فيا كل مره
اقراها وبتهزنى فعلا

فى مدونه من قراءاتى = (سقف الكفايه)
لان الروايه ما عجبتنى ابدا بس قدرت اطلع مقولات منها
اثرت فيا كتير بعيدا عن ملل الروايه نفسها


أفضل مدونة قرأتها ؟؟
الصراحه كل المدونات اللى كتباها عندى فى مدونتى من قراءاتى
بعتبرها مفضله وان كنت مش كلها بعلق فيها بس متابعاها باهتمام
بس مدونه ( أم البنين) مدونه بستفيد منها دينيا فعلا


الشغل بالنسبة لك ؟؟
استقلال مادى عن اسرتى طبعا
والحياه الحقيقيه( الخيير والشرير) بعيدا عن حمايه اسرتى بردوا
محاوله اصلاح اوضاع ساءت للاسف فى مجالى من جانب صيادله اخرين
وبحمايه قوانين باليه

أهمية الأنترنت بالنسبة لك ؟؟
1- وسيله تواصل مع اخواتى واصدقائى فى حالات السفر
وبعد المسافات وصعوبه الاتصال

2-موسوعه معلومات حاضره فى اى وقت عن اى شئ

3-ترفيه( زى المدونه كدا والفيس بوك)


تمرر التاج ده لمين ؟؟؟

هما حاليا تاجين فالاتين اللى عايز يجاوب عن واحد بس ماشى
عن الاتنين ما فيش مانع بردوا
----------------
سمر صاحبه مدونه همس السمر
سهر صاحبه مدونه سهر
الباشمهندس احمد صاحب مدونه بالترجمه - المواطن المكافح
دكتور احمد عثمان صاحب مدونه وجه جديد
محمد الديب صاحب مدونه عايز اقول
الست فرويد صاحبه مدونه حكاوى الست فرويد
نهار صاحبه مدونه - بالترجمه م س ك
اللى مش تايه فى وسط البلد صاحب مدونه وسط البلد
الازهرى صاحب مدونه الفارس الاخير
صفاء صاحبه مدونه عصفور فى الاسر
مايكل صاحب مدونه مايكليتو
هاجر صاحبه مدونه مشاعر صنعت كلمات
احمد زكى صاحب مدونه دردشه عربى
الصيدلانيه صاحبه مدونه صيدلانيه طالعه نازله
انا حره صاحبه مدونه بنوته مصريه
كيميت صاحبه مدونه فى حبك انت
الشاب الفقرى صاحب مدونه يوميات شاب فقرى
دهب صاحبه مدونه طوبه فضه طوبه دهب
----------------------
اللى جاله التاجين من قبل يبقى عذره مقبول
واللى نسيتهم ان شاء الله افتكرهم وارجع اضيفهم

احلام سعيده

بدايه اليوم: الجو معتدل الشمس خفيفه بوجود شمسيتى طبعا
رفيقتى الملاصقه لى حاليا عرفت ان اليوم سيكون جيدا
طالت وقفتى تحت الشمس التى اصبحت غير خفيفه وبالتالى اليوم
اصبح اشد حراره والصداع فى رأسى بدأ

ذهبت للعمل فسمعت محاضره فى المواعيد من مديرى المحترم
لتأخرى فى المواصلات وبدخولى مكتبى عرفت من اصحابى
اخبار غير سعيده بالمره اما عن الصداع فزاد برأسى بلا شك

شربت نسكافيه ولم اكمل باقى الديوان وانصرفت مبكرا
فتذكرت زياره استاذى الفاضل فى عملى الخاص
فذهبت اليه فقلت له إنى سأعود للعمل مره أخرى
فقال لى: الشغل حلو بردوا
فقلت: اشعر انى مفتقده حاجه فى يومى المعتاد
قال لى: دا اسمه الفراغ

منتصف اليوم:عدت لبيتى وجلست افكر ما هو الفراغ الذى
اشعر به فأنا اعمل وأقرأ كثيرا وأشاهد أفلام دراميه
مؤخراوأكتب وأخرج ولكن شئ ناقص ايضا

صرحت امى لى انى اصبحت عنيفه مره اخرى فى كلامى
وأفتت أختى إن حقى ادافع عن حياتى وعن شغلى
لو لزم الامر أما عنى فأزددت وحده بين الجميع

تتصل بى صديقتى لتبث لى أخر أخبارها وأجازتها التى
بدأت فأعلم أننى لست الوحيده صاحبه افكار الاجازات
وذكرتنى بأيام جميله بيننا فى عملى القديم معها
ولكنها مضت

نهايه اليوم: لازلت أشعر بالصداع وغالبا لن أعرف أنام
فلأبحث عن روايه من مكتبتى أعيش معها بعض الشئ

سحابه سوداء00 دخان أبيض000 خطوط رماديه
هكذا كان يومى بلا مواربه

وتذكرتك أيضا هكذا أنا لا أتذكرك سوى فى
أزماتى الحياتيه وواضح أننى أفتقدك لا غير

( يوميات يوم غير سعيد تمنوا لى أحلام سعيده)

ولع أن تعرف التاريخ

لم أكن يوما مهتمه بالتاريخ او الجغرافيا بل ربما هما اكثر مادتين يسببوا لى الازعاج منذ الدراسه وكنت ارى انهم يحتاجوا لحفظ لا غير وانا عقلى علمى كيميائى يعنى تفاعلات وتفكير علشان افهم ، الى ان جاءت فرصه افضل للتقرب من التاريخ بحاجه بسيطه وهى مسلسل (عباس الابيض) ومدرس التاريخ عباس او الفنان يحى الفخرانى فعلا جعلنى احب التاريخ بمفهومه المبسط وجعلنى اعيد التفكير
للقراءه والمعرفه عن تاريخ بلادى ولكن انشغلت او تناسيت الى ان جاءت زياراتى لمدونات صديقه تهتم بالتاريخ سواء سياسى مصرى او عربى او اسلامى المهم انه تاريخ لا اعرف عنه شئ
فبدأت اهتم بالتاريخ الفرعونى كبدايه خاصه بعد معرفتى من ايميل جاءنى ان رمسيس الثانى (الاسره 19) هو فرعون مصر صاحب اشهر قصه بالقرأن الكريم مع النبى موسى عليه السلام وبدأت الامور
تتداخل مع ذكرياتى لزيارتى لمدينتى الاقصر واسوان وتذكرت انبهارى بالاثار كأثار وليس كتاريخ

ثم الاسلامى جاء مع قراءتى لبعض كتب الصحابه والصحابيات عن التاريخ الاسلامى ككل مع وجود مصر والفتوحات الاسلاميه فزاد اهتمامى بهذا التاريخ العريق وخاصه انه يتوازى مع خطى الحبيب عليه الصلاه والسلام فالامر اصبح ضروره وليس مجرد معرفه وان كنت ومازلت على سطح المعرفه

ثم جاء اهتمامى بالتاريخ العثمانى فى مصر بعد قراءتى عن تركيا واسطنبول تحديدا وهذا كان بدايه بحث عنكبوتى على الشبكه أفادنى بطريقه ممتازه

واخيرا زيارتى منذ شهرين تقريبا لمكتبه الاسكندريه والتى اراها حلم جميل اتمنى ازوره مره اخرى
الزياره كانت فاصله لانى انفصلت فيها عن اصدقاء الرحله لاستمتع بوحدتى بلا ازعاج تماما بها
قاعه لوحات الحمله الفرنسيه والمخطوطات اكثر شئ انبهرت بمعنى الكلمه بهما
بجانب قاعه شادى عبد السلام الاسطوريه ولكن الثوره الفرنسيه تحديدا واعمال البعثه العلميه
فيها عن تاريخ مصر وتسجيله بطريقه مذهله فعلا خاصه الصور
ركزت فى الزياره بكل شئ جاء امامى واسمتعت بها فعلا وبعد عودتى لمحافظتى واثناء زيارتى لمكتب الهيئه العامه للثقافه بصدفه بحته وجدت كتاب الحداثه والامبرياليه وهو كتاب يقص باسلوب بسيط الحمله الفرنسيه عن مصر وانها ليست سبب الحداثه بمصر ، الكتاب الصراحه افادنى كثيرا فعملت به هوامش وهذا نادرا ما افعله لشرح خرائط مثلا لدول البلقان
ومصر وموقعها بالنسبه لدول العالم والدول بعد بحث ايضا فى الشبكه العنكبوتيه
لم انتهى بالطبع من الكتاب ولا من ولع جاءنى متأخرا بتاريخ بلادى
فأنا فقط بدأت
__________________________________

حكمه لى أولا ثم للأخرين

(( معرفتنا بتاريخ من سبقونا زياده وتوسع فى ادراكنا لقيمه ما تركوه لنا وليس لغيرنا
أحفادهم لنتمتع ونفتخر به ونستفيد ونضيف من حيث انتهوا
وما زلت أؤمن انى استطيع ان احلم وافعل واعرف من أنا
عندما أعرف من هم وماذا أرادوا))

آيات الله تعالى

كثير عندما ابدأ بقراءه القرأن الكريم بفتح صفحه عشوائيا

وبقرأها وغالبا أيضا تكون هناك رساله ما فى الصفحه دى بعرف

أنها موجهه لى شخصيا

هكذا بتكون آيات الله قريبه جدا منا فقط ان نقرأها ببصيره

العام الماضى فى شهر رمضان الكريم قررت ان اعلم على كل

آيه تستوقفنى وأحب فعلا سماعها من قارئ معين او

أن أراها امامى مثل الملصقات على الحائط

الآيات دى كثير منها يرتبط معى بحدث معين او معنى معين

ويصلنى مباشره بهذه الذكرى بمجرد سماعها او قرأتها

الآتى بعض من آيات الله التى دائما ما تستوقفنى وتحرك شئ بداخلى

بسم الله الرحمن الرحيم

(( الَّذِي خَلَقَنِي فَهُوَ يَهْدِينِ -وَالَّذِي هُوَ يُطْعِمُنِي وَيَسْقِينِ
وَإِذَا مَرِضْتُ فَهُوَ يَشْفِينِ -وَالَّذِي يُمِيتُنِي ثُمَّ يُحْيِينِ
وَالَّذِي أَطْمَعُ أَن يَغْفِرَ لِي خَطِيئَتِي يَوْمَ الدِّينِ ))

تذكرنى هذه الآيه بأن ربنا سبحانه وتعالى هو الشافى لأى مرض يصيبنا

والدواء والاطباء ما هم الا وسيله لتحقيق ذلك- ودايما بتفاءل لما اراها

فى عياده اى طبيب

(( وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ

وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لاَ تَعْلَمُونَ ))

احيانا كثيره لا نعرف اين الخير من الشر خاصه فى الامور القدريه

زى الدراسه والشغل والحياه الاسريه لكن الامر المؤكد ان ما يختاره لنا الله

هو الخير حتى ان خفى علينا ذلك فى وقت حدوثه ولكن هيثبت وتتضح الحقيقه

اجلا او عاجلا- بتذكر الايه دى بعد كل أزمه فى حياتى

((لَن تَنَالُواْ الْبِرَّ حَتَّى تُنفِقُواْ مِمَّا تُحِبُّونَ وَمَا تُنفِقُواْ مِن شَيْءٍ فَإِنَّ اللَّهَ بِهِ عَلِيمٌ ))

الايه دى دايما بتذكرها وانا بخرج صدقه لان فى نظرى لازم اخرج صدقه

من شئ احب ان اشتريه لنفسى وليس معنى الصدقه ان اشترى القليل او الارخص

مثلا لان الناس مساكين - دا مفهوم شخصى بحت- ودايما بكون عارفه

انها اذا كانت كدا هترجعلى واكتر بس بطريقه ما

(( الَّذِينَ يَذْكُرُونَ اللَّهَ قِيَامًا وَقُعُودًا وَعَلَىَ جُنُوبِهِمْ وَيَتَفَكَّرُونَ فِي

خَلْقِ السَّمَاوَاتِ وَالأَرْضِ رَبَّنَا مَا خَلَقْتَ هَذَا بَاطِلاً سُبْحَانَكَ

فَقِنَا عَذَابَ النَّارِ))

تذكرنى الايه بأيام الجامعه لأنها من أكثر الايات التى بيستشهد

بها اساتذه الجامعه- بس بفتكرها بجزأها الاول اكتر لما تفوتنى

صلاه الفجر لعدم القدره على النهوض من النوم- أيه تستحق

الوقوف عند معانيها كثيرا

(( رَّبَّنَا إِنَّنَا سَمِعْنَا مُنَادِيًا يُنَادِي لِلإِيمَانِ أَنْ آمِنُواْ بِرَبِّكُمْ فَآمَنَّا

رَبَّنَا فَاغْفِرْ لَنَا ذُنُوبَنَا وَكَفِّرْ عَنَّا سَيِّئَاتِنَا وَتَوَفَّنَا مَعَ الأَبْرَارِ ))

الأيه دى تؤثر فى كثيرا لأن معناها شئ روحانى ملائكى فعلا

واحبها كثيرا جدا

(( قُلْ إِنَّ صَلاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ ))

من اكثر الايات التى احبها فعلا ودائما لما أقرأها أو اسمعها

أشعر بشئ جميل واتذكر بها رسولى الحبيب عليه الصلاه والسلام

(( قُل لَّن يُصِيبَنَا إِلاَّ مَا كَتَبَ اللَّهُ لَنَا

هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُونَ ))

ونعم بالله دائما عزائى فى أى حادثه أو أزمه وتذكرنى

بأشياء كثيرا جميله مرت بى بعد كل أزمه

((دَعْوَاهُمْ فِيهَا سُبْحَانَكَ اللَّهُمَّ وَتَحِيَّتُهُمْ فِيهَا سَلامٌ

وَآخِرُ دَعْوَاهُمْ أَنِ الْحَمْدُ لِلَّهِ رَبِّ الْعَالَمِينَ ))

الحمد لله رب العالمين هى أخر دعواتى ايضا

بعد الصلاه

((إِنْ أُرِيدُ إِلاَّ الإِصْلاحَ مَا اسْتَطَعْتُ

وَمَا تَوْفِيقِي إِلاَّ بِاللَّهِ عَلَيْهِ تَوَكَّلْتُ وَإِلَيْهِ أُنِيبُ ))

احب أيه بكتبها دائما فى دفاتر المذاكره او اى شئ

اريد انجازه بتوفيق من الله

(( إِنَّ اللَّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنفُسِهِمْ

وَإِذَا أَرَادَ اللَّهُ بِقَوْمٍ سُوءًا فَلاَ مَرَدَّ لَهُ وَمَا لَهُم مِّن دُونِهِ مِن وَالٍ ))

معنى صحيح تمام هيفهمه كل من قرئ سير النجاح

او كتب التنميه البشريه فالتغير والنجاح حتى السعاده تأتنى من الداخل

وبالعمل الفردى اولا

((الَّذِينَ آمَنُواْ وَتَطْمَئِنُّ قُلُوبُهُم بِذِكْرِ

اللَّهِ أَلاَ بِذِكْرِ اللَّهِ تَطْمَئِنُّ الْقُلُوبُ ))

الايه دى هى حبيبتى بأختصار

شعارى لفتره طويله فى كتاباتى

أتذكر بها انسانه قريبه لى كانت السبب

الاساسى بتعلقى بالايه الكريمه ربنا يكرمها

((وَيَسْأَلُونَكَ عَنِ الرُّوحِ قُلِ الرُّوحُ مِنْ أَمْرِ رَبِّي

وَمَا أُوتِيتُم مِّن الْعِلْمِ إِلاَّ قَلِيلاً ))

كلما اقرأ العدد الشهرى العلمى من العربى الكويتى

ازداد انبهارا بالعلم والعالم المتقدم الغربى خاصه لو

اثبتوا دليل لصحه ايه فى قرأننا الكريم

مازال العلم عاجز تماما- لانه قليل

(( وَلا تَقُولَنَّ لِشَيْءٍ إِنِّي فَاعِلٌ ذَلِكَ غَدًا

إِلاَّ أَن يَشَاء اللَّهُ وَاذْكُر رَّبَّكَ إِذَا نَسِيتَ

وَقُلْ عَسَى أَن يَهْدِيَنِ رَبِّي لِأَقْرَبَ مِنْ هَذَا رَشَدًا ))

ان شاء الله كلمه ليها مفعول سحرى لانها تترك الامر بيد الله

بجانب فيها لذكر الله - معنى أخر يستوقفنى كثيرا

(( وَعِبَادُ الرَّحْمَنِ الَّذِينَ يَمْشُونَ عَلَى الأَرْضِ هَوْنًا

وَإِذَا خَاطَبَهُمُ الْجَاهِلُونَ قَالُوا سَلامًا ))

اسمعها كثيرا فى اذاعه القرأه الكريم تعطى راحه

نفسيه عند سماعها- فالجاهلون فى كل مكان من حولنا

(( مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ

فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلا ))

اتذكر بها دائما كتابى رجال حول الرسول واصحاب الرسول

فالمعنى هناك واضح جدا ربنا يرزقنا مثال هؤلاء الصادقون

(( إِنَّكَ مَيِّتٌ وَإِنَّهُم مَّيِّتُونَ ))

نعم مهما طال العمر لا يجب ان ننسى

اننا ميتون

(( وَالنَّجْمِ إِذَا هَوَى -مَا ضَلَّ صَاحِبُكُمْ وَمَا غَوَى
وَمَا يَنطِقُ عَنِ الْهَوَى -إِنْ هُوَ إِلاَّ وَحْيٌ يُوحَى ))

بدايه سوره النجم احبها كثيرا خاصه بصوت

الشيخ عبد الباسط عبد الصمد شئ روحانى ايضا

(( أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ ))

هذه الايه تعمل كجرس فى اذنى نبهنى دائما

كالتذكره عندما ابعد شيئا ما عن التقرب لله

ودا شئ صعب جدا خاصه الوصول للقرب

الداخلى

((فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ ))

من اجمل الايات التى تعطى دفعه للصبر على

مأسى الحياه واحبها كثيرا ايضا

(( وَاعْتَصِمُواْ بِحَبْلِ اللَّهِ جَمِيعًا وَلاَ تَفَرَّقُواْ ))

سمعتها فى قناه الفجر بصوت ملائكى فسجلتها

سبحان الله على روعه الصوت

وتذكرنى بمدرستى لانها كانت شعار الطلاب طبعا

خاصه فى المرحله الابتدائيه مرحله تكوين اصدقاء العمر

(( وَإِذَا سَأَلَكَ عِبَادِي عَنِّي فَإِنِّي قَرِيبٌ

أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي

وَلْيُؤْمِنُواْ بِي لَعَلَّهُمْ يَرْشُدُونَ ))

حسن الختام

القرأن الكريم كل أيه به تحمل طابعها ولكن هنا وقفه فقط

مع بعض الايات القليله التى اثرت فى

ربما لنا وقفه اخرى بعد قراءه جديده تتكشف لى فيها

كالمعتاد شئ جديد

حقيقه الأشياء

سأبدأ التدوينه الفاصله دى بمقوله جميله تقول

( أحيانا يساعدنا الآخرون بأن يكونوا فى حياتنا فحسب )

ل د\ أحمد خالد توفيق

هكذا كان الاخرون فى يومياتى التى بدأتها تحديدا فى 27-4-2008

وكتبت نهايه البلوك نوت بتاريخ 14 - 7-2009

وهى كانت بردوا مساعده جميله فى خلال السنه وكام شهر اللى مروا

فوجئت بانتهاء الصفحات ومش بفكر اعمل بلوك نوت تانيه حاليا

فمكتفيه بالمدونه حتى اشعار أخر

كانت النصيحه الى قريتها سواء فى كتب التنميه البشريه للدكتور

ابراهيم الفقى او حتى النصائح الخاصه بسلوكيات المرأه فى القرن

دا انها لازم تتخلص من انهزاماتها او حساباتنا اليوميه لانفسنا

بطريقه اكتر فائده وهى تفريغها على الورق ثم قراءتها وبكدا بتفتح الباب لحوار

مع نفسها يومى لتصلح الاخطاء او ترى نفسها بعيونها بعد انتهاء الحدث او لاخذ القرار

المهم انها تكون امامنا لنراجع انفسنا من حين لاخر وكدا

كانت اليوميات دى اللى اعدت قراءه كل ما كتبته قبل

كتابه الجديد يمكن مره او اتنين بلاقى حاجه غريبه جدا

انى المستفيده فعلا ولاقصى درجه

لدرجه انى كتبت فى يوم مشحون نهايه يوميه

انى مسامحه الدنيا - من مقوله ( إن عرفنا حقيقه الاشياء سامحناها)

ولاقيت ان اليوميات ليها حق جميل علي وربما مستقبلا اتخلص منها

لان كتير من محتوياتها لن يعرفه غيرى وليس هناك نيه لنشره مستقبلا

ربما لانى تغيرت من عام وربما لانها انتهت وربما لاسباب كثيره

بس لى رسايل جميله ختمتها فيها اوجهها لناس كانت خير صحبه على ورق

البلوك نوت اللى مسمياها (MINE) وشملت معظم مناقشاتنا وصحبتنا

( رساله لصديقتى وتوأم روحى -HONA- بقولها انا مفتقداكى فعلا

تشجيعك و دعائك وجودك فى حد ذاته بنفس البلد ونفس الشغل

غيرتى فى كتير بنظرتى للامور يكفى رومانسيتك الى عدتنى

وواقعيتى اللى جذبتك فاصبحنا صديقتين متكاملتين

وربما لو بقت اليوميات دى اخليكى تقريها زى ما نفسك تعملى)

( رساله لشغلى القديم بطل معظم اليوميات انا سامحتك بجمله من سامحتهم

وبكل ما سببته لى من تدمير لاعصابى وفقع لمرارتى ورفع لضغطى

سامحتك بكل سوءك اللى الحمد لله لم يؤثر فى سلوكى واخلاقى يوما ما )

( رساله ل -FOFA - اقرب الاصدقاء لى اللى تعرفنى من الداخل عيوبى بمميزاتى

ولكنها تحبنى بالمجموع اقول لها انى مفتقده قربنا القديم حكاياتك المدهشه

روحك اللى دايما بقول عليها - فريش- ذكرت فى يومياتى رحلاتنا اكلنا

همومنا المشتركه- بقولها مفتقداكى بجد ونفسى ربنا يصلح حالنا احنا الاتنين لما يحب ويرضى )

( رساله لشخصين عرفونى من الداخل ولكنهم لم يفهمونى جيدا وعرفتهم من الداخل

ولكن لم افهمهم ايضا - احيانا كثيره اظن اننا ثلاثه جمعهم القدر وفرقتهم الايام الغريب اننا

الثلاثه اصدقاء فى هذا الزمن الصعب فيه الصداقه بالطريقه دى

اقولهم انتما من اجمل من عرفت قلبا وروحا لن انساكم ابدا واتذكركم بكل الخير

فقط سامحونى لو قصرت معكم ولا تنسوا اخت احبتكم فى الله فعلا )

( رساله ليومياتى الجديده ربما تكونى اجمل مما سبق وربما

لا تكونى من الاساس ولكن لتعلمى انى متفاءله بالايام القادمه مهما تكن )

( رساله ليومياتى اللى انتهت شكرا لكى لانك استحملتينى بكل ما فى

شهدتى صفحات حب وفرح وصفحات اكتئاب وحزن وواجهتنى فقط بنفسى

بلا اى رتوش فقط ارجو الا تغضبى لو حرقتك يوما او تخلصت منك

لانى اجيد فعلا- الابتعاد فى اصدق لحظات الاقتراب- دا اكتشاف كان خطير

ولكنها الحقيقه- وانتى قربتى منى اكثر من الازم )

التدوينه دى كتبتها للذكرى فقط لكل شئ جميل عرفته على ورق

ابيض نقى يحمل ختم الادويه( لانها بلوك خاصه بالاطباء )

وبقلم فقط يكتب الصدق

واختمها بمقوله جميله بردوا بتقول ( سافر مع الاوراق قليلا واستمتع

بحيوات اخرى أكثر موده وأقل قسوه- انج بنفسك فالعالم ملئ بالاكاذيب

وليس امامك الا سحر الكتابه والكاتبين

ليس امامك الا الهروب الى هذه والى هؤلاء)

ل جمال الشاعر